آنا صحیفه یازارلار |
حبیب ساسانیان ( یاکاموز)
آیلار اؤنجه عرب کؤرفزینده ایرانلا آمریکا آراسیندا گرگینلیک یاراناندا، چوخلاری دوشونوردولر، بو خینا اوْ خینادان دگیل و دونالد ترامپ ائله همن امام زاماندیرکی گلیب میللتی دینی ارتجاعدان قورتارسین. آنجاق سیاست عالَمینین مین بیر فیریلداغیندان غافل ایدیلر. گیریشی ائله بوردا دگیشیب گئچیرم میللی حرکتین غفلتلی توتومونا.
یوز ایلهیاخین ایراندا میللتلر علیهینه گئدن ایگرنج اویونلار، اؤزللیکله آزربایجانلی لاری، اوْلسون مشروطه انقلابی اوْلسون ۲۱آذر ۱۳۲۵ حرکاتی و ۱۳۵۷ قیامینین سیخیلمیش فنارلاری، ۱۳۹۸-جی ایلین آبان آیینین سون گونلرینده آچیلمیشدی و دونیادا بؤیوک بیر سس سالدی. بیر سیرا وطنداشلار، دونیا سوپر گوجلرینین پرده آرخاسیندا تهرانین اسلامی دیکتاتور رژیمیایله أللری بیر کاسادا اولدوغوندان خبرسیز، اومود ائدیردیلر داها چتین گونلرین سونو چاتیب و امام زامان دئییلن همن ترامپدی کی باجاریب ایچه ریدن میللتی حاکمیت علیهینه قاباردسین و دیشاریداندا ناتو ایله خلیجدکی نظامی اعتلاف دان یارارلاناراق ج.ا.ایرانین ایشین بیتیرسین. خمینی دئمیشکن:« لاکن» سیاست دونیاسینین اویونلاری آیاق یالین جاماعتین ایستکلری اوغروندا یوخ، ترسینه اونلارین آرتیق تاپدالانماسی باهاسینا دوزولوب قورولور. بو اویوندا ائله اوزاق چکمهدن، بیر نمونه سونوجونو گؤستردی. اؤرنک اولاراق بیر یاندان آبان آیینین قانلی قادالی گونلرینده، آمریکانین جمهور باشقانیندان دوتموش ها بئله خارجه ایشلر وزیری و آغ ائوین ایرانلا باغلی سؤزون دییهنی، اوْد تؤکوب قوْر آیاقلاییردیلارکی: ایهاالناس والدنیا؛ بیز وار گوجوموزایله ایران میللتینین ( دقت ائدین، ایران میللتلرینین یوخ، ایران میللتینین) قیامیندان حمایت ائدیریک، نه بیلیم ایندی واختیدی بو اؤزلری دئمیشکن فساد جرثومه سینه سون قویولسون و بئله دادلی دوزلو شعارلاردان...
باشقا یاندان پرده آرخاسی خیمیر- خیمیر ایرانین خارجه ایشلر وزیری ایله سیاسی زیندانیلرینی دَگیشدیرمهیه مذاکره ائدیردیلر!
اوستهلیک آمریکانین آلمانداکی سفیری ریچارد گرنر ادعا ائله دیکی:« اروپا اؤلکهلریایله بیرلیکده، فنی باخیمدان بو امکانلاری واردیر، ایرانین مخابرات سیستمینه گرک اولمادان، اعتراضچیلارا تریبون آچماق اوچون پولسوز و سرعتلی بینالملل اینترنتی وایفای شکیلده، اؤلکهنین باشدان- باشاسیندا قورماق ایستهییرلر»!..
