سومرین، ساوالان داغیننی اتکلرینده یاشیللار و داغلی بیر کند. ۱۳۲۶ ایلینده ان کدرلی گونونو یاشایاجاقدی. سومرین کندینین ساکینلری ۱۳۲۵ ایلینده فرقه نین قورولوشوندا اؤنملی رول اوینامیشدیلار. خیاو پادگانین اله کئچیریلمه سینده اونلار اؤن صف ده ایدی. اونلارین باشیندا شاهسئون قیزی سریه و حیات یولداشی وار ایدی. سریه ۵۵ یاشیندا اوجا بیر قادین ایدی. او توم وارلیغی ایله فرقه یه و دموکراسی یه اینانیردی.

سریه فرقه دؤنه مینده کندین ان چالیشقانلاریندان ایدی. خالقی اؤرگوتله ییب اونلارا اؤز حاقلاریندان دانیشردی. اربابلارا و فئوداللارا بویون ایمه مه لرینی ایستیردی. اصلینده او کوللار کندینده دونیایا گلمیشدی اما حیات یولداشی بورادا یاشادیغی اوچون او دا بو کندده گلین گلمیشدی. خالق اونو سئویردی. هر گون حیات یولداشی ایله بیرگه میللتین دردلرینی ائشیتمک اوچون کندده کوچه کوچه گزیردیلر. هر آی فیرقه نین مرکز توپلانتیلاری اوچون تبریزه گئدیب اورادا نلر باش وئردیگینی ده اؤیرنیردیلر.

فیرقه ییخیلدیقدان سونرا او اینامینی ایتیرمه دی. حیات یولداشی و سیلاحداشلاری ایله بیرلیکده دیره نیش جبهه سی قوردو. ایران ارتشینین خیاودان اردبیله گئتمه سینین اؤنونو کسمک ایستیردی. آتاسی بایرام قولو بئی اونا جسارتی اؤیرتمیشدی. حیات یولداشی آغا بئی ایله سیلاحداشلارینی توپلاییب یولو کسدیلر. بئش گون بویونجا ایران ارتشینی دایاندیردیلار. ایران ارتشی اویونبازلیغا باش ووردو. نئجه کی میللی حکومتی ییخماق اوچون اویونا باش وورموشدو.

سریه او لحظه باشینی حیات یولداشینین سینه سینه دایاییب دئدی: نه ائدک، اوشاقلار بوردا آج و سوسوز. اونلار اوچون اولسا دا دیره نیشی بیتیرمه لییک. بئش گونلوک شاهسون قیزی سریه و سیلاحداشلارینین دیره نیشی سؤزلر وئریله رک بیتدی. آما ایران رژیمی سؤزونو توتمادی و سریه ایله بیرلیکده اون سککیز مباریزی اعدام ائتدی.

سریه گولله لنیرکن دئدی: بو هنر دئییل سیز سؤزونوزو توتمادینیز. آما بونو بیلین تاریخ اویونبازلاردان بیر گون اینتقام آلاجاق و آزربایجان خالقی منیم قانیمی یئرده بوراخمایاجاق.