ایکی ایل اؤنجه ائولنمیشدیلر. هر ایکیسی ده وطنلری آزربایجانی و آنا دیللری تورکجه نی سئویردیلر. اوغلان میللی حاقلاری اوچون باغلانمادان اؤنجه قزئتلرده و داها سونرا دا سایتلاردا مقاله یازاردی. قادین ایسه شئعر ایله مشغول ایدی. هفته سونلاری دوستلاری ایله گؤروشوب آزربایجان مسئله لری حاققیندا بول بول دارتیشاردیلار.

یاز آخشاملارینین بیرینده گئجه یاریسی قاپیلاری چالدی. ایچرییه اونا یاخین مامور گیردی. ائولرینی آلت اوست ائله دیلر. ائوده کی بیلگی سایارلارینی و کیتابلارینی اوغلان ایله بیرکیلده آپاردیلار. قادین اوچ آی بویونجا هر گون اوغلانین ایشینین دالیسیجا دوشدو. مئدیا ایله مصاحیبه لر ائتدی. حؤکومت مامورلاری اونو سسسیز اولماغا قورخوتسا دا او هئچ زامان سوسمادی. اوغلان قارانلیق زیندانلاردا یالان اعترافلارا مجبور ائدیلسه ده هئچ بیر زامان قبول ائتمه دی.

اوچ آی سونرا محکمه ده سئوگیلیسینی گؤره بیلدی. اونا گولومسه یرک باخیردی. سانکی اوچ آی آیریلیق اونلارین سئوگیسینی داها دا درینشدیرمیشدی. محکمه اوغلانی میللی امنیتی تهلیکه یه سالدیغی اوچون بئش ایل زیندانا و بیر ایل سورگونه محکوم ائتدی. اوغلان محکمه ده دئدی: بو نئجه بیر میللی امنیتدیر کی منیم اؤز آنا دیلیمده یازیدیغیم اوچون خطره دوشور.

بئش ایل قادین هر هفته سئوگیلیسینی گؤرمه یه گئتدی. قیش و سویوغا باخمایاراق. یورغون اولسا دا بعضی گونلر، هر زامان اوغلانین قارشیسینا گوجلو و اومودلو چیخدی. اونا گؤزل شئیلردن دانیشدی. و گؤزل گلجکلری بیر داها یاشایاجاقلارینی سؤیله دی. بئش ایل بیتدیکدن سونرا قادین اوغلانین سورگون اولدوغو شهره داشیندی. بو شهر ده وطنلریندن چوخ اوزاق اولسا دا بیرلیکده سئوگی یوواسی قوردولار.

بو حیکایه اونلارجا سئوگیلیلرینی گؤزله ین آزربایجان قادینلارینین حیکایه سیدیر. اونلار سئوگی نین بعضن یوخ بیر چوخ زامان گؤزلمک و دیره نمک اولدوغونو بیزه اؤیرتدیلر. اونلارین بعضی لری هله ده گؤزلورلر. سلام و عشق اولسون قادینلاریمیزا.