آناسی قاراشین ساچلارینی داراییب، هؤرۆردۆ. بو گۆن سارای قیزیمیزا ان گؤزل گۆنلردن بیری ایدی. نئچه آی لار اؤنجه دن آناسی بو گۆنۆن وعده سین اونا وئرمیشدی.

او چیلله گئجه سین هر ایل صبیرسیزلیک له گؤزله یر؛ قیشی چوخ سئون قیزیمیز بیلیردی کی بو گئجه دن سونرا قیش باشلاییر.

سحر یوخودان دوروب، پنجره نین قاباغیندا اوتوروب، آتاسین گؤزله ییردی.

گؤزل قارلی هاوا ایدی...هر بیر یئر آغ رنگ ایله بزن میش دی. آناسی اونا اؤیرتمیشدی کی قار، الله-ین گؤزل وئردیک لریندن بیریسی دیر.
حیطه چیخیب، قاپ-قارا ساچلاری نا نارین قارین دوشمه سی گؤزل لیگینه آرتیریردی. آناسی نین سسینی ائشیدیب ایچری قاییتدی و اونا یاردیم ائتدی.

خیردا قیزیمیز نارلاری دنله ییب، ائولرینی ییغ یغیش ائله یب، سویوق هاوالارین درمانی اولان چایی دمله ییب حاضیرلادی.

آخشام اولموشدو، بؤیۆک آتاسی ایلا بؤیۆک آناسی دا گلمیش ایدیلر... ساهاتا باخا-باخا بؤیۆک آتاسی نین کئچمیش ناغیل لارینا قولاق آسیردی.

کۆرسۆ باشیندا هامی بیر یئرده، ائشیک ده-ده قار نه یامان یاغیردی!

ایندیلیک تکجه آتاسینین یئری بوش ایدی...

اما یاواش- یاواش، زامان گئچدیک جه، گئجیه یاخین لاشدیقجا او کۆرسۆنۆن ایستی لیگین، او گؤزللیک لری، شاختا آرادان آپاریردی.

اۆزۆنده نئچه دامجی یاش حیس ائله ییب گؤزلرین آچدی... آناسی نین گؤز یاشلاری او سویوق هاوادا اۆزۆنده بوز باغلاییردی.

یاناق لاری سویوق دان نار تکی قیزارمیش ایدی، بارماق لاری دونوردو؛ آتاسینین یئرینه، سیزاق-سیزاق، شاختا گلیردی چادیرلارینا.

ایندیلیک سارای، نه قیش گؤزله ییردی، نه آتاسین... بوگون، نه قیش دا او گؤزل لیک قالمیش ایدی، نه چیلله ده او چیلله لیک...

زلزله دن اونا قالان، تکجه آناسی نین یارالی باغری ایدی.