تاریخیمیزده خصوصی یئری اولان، ان قدیم تورک دولتینین یاراندیغی اراضی، قیزیلدان دیرلی تورپاقلاریمیزین صحرایا چئوریلمه‌سینه بیر نئچه آددیم قالیب. بس سوکوتون داشینی نه زامان آتماغی دوشونوروک؟

دونیادا خصوصی اؤزللیکلریله سئچیلن اورمییا گؤلو ملا رژیمینین سایه‌سینده، غیری-عادی غریب‌چیلیک ایچینده قورویوب گئتمکده‌دیر. آراشدیرمالارا گؤره، اورمییا گؤلونون سوییه‌سی سون ۶۰ ایلین ان آشاغی سوییه‌سینه چاتیب. بو او دئمکدیر کی، گون کئچدیکجه گؤلون خلاصی داها دا چتینلشه‌جک، حتی ممکن‌سوزلشه‌جک!

اکولوژی فلاکتین آستاناسینداییق. لاکین بو فلاکتین میقیاسینین نه درجه‌ده بؤیوک اولدوغو، گؤرونور، چوخلاریمیز اوچون آیدین دئییل، یوخسا سوسیال مئدیالاردا یارادیلان معناسیز کامپانییالارا نیه قانع اولاق؟ یاخود نیه سیاسی اویونلارین قربانی ائدک؟

بونو گؤرمزدن گلنلریمیز ده آز دئییل. آخی بو مسئله گونئی آذربایجان‌دان علاوه بوتون ایرانی، حتی باشقا دولتلری، اؤزللیکله دونیا آذربایجانلیلارینی ماراقلاندیرمالیدیر!

صحبت میلیونلارلا اینسانین حیاتیندان، بؤیوک بیر اراضینین صحرایا چئوریلمه‌سیندن گئدیر. بیر مدتدیر کی، اورمییا گؤلو اراضی‌سینده و بورا یاخین بؤلگه‌لرده خرچنگ کیمی خسته‌لیکلر کسکین آرتیب، حیوانلار تلف اولور، باغلار و اکین ساحه‌لری محو اولماقدادیر. دوز فیرتینالاری عمله گلیر. بس، بو گؤل تمامیله قوروسا نه باش وئرر؟ بو فیرتینالارین قارشیسیندا کیم دورار؟ جهنمه دؤنموش بیر اراضیده کیم یاشایار؟ طبیعی کی، هئچ کیم!

بئله بؤیوک تأثیرلری اولان، اؤزوندن گئریده آجیناجاقلی فسادلار قویاجاق فلاکت اینسان اولان هر کسین فریادینا سبب اولمالیدیر. گلین، اؤزوموز اؤز یوردوموزا، ائویمیزه صاحب چیخاق. هئچ کیمدن، اؤزللیکله، بو حکومتدن مدد اومماق اولماز: گؤلون قوروماسی ملالاری ماراقلاندیرمیر، بونلار دولتین باشیندا اولدوقلاری مدتجه چتین کی، لازیمی آددیم آتیل‌سین.

ملا رژیمی، ساده‌جه، اینسانلاری اؤلدورمور، او طبیعتله ده دوشمن‌دیر. بو اؤلکه‌نین اینسانلارینا رحم ائتمدیی کیمی، تورپاغینا، سویونا دا رحم ائتمیر. نه قدر کی، بو رژیم اؤلکه‌نی ایداره ائدیر، ایرانی فلاکت آردینجا فلاکت گؤزلییر. اکولوژی فلاکتلرین قارشی‌سینی آلماقدان توتموش ائتنیک و مدنی حقوقلاریمیزا قدر، جین‌سی آزادلیقدان توتموش سیاسی آزادلیغیمیزا قدر - هامیسینین حلی اوچون بیرمعنالی شکیلده رژیمین قارشی‌سیندا دوروب، بیزه مخصوص اولانی طلب ائتمکدن زیاده سؤکوب آلمالیییق.

تأسف کی، بو، بیزیم تک چیخیش یولوموزدور. یوخاریدا اوتورانلار بیزلر اوچون آلترناتیو یول تانیمیرلار. گئج-تئز هامی بو قناعته گله‌جک، لاکین هر کئچه‌ن گون سولان چیچکلریمیزین سایی آرتاجاق.