آنا صحیفه یازارلار |
ساعاتین عقربهلری گئجه یاریسینی گؤسترمهیه ساری گئدیرلر. سوریهنین قوزئیینده، تورک اوردوسونون تئروریستلره قارشی باشلادیغی آمانسیز ساواش کسیلمهدن دوام ائتمکدهدیر.
بیر-ایکی ساعات اولار ساواش حاققیندا یاییملانان خبرلری ایزلهمک اوچون اینگلیزجه هابئله فارسجا خبر سایتلارینا بیر-بیر باش چکیرم.
سانکی بوتون دونیا تورکلره قارشی ال-بیر اولموش! سانکی بوتون دونیا تورکلرین سوریهده تئروریستلرله ساواشدیغینی اونوتموش! سانکی بوتون دونیا بو نئچه ایلده "اولوسلارآراسی بشر حاقلاری" قوروملارینین یاییملادیغی خبرلری یادیرغامیش! سانکی بوتون دونیا بو تئروریستلرین یاراتدیغی جینایتلردن خبرسیزمیشدیر!
بو تئروریست چتهلرین سوریهنین قوزئییینده تورکمنلر ایله عربلری اؤلدوردوکلری زامان، اونلاری اؤز توپراقلاریندان چیخارتدیقلاری زامان سوسان دونیا گوجلری بوگون تورکیهنی "بؤلگهنین جمعیت ترکیبینی" بیر-بیرینه وورماقدا سوچلاییر. بیری ده دؤنوب بؤلگهنین یئددی – سککیز ایل بوندان قاباقکی دموقرافی نقشهلرینه بیر گؤز سالمیر.
هله بو آرادا دونیانین دردی بیر طرف، ایرانین دردی بیر طرف! ائلهبیل، اؤزلری ده بیلمیرلر نه ایش گؤرورلر، نه سؤز دانیشیرلار! بیر یاندان اؤزلری ده یئنی بیر کوردوستان اؤلکهسینین یارانماسینا قارشیدیرلار. بونا گؤره ده عیراق-ین قوزئیینده کوردلرین "باغیمسیزلیق رفراندومو" ماجراسیندا تورکیهنین و عیراق-ین مرکزی حوکومتینین یانیندا دوراراق بو رفراندومون قاباغینی آلدیلار. بیر یاندان دا یاخشی بیلیرلر کی بو دَوه بیرگون اونلارین دا قاپیسیندا یاتاجاقدیر. آنجاق، بوتون بونلارا باخمایاراق، بئله بیر ساواشدا تورکیهنین یانیندا اولماق یئرینه، اوزده دئییلسه ده اَن آزی آرخادا، تورکیهیه قارشی اعتراض دوشرگهسینی قیزیشدیریرلار.
ائله، ایران اوپوزیسیونون دا دورومو ایران حوکومتینین دورمونا تایدیر. بونلار بو نئچه گونو کورد تئروریستلرینی ساوونماقدا اللریندن گلهنی اسیرگهمهییبلر. کوردلره ائله اورک یاندیریرلار کی آزقالا آدام اونودار بونلارین کئچمیشلرینی! سانکی، زامانیندا ایران کوردلرینی قانا بلشدیرن ائله بونلارین اؤزلری دئییلمیشلر! سویچولوق چوخ پیس درددیر! بو درددن قورتولماق بو آسانلیقدا دئییلمیش!
ایندی تورکیه تک باشینا نه تکجه کورد تئرورچولاری ایله ساواش آپاریر، بلکه "یئنی اورتا دوغو" نقشهسینی یئر اوزوندن سیلمهیه چالیشیر! آنجاق، بو آرادا نه گئجه – گوندوز "تئرورا قارشی" سؤزونو دیله گتیرن باتی اؤلکهلری اونون یانیندادیرلار، نه ده "یئنی اورتا دوغو" نقشهسینه گؤره وارلیقلاری خطره دوشن ایران کیمی اؤلکهلر! هله قالسین یانیندا دورمالاری، آرخادان خنجر وورماسینلار باری!
اونسوز دا، بو دوروم تورکلر اوچون هئچ ده غریبه دئییل! تورکلر بئله دوروملاری دؤنهلرله سیناییبلار. بونا گؤره ده "تورکون تورکدن باشقا دوستو یوخ" سؤزونو هر زامان ائشیده بیلرسن! ایندی تورکیه تک باشینا بوتون دونیایا مئیدان اوخویور! بونو دونن "گاردیین" نشریهسینین یازاری دا یازمیشدیر! تورکیهنین بو ایشی اونلاری شاشیرتسا دا، بیزی هئچ ده شاشیرتماییر! تورکیهده دیللر ازبری اولان بیر سؤز واردیر: "تورک اولماق زور، آما تورک اولماماق داها زور! تورک اولدوقدا بوتون دونیا ایله ساواشمالیسان، آما تورک اولماماقدا تورکلرله ساواشمالیسان!"
تاریخ
2019.10.13 / 23:03
|
مولف
Axar.az
|