کبرآزاد, علیرضا فرشی, بهنام شیخی, حمید منافی

نه ایسته‌دیم من؟ تالان اولموش آنا دیلیمی، یاساق قالمیش آنامین نیسگیللرینی،قوشمالارینی. بیر بئله دویغولار کیملری اینجیتدی؟ کیملره ضرر وئردی؟ من بیلمه‌دیم!

بو گونلر آذر آیی‌نین اییرمی بیردن چوخ زامان کئچمییبدیر. من بیلن، اینصافلی اولان، کیشیلیگی بیلن بیر آدام هانسی دیلده، هانسی مذهب ده اولموش اولسادا ائلییه بیلمز 1325 ـ جی ایلین آذر آیینی آزربایجاندا یاددان چیخاردیب او زامانلاری، او قانلی زامانلاری اونودسون. او زامان پهلوی خاندانین خبیث اللری بیزیم گوناه‌سیز اؤلکه‌میزده ، گوناه‌لی، گوناه‌سیز آداملاری اؤز قانلارینا بویادیلار. اونلاری چارپازا چکدیلر، ساعات قاباغیندا بیزیم آنا دیلیمیزده اولان بؤتون کیتابلاردان جنازه لرییمز کیمین تونقار قالادیلار. اونلاری یاندیردیلار. بیزه اؤز آنا یوردوموزدا ، دوغما تورپاغیمیزدا اجنبی دئدیلر. اوشاق‌لارا، قادینلارا رحم ائله‌مه‌دیلر، ندن بیر بئله تاریخ‌لر بیزیم آزربایجان دا هر گون تیکراراولوب و اولور؟ کیم بیلمیر قاراباغ‌دا ائرمنی قوشونو گوناهسیز یازیق آرواد ـ اوشاغین باشینا نلر گتیرمه‌دیلر؟ هانسی گوناها،آی منیم گؤزل وطنیم، یاشیل وطنیم هر گون اؤز اوغول ـ قیزلارینین قانینا بویانیرسان؟ سنی‌نین اوره‌گینده نلروار؟ هانسی آداملار، قودرت آداملاری اولمویوبدور سنه ال اوزاتماسین، ایندی داها زامانی گلیب چاتیبدیر بو سئیرلری آچیب، دانیشاسان بللکه بو اوز قارا تاریخ اوتانمیش اولا.

آذر آیی کئچیر، دی گلیر، قار یاغیر بوزلویورام، ایچیمده دولو ـ دولو ایستی دویغورلار منی بو داغدان او داغا، بو اؤلکه دن او اؤلکه¬یه چکیب آپاریرلار، قیچلاریم یورغون اولسادان، گؤزلریمده باخیشلار تار اولسادا گؤرورم، اویغور موسلمانلاری نجور، چین دولتینین الینده اؤز هویتلرینی الدن وئریرلر. گؤرورم داغستاندا نجور روسیه دولتی گوناهسیز آداملاری هر گون آرادان آپاریر... بونلار هامیسی بیزیم اؤلکه‌ده آذر آیی‌نین اییرمی بیرینه چوخ ـ چوخ بنزیرلر. اؤز گؤزومون اؤنونده آتا ـ بابالاریمین قانی ایچینده بوغولورام.

دی آیی منی اوشودور، بدنیم تیتره‌یه ـ تیتره‌یه گؤزلریمین اؤنونده، گؤرورم بیزیم تانینمیش قوجامان‌لاری بیرجه تورک اولماق اوچون موحاکیمیه چکیرلر، اونلارا اوزون ـ اوزون زامان دوستاق‌لار وئریرلر، اونلاری اؤز آنا دوغوما وطنلریندن سورگون سالیرلار، بیر بئله عدالت‌سیز دونیادا بیز گینه ده باشی اوجا، اومیدلی، اودلارین، پاسلی قان‌لارین آراسیندان باش قالدیریق. تورکلر تانرینین اؤلمز عسگرلری دیلر.

دئدیم دیل، دئدیم آنا. هر کیمسه‌نین اؤزنونه سایاق بیر دیلی وار، هر دوغولموش جانلی‌نین آناسی. بونلار چوخ اؤنملی پای-دیلار کی، اونلاری تانری باغیشلاییبدیر. تانری باغیشلایینان بیر آرماغان کی، یانلیش اولا بیلمز، گوناه اولا بیلمز.

کئچمیش ایلده بیزیم باشی بلالی اؤلکه‌ده آنا دیلی گونو دؤرد نفر تانیمیش قوجامان #اکبرآزاد – #علیرضا فرشی – #بهنام شیخی – #حمید منافی) جنابلارینی یاخالاندیلار. اونلارین گوناهی بو اولدو کی، اؤز آنا دیللرینی حورمتله‌دیلر، اوجا سسده دئدیلر بیز تورکوک. بو تورکلوگو بیزه تانری وئریبدیر، اؤزموز، اؤز اختیاریمیزا بونلاری سئچمه‌میشیک، آما ایندی اؤز آنا دیلیمیزه، بوغولموش سسلریمیزه، یاساق قالمیش دیلیمیزه و تانری دان بیزه پای اولموش آرماغانا صاحیب چیخمالییق... بونلارین هاراسی چاتیشمازلیق بیر قونو دور؟. ندن ایندی باشقا قدرت ده اولان آداملار بونو یانلیش بیلیرلر؟. ندن اؤز قوردوق‌لاری قانونلارا دا عمل ائله میرلر؟

اوجور کی، یوخاری دا دئدیم آنادیلی بیر سئچم دئییل، بو بیر آرماغان دیر، تانری وئرمیش آرماغان. داها دا کی، بیزیم ملّی یاسا دا اون بئشمجی بؤلوم ده چوخ آیدین گلیبدیر کی، هر کس گرک اؤز آنادیلینی یازیب اؤیرنسین. ایندی ندن¬دیر بیر بئله آیدین قونولار جرم اولوبلار؟ بو قونولاردان دانیشماغین جزاسی گوناهسیز اینسانلارا قیرخ ایل دوستاق اولوبدور، نئچه ایل‌لرسورگونلوک اولوبدور ؟ بونو بیلمک لازیمدیر. بونو آیدینلاشدیرماق لازیمدیر. هامی اؤزگور اینسانلار گرک آنا دیلینی، وطن تورپاغی کیمین قوروسونلار. وطنسیز یاشاماق ممکون ده اولسا! دیلسیز یاشاماق ممکون دئییل. آنا دیلی هامی اینسانلارین شاه دامارلاردیر، اونلار قیریلسالار، هر شئی آرادان گئتمه‌لیدیر.