؛الکترونیک ایله مخابرات سیستملریندن بیر بالاجا باش آچانلار یاخجی بیلیرلرکی بو، ساده جه عوام آلداتماق وگولونج دوغوران گوْپ دور، داها دوغروسو بوْش ادعا و أن آزی بئش ایل گلجکده کسینلیکله، اولاسی دگیل* ( بونو اثبات ائتمک اوچون یازینین سونوندا بیر لینک آرتیراجاغام، ماراقلی اولانلار ایشین نه یئرده اولدوغونو آرایا بیلسینلر و گؤرسونلر کی جناب سفیر ریچارد گرنر، هم اؤزونو و همده دونیانی و داها دوغروسو ایرانلی لاری بارماغینا دولاییب). بونلارلا یاناشی، یوز ایل آیری سئچگیلیکدن و فارس محور سیاستدن علاجسیز قالاراق بیر تیکه چؤرک اسیری کیمی تهرانین حاشیهلرینده فهلهلیک - دمیر دومور توللانتیلاری و میوه جعبهلری آلوئری کیمی ایشلرله مشغول اولماق نیتینده اهل عیال شرمندهلیگیندن چیخماق اوچون کوتلهوی کؤچمه زوروندا قالان آزربایجانلیلار، گئت- گئده، فارس فرهنگینده أریمکله یاناشی، کؤچری دورنالار سایاق « موغاندا أتنهدن، باغداددا خورمادان» اولاراق، چیخیلماز دورومدا یاشاماغا محکوم قالدیلار. نهایت بنزینین باهالاشماسی اعتراضلاریندا، جانلاری بوغازلارینا چاتدیقدان، بوتون آیری سئچگیلیگه و فسادلاراقارشی، مدنی شکیلده باشقا میللتلرایله یاناشی، ماشینلارینی خیاوانلاردا سؤندوردوکلریندن، نظامی انتظامی و امنیتی قوهلرین وحشیجهسینه خالقا باسقیسینی گؤررکن غیرت قانلاری دامارلاریندا جوشدو، و قارشی دورماغا مجبور اولدولار. حاکمیتین اینترنتی باغلاماسی میللتلری غفیلدن آچمازدا قویسادا، اعتراضلار باسیلاندان سونرا، یاواش - یاواش آجی و آغیر ایتگیلی آمارلارین اوستو آچیلماغا و جنایتلرین نه یئرده اولدوغو دونیایا بللی اولدو. یازیقلار اولسون دوز بو گونلرده، دمکراسینی باغیران اروپا اؤلکه لرینین تایباشیلاری، ایرانلا اینستکست چرچیوهسینده قارداش- قارداش اولماغا جان آتیردیلار ! رحمتلیک میرزاعلیاکبر صابر دئمیشکن :« میللت نئجه تاراج اوْلور اوْلسون، نه ایشیم وار؟»...
آردینجا بللی اولدو کی تهران لا اطراف شهرلرینده اؤلنلرین بیر چوخلاری، آزربایجانلیلاردی. موغاندا گئرمینین چوْنگونش ایله بئلداشی کندلریندن توتموش اردبیلین کیسالار و تبریز، مرندین اوجقار کندلری و اؤزلریندن دیدرگین دوشموش قارا بخت جاوانلاریمیزین بیر آندا، ایستی اورکلرینین گلجکده خوش گونلر دیلگی ایله یاشام سئودالاری و دؤیونتولری، زوراکی اسلام حاکمیتینی قوروماق
نامینه گوللهلریله ابدی سوسدو. عینی طالعی شیرازدا قاشقایی سویداشلاریمیزدا یاشادیلار.
بو آرا، تهراندان موغانادک، سپاهین امنیتی و اطلاعات وزارتینین مأمورلاری، سندسیز ثوبوتسوز آزربایجانین میللی فعاللارینی توتماغا باشلادیلار. اعتراضلارین باسیلدیغی و آرخایینلیغا چیخاندان سونرا، میللتین دئپرس دورومونو بئله گؤرن مغرور مسئول ومأمورلار، دئمک اولار بوتون توتوقلانانلاری پهلوی دؤنمینین سون چاغلاری سایاق، دیشاری اؤلکهلره باغلادیلار! باشقا یاندان بشرحاقلارینی ساوینان N.G.o لارین و سوسیال مئدیالارین باسقیلارینی نئتراللاشدیرماق اوچون اؤلکهنین بیرینجی شخصی، قهرمانجاسینا نرمش ائدیب، اؤز مأمورلاری جاسوس آدی قویوب اؤلدوردوکلرینین بعضیلرینی شهید آدلاندیردی! آنجاق هئچ سوروشان اولمادی کی، آی بالام بیر تیکه چؤرک اسیری اولان کند اوشاغی « زلفعلی ایله اوروجعلی، هاردان اولدو خارجهلی؟». دقیقاً نئجهکی ۱۳۵۷ دئوریمینده گئجهلر داملارین اوستوندن وئریلن شعارلاری حاکمیت کاسئته یازیلمیش ( ضبط اولونموش ) سسلر آدلاندیراندا، میللت خیاباندا سسلندی :« ازهاری گوساله، بازم میگی نواره؟». یئری وار بورادا بیر قیسا خاطره می