صاباحی ایمتحانیمیز وار ایدی. اوندان گئجه تئز یاتدیم. گئجه یاریسی یوخومدا هر یئرین تیترده دیگینی حیس ائله دیم. آتامین باغیریشلاری ایله یوخودان دیسکیندیم. زلزله اولور. دورون قاچین ائشیه دئیه باغیریردی آتام. الیمدن توتدو و منی باغرینا باساراق آناما و قارداشیما دا یول گؤستره رک ائشیه قاچدیق. سانکی دونیا یئریندن اوینامیشدی. دووارلار چاتلاییر و او زامانا قدر هئچ دویمادیغیم عجیب سسلر یئر آلتی و اوستوندن ائشیدیردیم. یوخو و آییقلیق آراسیندا گئدیب گلردیم. بیردن کنددن آغلاما سسلری گلمه یه باشلادی. بالام قالدی دووار آلتیندا. کیشیم چیخیب قاچا بیلمه دی. هامی بیر طرفه قاچیردی.

آتام بیزی حیطیمیزده بیر گوونلی یئره قویدوقدان سونرا کوچه یه چیخدی قونشولارا کؤمکلیک اوچون. ائویمیز ییخیلمیشدی. مال حئیوانلاریمیزین قالدیغی دام داش یئرله بیر اولموشدو. آتام بونلاری دوشونمه دن کددیلرین ساغ سالامات اولماسی اوچون گئتدی. آخی بیزیم کدده هامی بیر بیری ایله هم قونشو هم ده قوهومدولار. قارانلیق کندی اؤز ایچینه آلمیشدی. سانکی دونیا سوسموشدو و بیر تک آغلاییش و باغیریش سسی گلیردی.

سحر اولدوغو زامان آنلادیق کندین سون احوالاتینی. بیر نئچه اؤلو وار ایدی و مینلرجه مال داوار دا هلاک اولموشدو. زهرا دا اؤلنلرین آراسیندا ایدی. بلکه زهرانی سیز ده تانییاسینیز. مینم ان یاخین آرخاداشیم ایدی. او تلویزیونا چیخیب بیزیم دردلریمیزی شیرین دیلی ایله آنلاتمیشدی. او زامانلار زهرانی قیسقانسام دا اونون اؤلومو منیم اوشاقلیق دونیامی بیر بیرینه ووردو. بیر داها اونونلا بیرلیکده اوخول یولوندا گئتمه یه جکدیم. بیر داها اونا دولاشا بیلمه یه جکدیم. بیر داها اونو گؤره بیلمه مک منی چوخ اینجیدیردی.
کندده یاواش یاواش سون مدل ماشینلار گلمه یه باشلادی. آغ کؤنیکلی و قارا کوت شالوارلی اینسانلار. هامیسی دا بیر یئرین مودورو ایدی. سؤزلر وئریب سونرا دا گئتدیلر. بیر داها دا بیزیم کندده گلمه دیلر.
کندیمیزه هفته لر اؤنجه زلزله گلدی. آما بیز هله ده چادیردا یاشیریق. قیش بیزیم بورالاردا چتین اولار. کئچن ایللرده قار یاغدیغی زامان آتام سئوینردی بو ایل سولو اولاجاق دئیه. آما دونن آنام ایله دانیشارکن دویدوم. قار یاغاجاق، بو قیشی بو چادیرلاردا نئجه کئچیره جه ییک. اوشاقلار چوخ اوشور.

منیم آدیم اسرا. اون اوچ یاشیندایام. میانانین ورنکش کنددیده یاشیریق. بوزقوش داغلارینین اتکلرینده. بو قیش بیز اوشویه جه ییک. سیز گازلی سوبالارینیزا داها دا یاخین اوتورون. و آغ کؤینکلی اینسانلار ایسه تلویزیونلاردا یالان دئمه یه دوام ائله سینلر.