سؤیله بیزه ژولیو!

گون‌اورتانین گونشی نئجه اویغویا دالیر سونبول‌لر آراسیندا

آنئمون‌لار قوینوندا؟

گئجه‌نین توختاقلیغی داغ‌لاردان نئجه ائنیر؟

اؤزومله دانیشیرام:

ساچ‌لاری اولدوزلاردان ایسلانمیش اولمالی‌دیر.

دان‌یئرینه ساریلیر سارماشیق،

آنانین أل‌لری

شام یئمه‌یی سونراسی مندیل‌لری قاتلاییر.

نئجه‌دیر

نئجه‌دیر باجی‌نین دیوارا دوشموش کؤلگه‌سی

ایینه‌نی ساپلاماق‌چون چیراغا یاخینلاشارکن

ائویمیزن آجی‌لارینی سوسقونجا یاماماق ایسته‌دیکده؟

سؤیله بیزه ژولیو!

هرنه‌یی اونوتموشوق.

ایتیردیک‌لریمیزی بیر یئرده بولموشوق

اؤنوموزده‌کی اؤزگورلویه، باریشا زیللنمیشکن.

دوغروسو خاطیرلایا بیلمیریک

یاشیل یارپاق نئجه گوندوزه گون‌آیدین دئییر.

قاریشقالار یووالارینی نئجه قورورلا؟

گونش باغچالاردا نئجه سئیره چیخیر؟

آغاجین رنگی سودا هانسی بویایا چالیر؟

گون‌باتان چاغی دونوخوب قالمیش بولود نه دئمک ایسته‌ییر؟

قادین گؤوده‌سی آغ‍‌آپپاق ملافه‌نین آلتیندا هانسی بیچیمه دوشور؟

خاطیرلایا بیلمیریک.

یالنیز،

یالنیز جان‌لارینی قوربان‌وئرمیش‌لری آنیریق،

اؤزگورلوک اوچون

باریش اوچون.