اؤرنک گتیرم. ۱۳۸۶ - جی ایلده گیزلینجه ایشیق درگیسینی چیخارماق اتهامینا اردبیلین وزارت اطلاعاتینین انفرادی سلوللاریندان بیرینده، ۷ گون تک قالدیغیمدان سونرا، باشقا بیر سلول-ا کؤچورولدوگومده، آیری بیر متهم ایله ۱۰ گون بیرگه قالماغا مجبور اولدوم. بیرینجی گونلرده هر ایکیمیز قارشی طرفدن شوبههلنیردیک کی اولمایا بو آدام مأموردور و ایستهییرلر سؤز چکسینلر. نهایت سلول یولداشیم دیللندی و قیسا اؤزونو تانیتدیرماقلا، بیلدیمکی اوزاقدان اوزاغا قوهوملوغوموز وار. یاواش- یاواش قیریشیغیمز آچیلدی و صمیمی لشدیک. یازیق آدامین مندن بیرینجی سورغوسو بو اولدو :« حبیب قارداش، سن آللاه " ما هستیم " یانی نه؟»! او زامانلار ماهواره دن اپوزسیونلارین چئشیدلی تلویزیون کاناللاری آرا، بو آدلی بیر کانالدا گؤزومه دگمیشدی. و من بیرینحی ائله فیکیرلشدیم کی بو مأموردپر و اییتهییر بیله، منیم مثلاً اؤزلری دئمیشکن ضد انقلاب تشکیلاتلاریایله ایلگی و یا تانیشلیغیمدا وارمی؟ آمما سادهجه دئدیمکی ؛ یانی، بیز واریق. آدامین گؤزلری دولدو و درین بیر آه چکیب دئدی :« یوخ، ائلهبیل سنده بیلمیرسن»! سوروشدوم نئجه؟ و آچیقلادی کی :« استنطاق دا، ائله منده دئییرم ما هستیم، یانی بیز واریق، دئییرلرکی، یوخ دقیق دئنن کی ما هستیمایله نه ساز بازین»؟! و نهایت دوشوندوم کی یازیغین ألینده بیر آزجا دگرلی آنتیک جنسلر واریمیش، امنیتی مأمورلاردان بیریسی بونا آد قویوب توتوب تا ألیندهکین آلسین و ساده بیر تاخیل آلوئرچیسی ابتدایی ساوادلی وطنداشی ائله یئره باغلاییبکی داها اؤزوده قورتارا بیلمیر. هله سونرالار اونون طالعی نئجه اعدام دان سیندی تا آزاد اولدو، طایفادان آرا- سیرا سوراقلاشیردیم و ایللر سونرا اتفاقی گؤروشده بیلدیم کی ألیندهکین آلیب و اؤزونو بوشلاییبلار. بو خاطرهم اوزوندا اولسا، مسألهیه آیدینلیق گتیرمهیه یئرسیز دگیل. بو آنلامداکی، بیزیم میللت باشسیزلیقدان هرزامان سلطنتچیلرین قوربانلیغی اولوب. ایندیده، آزربایجانین قاتی دوشمانی سلطنتچیلر، غرب دونیاسیندا وارگوجلرینی توپلاییب، بیزیم یازیق میللتین اؤلولرینی اؤز آدلارینا مصادره ائدرکن شورای گذار قورورلا.اونلارین قارشیندا آزربایجانین میللی حرکاتینین تشکیلاتلاریندان اوچو، بیر آرایا گلیب اورتاق بیر بیانیه وئرمهیی باجارمیرلار.
اؤلکه ایچینده اوْلان مبارزلرین باشلارینین اوستونده امنیتی قوهلرین اؤلوم مَلکلری قارا کؤلگه سالان بیر حالدا، دیشاری تشکیلاتلاریمیز کوتلهنی میللی منافعیمیز اوزره مدیریت ائتمک اوچون هئچ بیر عملی اوْلاسی حاضیرلیق گؤستره بیلمهدیلر. بو دورومدا اؤلکهنین أن بیرینجی آقازاده سی رضا پهلوی، ۴۰ ایل اؤنجه آتاسی و عاییلهسی میللتلرین سورفاسیندان اوْغورلادیغی پولون شوتونا، ایران اینترنشنال کیمی تلویزیون قوروب و ایندی یئنی آقازادهلری فسادا متهم ائدهرک، یئنیدن شاهلیق سئوداسیایله آتاسینین ۱۳۲۵ -جی ایلده جنایتلرینی تکرار ائتمک پئشینده دیر. اوزون سؤزون قیساسی بوکی؛ بو گون صداقتله بیرلشمهسک، بیزیم میللتین قانلاریندان سو ایچیب خوْل بوداق آتان پان ایرانچیلیغین ایچی بوشالمیش آغاجینین هر بیر بوداغیندان یئنیدن بیر آزربایجان فداییسی آسیلمالیدیر. چونکی میللتین دردلرینی دوشونوب میللتچی اولماساق، هابئله اؤزوموزه اینانماساق، دونیا سوپرگوجلرینین سلاحلاری سینانیب ساتیلماق اوچون تهرانین ایندیکی رئژیمینی اؤلمهدیریل وضعیتده آیاقدا ساخلاماق، أن اؤنملی سئچیملردن و داها دوغروسو نعمت دئمکدیر. گلین بو سئچیم ایزنینی اونلارا وئرمهیک.
تاریخ
2019.12.11 / 13:08
|
مولف
حبیب ساسانیان
|