بو ایلین اردیبهشت آییندا، چالوس یولوندا البرز (Alp Oruz) آدلی تونئل‌ده پارتلاما اوز وئردییینده، هئچ کیمسه "آذربایجان سنین باشین ساغ اولسون!" دئمه‌دی! اوسته‌لیک بو اولای، آذربایجان توپراق‌لاریندان اوزاقدا باش وئردییینه گؤره، بیزلرده حتی "سانال بیر گوندم" ده اولوشدورا بیلمه‌دی! آنجاق، او پارتلامادا جان‌لارینی الدن وئرن‌لرین هابئله آغیر یارالانان‌لارین، ایکی-اوچ خوزستانلی کیشی‌دن باشقا، هامیسی بیر تیکه چؤرک اوچون اؤز یوردوندان اوزاق دوشن آذربایجانلی‌لار ایدی!

تهران‌دا پلاسکو یانقینیندا هئچ کیمسه "آذربایجان سنین باشین ساغ اولسون!" دئمه‌دی! آنجاق، اورادا یانقین سؤندورمه (آتش‌نشانی) اکیپ‌لری آدیندا جان‌لارینی الدن وئرن‌لرین چوخو آذربایجانلی ایدی.

ایران‌داکی سون اعتراض‌لاردان سونرا هئچ کیمسه "آذربایجان سنین باشین ساغ اولسون!" دئمه‌دی! بیر چوخ سایت‌لاردا بئله، بو اعتراض‍‌لار سوره‌سینده یالنیز اوچ آذربایجانلینین اؤلدورولمه‌سیندن سؤز گئتمیش! آنجاق، شهرلریمیزدن آلدیغمیز خبرلره گؤره، اؤزل‌لیک‌له تهران ایله کرج شهرینده باش وئرمیش اولای‌لاردا بیر چوخ آذربایجانلی جان‌لارینی الدن وئرمیشلر.

بیر سیرا کورد سایت‌لاری، کوردلرین بو اولای‌لاردا هامیدان چوخ اؤلو وئردیکلرینی دیله گتیریرلر. آنجاق، بیر تیکه چؤرک اوچون اؤز یوردلاریندان کؤچوب تهران هابئله کرج کیمی شهرلرده یئرلشمیش اولان آذربایجان تورک‌لرینین بو اولای‌لاردا وئردیکلری اؤلولری نظرده آلساق، باشقا یؤندن اصفهان هابئله فارس کیمی اوستان‌لاردا باش وئرمیش اولای‌لاردا قاشقای تورک‌لرینین اؤلولرینی گؤز اؤنونه آلساق، آچیقجا دئیه بیلریک کی ایران‌داکی سون اعتراض‌لاردا هامیدان چوخ تورک‌لر (آذربایجان تورک‌لری ایله قاشقای تورک‌لری)، عرب‌لر هابئله کوردلر اؤلو وئرمیشلر.

ایران اطلاعات وزارتخاناسینین تمثیلچیسی، مجلسین ملی امنیت کومیسیونوندا، دئمیش کی بو اولای‌لارا گؤره توتولان‌لارین چوخو ایشسیز یا دا آز-گلیرلی ایشلی‌لریمیشلر. بو باخیمدان دئمک اولار کی بو اعتراض‌لارا داها چوخ یوخسول‌لار قاتیلمیشدیلار. بونا گؤره ده دئمک اولار کی ایراندا غیرفارس ملت‌لر او جومله‌دن تورک‌لر، عرب‌لر و کوردلر اقتصادی باخیمدان ان یوخسول ملت‌لر ساییلیرلار.

آنجاق، بو آرادا، لاپ ائله بو یوخسول‌ ملت‌لرین آراسیندا دا، آذربایجان تورک‌لرینین آجیسی داها درین، داها آجیماسیزدیر. دئییرلر، قو قوشو هر یئرده یاشاسا دا، اؤلوم واقتینین گلیب چاتدیغینی آنلادیغیندا ایلک سئویشدییی یئره دوغرو گئدر و اورادا اؤلمک ایسته‌یر.

وطن توپراغیندان داها سئویلمه‌لی بیر شئی نه‌دیر کی؟! بلکه ده، ائله بیزیم ننه-بابالاریمیز دا، قو قوشو کیمی ایلک سئویشدیک‌لری یئرلرده اؤلمه‌یی ایسته‌ییرمیش‌لر. ائله بونا گؤره ده، "قوربت جنت اولسا دا، اؤلمه‌یه وطن یاخشی!" سؤزونو دیله گتیرمیشلر. نه یازیق کی، چوخدان‌دیر، آذربایجان تورک‌لری بیر چوخ نعمت‌لر کیمی بو نعمت‌دن ده محروم قالیبلار! نه یازیق کی، چوخدان‌دیر، آذربایجان تورک‌لری "اؤلمه‌یه یاخشی اولان وطن"دن اوزاق‌لاردا، "قوربت" توپراق‌لاریندا باش‌لارینی یئره قویورلار و هئچ کیمسه ده "آذربایجان سنین باشین ساغ اولسون!" سؤزونو دیله گتیرمه‌ییر!