بیز ناغیللاری قاری ننه‌لرین دیلیندن ائشیتمیشیک. اونلار دونیانین گردیشینی گؤروب، آیلاری ایللری یوروب گلمیشلر. اصلینده اونلار دونیانی و بوتون اینانیشلاری ناغیل شکلینده دئمه‌یی اؤیرنیب ناغیل شکلینده بیزلره پای وئرمیشلر.

قاری ننه‌نین ناغیللاریندان بیری بئله‌دیر: دَوه‌لر بؤیوک چیلله‌ده، هاوانین لاپ سویوق چاغیندا قیزیب جوتله‌شرلر. بیر ایل، قیش چوخ یوموشاق کئچیر و قاری‌نین دوه‌لری قیزمیر. قاری تانریدان چیلله‌نین اون گون داها اوزانماسینی ایسته‌ییر و تانری اون گون تامام قار یاغدیریر و قاری‌نین دوه‌لری قیزیب جوتله‌شیر. اونا گؤره، کیچیک چیلله‌دن سونراکی اون گونه قاری چیلله‌سی دئییلیر. چونکو او اون گونون سویوقلوغونا قاری سبب اولموشدور.

گؤردویونوز کیمی قاریلار یارادیب سؤیله‌دیکلری ناغیللارین اساس روللارینی اؤزلرینه گؤتوروب هر نه‌یین یاراتما فخرینی اؤز آدلارینا یازیبلار. ناغیلا اویغون زامان، قیشین سویوق گونلری و پاییزین اوزون گئجه‌لری ایدی. بئله زامانلاردا، یئرده گؤیده دورمایان اوشاقلار اوشویوب اوجاق باشینا سیغیناردی و قاریلار فورصتی الدن وئرمه‌ییب اونلارا ناغیل دئیردی. یوخوسو گلن اوشاقلار یاتماسینلار دئیه، قاری ننه اونلارا قارپیز وعده‌سی وئریب دئیردی: اوشاقلار یاتمایین، قاری ائششگی گئدیب قارپیز گتیرسین. قارپیز یئسز اوشومزسیز. آخی قارپوز قارلاری پوزان مئیوه‌دیر. چیلله‌نین اوزون و سویوق گئجه‌سینی سیندیران مئیوه‌دیر. ائله اونا گؤره، هله ده قاری ائششگی قاپیزا گئدیب مثلی دیلیمزده یاشاماقدادیر.

قاریلار قیشین دا اساس کاراکتئرینی اؤزلرینه گؤتورب، اؤزلرینی قاری آدلاندیریبلار کی قاری یاغدیرماق و قاری یاراتماق افتخاری دا اونلارین اولسون. قاری، قیش و سویوق هاوانی چوخ سئویر چونکو قیش اولماسا اوشاقلار سویوقدان ائوه تپیلیب ناغیل دینله‌مزلر و قاری ننه‌لر سسسیز و کیمسه سیز قالارلار.

دونیانین گردیشینی یوزوب-یوران قاری ننه‌لرین ناغیللارینا گؤره، گؤیلرده بیر قاری اوتوروب، او قاری هردن گونشی دوستاغا سالار. اونون اوزون آغ ساچلاری تامام گؤیلری سارار و هر زامان ساچلارینی سیلکه‌له‌سه قار یاغار. قار قاری‌نین آغ ساچلاریندان تؤکولن توزدور. او زاواللی قاری دورمادان، دایانمادان، آمان وئرمه‌دن یاغدیرار قاری. قار آلتیندا دونوب اؤلمک قورخوسو حئیوانلار و بیتگیلری تهدید ائدر. دونیا سونا چاتیب قیامت قوپار سانکی. حئیوانلار دره‌لر، کؤهوللر و تورپاق آلتیندا سیغینارلار. تکجه مئیداندا بیر قورد اولایار بیر ده قاری قالار. قوردجان یاشاماق، قوردلا قیامت قالماق و قار- قیامت مثللری ائله اوردان دوغموشدور. قورد اوجا داغلارین ذیروه‌سینه قالخیب یئرده اولوب کئچنی آی تانریسینا راپور وئرر. تانریلار مجلیسی قورولار. گؤی تانریدان قوردا تکلیف گلر: قاری حددینی آشدی تانریلارین صبری داشدی. اونو یئییب گونشی آزاد ائتمه‌لیسن. چونکو سن قورتاریجی بیری سن.قاری ننه‌لر ائله بورداجا ناغیلی یاریمچیق قویوب «بالالار گئدین یاتین» دئیردیلر. هر زامان سوروشانداکی ناغیل هارا چاتدی ننه؟ قورد قارینی یئدیمی؟ دئیردیلر: او گوندن بری قورد قارییا یئریکله‌ییر آما هله اونو تاپیب یئمه‌ییبدی.

سونرا بایرام اولوردو بالالار بیلیردی قورد قارینی یئدی، قار کسیلدی، قیش قورتاردی و اونلار سویوق الیندن ائوه تپیلیب قوجا قاریلارین ناغیللارین ائشیتمه‌یه مجبور دئییلر هادی قاچین آزاد هاوادا اویناماغا. قورد هامینی بؤیوک فلاکتدن قورتاریر. آما قیشین بیتمه‌سی، بایرامین گلمه‌سی و گونشین آزادلیق خبرینی ائلیمیزه وئرمک افتخاری قوردا قیسمت اولمادی. بو ایشی ساری- قیرمیزی توکلو بیر تکه گؤردو، آخی اونون توکلری گونش رنگینده ایدی و یئم یئمه‌یه اوجا داغلارا دیرمانمیشدی و داغلارین آردیندان گونشین دوغماسینی گؤرموشدو. قورد هله ده تکه‌دن آجیقلیدیر و اونون اوچ بالاسینی یئمه‌یه نقشه چکیر. تکه گونشین آزادلیق خبرینی گتیردی. او گوندن بری هر ایل بایراما ایگیرمی گون قالان تکمچی‌لر شهرلریمیزده تکم اوینادیب گونشین آزادلیق خبرینی و بایرامین گلمه‌سینی بیزلره ارمغان ائدیرلر.