یازار و مدنی فعال محمد رحمانیفر آمریکانین سسینه مصاحیبه‌ده ایرانین ۱۱-جی پارلامئنت سئچکیلری عرفه‌سین‌ده اؤلکه‌ده‌کی اقتصادی و سیاسی آتموسفئری دیرلندیریب.

«بو ایل دوروم بیر آز فرق‌لی‌دیر. نویابر حادثه‌لرین‌ده چوخ اینسانین قانی تؤکول‌دو. بیر چوخ اینسان حبس‌ده‌دیر. بون‌دان علاوه اهالی گؤرور کی، سس وئرمکله بیر نتیجه الده ائتمیر. هر جوره‌سینی سیناییبلار کی، بیر یول تاپ‌سینلار. اما چیخمازا توش گلیبلر،» رحمانیفر دئییر.

بو حاکمیت بیرینین نامیزدلیینی قیدیات‌دان کئچیررسه، امین‌دیر کی، او شخص گئدیب تهران‌دا پارلامئنت‌ده اوتوران‌دا، ائله تهرانین سؤزونو دئیه‌جک‌دیر.
اؤلکه‌نین اقتصادی وضعیتینه دقت چکه‌ن مدنی فعال «یوخسوللارین فلاکت ایچین‌ده یاشادیغینی، اورتا صینیف ایران‌لیلارین ایسه گونو گون‌دن یوخسوللاشدیغینی» وورغولاییر:

«ایندی آرتیق اوللر کیمی دئییل کی، دئیک بیر طبقه یوخسول‌دور و ساده‌جه او طبقه چتین‌لیک چکیر. بو میللتین باشینا ائله اویونلار گلیب کی، بونلار گونو گون‌دن اقتصادی باخیم‌دان گئرییه گئدیرلر. بوتون طبقه‌لر گئرییه گئدیر. اورتا طبقه گونو گون‌دن یوخسوللاشیر، دورومو پیسلشیر. یوخسول طبقه ده کی، اونسوز دا فلاکت ایچین‌ده یاشاییر.»

او، ایران‌دا «یوخسوللوغون دا خالقلار و صینیفلر آراسین‌دا عدالت‌لی بیر شکیل‌ده پایلانمادیغینی» ایفاده ائدیر.

«یوخسوللوق دا عدالت‌لی بیر شکیل‌ده پایلانماییب. بعضی ویلایتلر و شهرلر وار کی، یوخسوللوق بیراز داها آز اؤزونو گؤستریر. اما مثلاً تورک، کورد، بلوچ و عرب بؤلگه‌لره، یعنی کنار ویلایتلره گلن‌ده اؤزونو داها چوخ گؤستریر. بیر طرف‌دن ده گؤروروک کی، بیر دسته حاکمیته باغلی‌دیر، یوکسک سوییه‌لی رسمیلره باغلی‌دیر. اونلار ایران اهالی‌سینین کیچیک فایزی‌دیر کی، بوگون یوخسول‌لوغو چوخ حس ائتمیرلر. چونکی، حاکمیتین رنتاسین‌دان یارارلانیرلار،» او، سؤیلییر.

اورتا طبقه گونو گون‌دن یوخسوللاشیر، دورومو پیسلشیر. یوخسول طبقه ده کی، ذاتاً فلاکت ایچین‌ده یاشاییر.
محمد رحمانیفر اهالینین سئچکیلر یولو ایله وضعیتین دییشمیجیینی بیلدیینی اؤنه چکیر.

اونون سؤزلرینه گؤره، «میللت بون‌دان اوولکی سئچکیلره ده چوخ رغبت بسلمیین. حاکمیت تبلیغاتلا ائله گؤستریب کی، سانکی اهالی سس وئرمک اوچون جان آتیر و هامی صاندیق باشین‌دا نؤوبه‌یه دورور. من سون ۲۰ ایلده‌ن چوخ مدت عرضین‌ده بیر چوخ سئچکیلره شاهید اولموشام. ایکی-اوچ دؤور معین شرایط وار ایدی و اهالی معین سببلره گؤره صاندیق باشینا گئت‌دی. البته کی، نتیجه ده آلمادی. اونون خاریجین‌ده، دیگر سئچکیلرده ائله بیر ایشتیراک اولماییب. اهالی سس وئرمه‌یه جان آتماییب.»

تورک فعال علاوه ائدیر کی، «مجلیس و شورا سئچکیلرین‌ده طایفابازلیق اولور. یعنی هرکس اؤز طایفاسینا گؤره، اؤز قوهوم-اقراباسینا گؤره صاندیق باشینا گئده بیلیر... اما، باخان‌دا هئچ فرق ائتمیر کی، بو طایفانین آدامی چیخسین یا او طایفانینکی. نتیجه‌ده هئچ بیر فرق اولمایاجاق. بیر شخصین سئچیلمه‌سی حاکمیته تهلوکه اولمادیغی حال‌دا حاکمیت میدانی آچیق بوراخیر کی، اهالی صاندیق باشینا گئتسین. حاکمیتین دیسکورسونا یاخین اولمایان بیرینین سئچیلمه‌سینه اجازه وئریلمز. بو حاکمیت بیرینین نامیزدلیینی قیدیاتدان کئچیررسه، امین‌دیر کی، او شخص گئدیب تهران‌دا پارلامنت‌ده اوتوران‌دا، ائله تهرانین سؤزونو دئیه‌جک، تمثیل ائتدیی شهرین سؤزونو دئمه‌یه‌جک.»