ویل دورانت-ین فلسفه نین لذلتلری دئیه بیر کیتابی واردیر. او بو کیتابدا خیالی اولاراق بیر نئچه فیلسوفو بیر آرایا گتیرمیش و بیر تپه نین آرخاسیندا بیر بیری ایله دارتیشیرلار. نیچه، کانت، دکارت، روسو، بیکن ... اینسانلیق تاریخینه یول گؤسترمیش هر کس اوردادیر. دونیادا دوشونجه نین اولوشماسیندا رولو اولان هر کس اوردادیر.

اوچ گوندور تبریز زیندانیندایام. دوورالارینا باخیرام. کیملر گلیب کیملر کئچمیش بو دؤد دووار آراسیندان. آزربایجان دئین هر بیر ایگیدین یولو دوشوبدور بورایا. حسن آزربایجان، مهندیس امانی، عزیز پورولی، یوروش مئهرعلی بیگلی، رسول رضوی، مرتضی مرادپور و اونلارجا آزربایجان باغیران اینسان داها. اویسا منیم ایلک دفعه مدیر بورایا گلیشیم. من چوخ سیاسی اینسان دئییلم. ایشیم بیلگی سایار باشیندا اوتوروب تویتئر و اینستاگرامدا گیزلی آدلار ایله پست پایلاشماقدیر. بیلمیرم بو دفعه منی نئچه توتدولار.

تبریز زیندانیندا اوتورموشام اوچ گوندور. نه گلن وار نه ده گئدن. نییه بوردیام اونو دا بیلمره م. ائشیکدن ده خبریم یوخدور. اعتراضلارین سونوجو نه اولدو. تبریز و آزربایجان اعتراضا اوام ائدیر می؟ میللی شعارلار سسلندیریلیر م؟ اولمایا بو سفر ده آزربایجان انقلاب ائله سین و چؤره گینی مرکزده کیلر یئسین؟

بو سورغولارلا ایله بوغوشارکن ویل دورانتین کیتابینی خاطیرلادیم. و اونون فیلسوفلاری یئرینه منیم سللولوما خیالی قوناقلاریم گلدی. اردبیل زیندانیندان عباس لیسانی، رجایی شهردن لطیف حسنی و اوین زیندانیندان ایبراهیم نوری. اسکی زیندانی لردن ده امانی، دمیرچی و پور ولی یوخاری باشدا یئرلرین آلدیلار.

آرالاریندا باشلادیلار دارتیشمایا. سون اولایلاری و آزربایجانین توتومونو حرارتلی سؤزلر ایله آنلادیردیلار. تارتیشمالاری ساعاتلار چکدی. سونوندا حسن آغا آزربایجان دئدی من آزربایجان گنجلرینه گووه نیرم. اونلار میللی حاقلاریمیزی الده ائتمک اوچون ان یاخشی یولو تاپاجاقلار.

گئدرکن هامیسی منیم اوزومه باخیب گولومسه دی. من بیر نئچه گونه قالماز چیخاچاقدیم. آما اونلارین بعضی لری بیر داها گئری گلمه یه جکدی بعضی لری ایسه اوزون زامان زینداندا قالاجاقدی.