بیر هفته یه یاخین ایدی توتولموشدو. بیر هفته ایچینده نه گلن وار ایدی نه ده گئدن. هر قالدیغی یئر قاپ قارانلیق ایدی. بیر هفته بویونجا تک باشینا ساعاتلارجا بئینینده دوشونجه لر گلیب گئدیردی. زامانی اؤلدورمک اوچون اوزون اوزون یازیلار و بیلدیریلر یازیردی خیالیندا. کیمسه اونونلا دانیشمیردی. اونا یئمک گتیرن مامور بئله اوزونه باخمیردی. سلولوندا هردن بیر ائشیکدن باغیرما سسلری گلیردی. بو اونون ایلک توتولماسی دئییلدی. داها اؤنجه لری دا آیلارجا توتوقلو قالمیشدی.

بیر هفته سونرا سورغو مامورو گلدی. اؤنجه گؤزتجیسی ایچری گیریب اونون گؤزلرینی باغلادی و باشقا بیر اوتاغا آپاردی. سورغو مامورونون سسیندن اوزونون دووارا ساری اولدوغونو آنلادی. آدینی و سوی آدینی فارسجا سوروشدو. لهجه سیندن ایصفهانلی اولدوغونو آنلاشیلیردی. سونرا یئنه فارسجا ندن اونا آلپر دئدیکلرینی سوروشدو. - بیر انگیلسین اینگیلیز آدی وار. بیر عربین عربجه آدی. من ده تورکم. آدیمین تورکجه اولماسین ایسته دیم. - بیلیرسن سنی نییه بورایا گتیرمیشیک؟

- سیز گتیریبسیز مندن سوروشوسان؟ - سن و بیر نئچه دوستون نییه او ائوده توپلانمیشدینیز؟ ایستیردیز نظامین و اؤلکه نین علیهینه نه ایش گؤره سینیز؟ - بیز آنا دیلی اوچون اورایا توپلانمیشدیق. منیم آنا دیلیمی ایسته مم بو نیظامی و اؤلکه نی خطره سالیرسا دئمک سیز هئچ زامان آماندا اولمایاجاقسینیز. چونکو بیز آنادیلیمیزدن ال چکمه یه جه ییک. -آنا دیلی دئییه توتدوروبسونوز. بیر اؤلکه نین بیر دیلی اولار و بو تورپاقلارین دیلی فارسی دیر. - منی سورغولادیغین تورپاقلار اوچون آتا بابالاریم ساواشیبدیر. منی اؤز وطنیمده سورغولایابیلمزسن. فارسی هئچ زامان بو تورپاقلارین دیلی اولماییب. بو دیل بو جغرافیا ایله یابانجی دیر.

سورغو مامورو آلپرین سؤزلرینه جواب تاپمایینجا بئله دئدی:

- اصلن منیم فارسی و تورکجه یه ایشیم یوخ. من نیظامین بقاسی اوچون چالیشیرام. و سیزین ایشلر بو بقایا خطرلیدیر. - نظامین بقاسی منیم دیلیمی و وطنیمی یوخ ائتمک ایله وار اولاجاقسا او چوخ اوزون یاشاماز.
سورغو مامورو حیرصلی بیر شکیلده پرونده نی الینه آلیب و اوتاقدان چیخدی.
آلپر یاواشجا گولومسه دی و داها بونلاری باشلانقیچ، سیز مزدورلار بیرگون وطنیمیزدن ده چیخیب گئده جگسینیز دئدی اؤز اؤزونه.