یاشی یئتمیشی کئچمیشدی. دوزنلی بیر اینساندی. زامانیندا هر یئره یئتیمشیه چالیشاردی. حیاتی بویونجا یازی و پوزرو ایله مشغول اولموشدو. او جانلی و یئرین بیر تاریخ ایدی. خلقینین تاریخینی و کئچمیشینی یئنیدن یازیردی. اونلارین میللی کیملیگینی يئنیدن دیریلدیردی. هر گون شبیستردن تبریزه یولا چیخیب اورادا تورک دیلی و تاریخی کیلاسلاری قوروردو.

ائو ائو گزیردی و آزربایجان تاریخینی آنلادیردی. تاریخی بابک قالاسینا یوروشلرینین ایده سینی وئرمیش و اؤزو ده ایلک ایللرده قاتیلمیشدی. میللی حرکتین آرتیق ادبیات و شئعرین دیشینا جیخیب سیاسی و اؤرگوتلو اولماسینین اؤنونو آچمیشدی.

او روحوندا هله ده آزربایجان میللی حؤکومتینن ایزلرینی داشیییردی. هر زامان تبریزه گلدیگی زامان گولیستان باغیندان کئچرکن فریدون ایبراهیمی نین اورادان دار آغاجیندان اونا باخدیغینی دوشونوب اوزگون شکیلده آددیملاردی اورایی. فیرقه ایله بیرگه بؤیوموشدو. فیرقه نین گنجلیک قولاریندا چالیشیب سورگون حیاتی یاشامیشدی. سیبری نین سویوغو سوموکلرینه ایشلمیشدی. اوتوز ایل سونرا وطنه گئری دؤندوگو زامان دا دؤرد ایل حبسده قالمیشدی. اوزون و چتین حیات اونو هئچ بیر زامان یورمادی. وطن عشقی ایله یاشادی. و سن اوسان من ده بویام شئعری ایله تورک میللی کیملیگینده یئنی بیر جیغیر آچدی.

سویوق بیر قیش آخشامی حیاتا وداع ائتدی. کیمسه بیلمه دی او گئجه نلر اولدوغونو. بدنین ده یارا ایزلری وار ایدی. هانسی گوجلری اونو بیزدن آلدی کیسمه بیلمه دی هئچ بیر زامان. شبیسترین کیریشچی عائله سیندن دوغولوب شوروی ده عراقدا ایللرجه سورگون حیاتی یاشایان محمد تقی زهتابی ییرمی بیر ایل اؤنجه بیزی ترک ائتدی. و بیزه وطنیمیز آزربایجانی قورماق اوچون فیکیرلر بوراخدی میراث اولاراق.