آیدین بو ایل اوچونچو صینیفا گئدیردی اما کیچک قارداشی اولان اوختای ایکینجی صینیف دا ایدی. اوختای بیرینجی صینیفی تورکجه اوخوموش و باشاری ایله بیتیرمیشدی. ایکی قارداش قوشاچای-ین آرخا محلله لرینده یاشاییردیلار. بو گون اونلار اوچون حیاتلاریننین ان کدرلی گونو اولاجاقدی.اطرافلاریندا ائشیدیردیلر کی فرقه دوشوبدور و بوندان سونرا داها تورکجه اوخومایاجاقلار اوخوللاردا. او گون اوشاقلاردان بوتون کیتابلارینی اوخولا گتیرمه لرینی ایسته میشدی مودیر.

ناهارا یاخین اوشاقلارین هامیسین ماشینلارا میندیریب شهرین مئیدانینا آپاردیلار. آیری اوخوللاردان دا اوشاقلار گلمیشدی. مئیدانین اورتاسیندا اودونلارلا بیر تانقال قورولموشدو. تانقالی یاندیردیلار و اوشاقلارا دئدیلر وتون تورکجه کیتابلارین اودون اوستونه آتسینلار. اوختای-ین گؤزلری دولدو. او کیتابلارینی یاندیرماق ایسته میردی. هامیدان گیزلی آنادیلی کیتابینی پالتارلارینین آلیتندا گیزلتدی . باشقا کیتابلاری اودون اوستونه آتدی.

بیر نسلین گلجه گی اوشاقلارین گؤزلری اؤنونده یانیردی. بیر بوجاقدا ادبیات اؤیرتمنی نین گؤزلریندن یاشلار گلیردی. گؤز یاشلاری هئچ سیلمه دی.
اوختای ائوه گلدیگینده آغلاییردی. داداشی اولان آیدین-ی گؤرونجه اورکدن آغلادی: داداش!داداش! هؤنگوره هؤنگوره دئدی. کلمه لر بوغازیندا دویوملنمیشدی.

کتابلاریمی یاندیردیلار داداش دئییب یئنیدن باغیراراق آغلادی. آیدین-ین دا کیتابلارینی یاندیرمیشدیلار. آما او قارداشینی بو حالدا گؤرونجه کدرینی اؤز ایچینده یاشادی. سونرا اوختای قارنیندا گیزلتدیگی آنادیلی کیتابینی چیخاریب بیر آز سئوینج ایله دئدی: آما من بو کیتابی یاندیرمادیم. گیزلتدیم. ایکی قارداش گولومسه دیلر.
اوختای عمی ایندی سکسن ایکی یاشیندادیر. هر ایل آذر آیینین ییرمی بیری ایله بیر آلتیسی ساخلادیغی آنا دیلی کیتابینی واراقلاییب اسکی گونلرینی اوزونتو ایله یاد ائدر.