اون دوققوز یاشیندا ایدی و ایلک دفعه عائله سیندن اوزاق بیر شهره اوخوماق اوچون گئتمیشدی. ایلک قوربت گونلری چتین ایدی. آما اؤزوه فیکیرداشلار تاپدیقجا غریبلیک دویغوسو آزالیردی. ایکی یولداش تاپدی و بیرلیکده بیر ائوه چیخدیلار. ائو دئدیگین ساده جه بیر اوتاق ایدی. یان یانا یاتاقلارین سالیب یاتیردیلار. ائوده هرکس ائولریندن گتیردیگی کاستلری چالیردی. آراز ائلسس ماهنیلاری و سحرین کدرلی شئعر اوخوماسی هر زامان ائوین موزیکی هاواسین اولوشدوروردو. اوغلانین ان سئودیگی ماهنی ساحیلی ساخلایین عاغیللیلارا من گئتدیم دنیزه دنیزده باتام ایدی.

یاواش یاواش بیلیم یورددا باشقا فیکیرداشلار دا تاپدیلار. گون کئچدیکجه بؤیودولر. سولدوز، قوشاچای، اورمو، موغان، تبریز، خوی، اردبیل و زنگان ... آزربایجانین هر طرفیندن بیریسی وار ایدی ییغوالاریندا. اوخودوقلاری شهر تورک شهری اولسا دا بیر چوخ گنج فارسجا دانیشیردی. اوغلان و یولداشلاری بو دورومو هئچ خوشلامیردیلار. اونون اوچون بیر ایش گؤرمک ایستیردیلر.

ایلک ایش اولاراق دوستلاریندان بیریسینین آتاسی وفات ائتدیگی زامان اونا تورکجه باش ساغلیغی اعلانی باسدیریب بیلیم یوردونون هر طرفینه آسدیلار. داها سونرا تورکجه درگی چیخاردیلار. و سون ایشلری ده تورکجه کیلاس قورماق ایدی. اوگون اوغلان چوخ هیجانلی ایدی. اوچ یولداش اولاراق باشلاتدیقلاری حرکت او گون اونلارجا اینسانین قاتیلیمی ایله تورکجه کیلاسی دولدوردولار. قیز و اوغلان آزربایجانین هر طرفیندن اؤیرنجیلر اورادا ایدی.

او آن اوغلان کیلاسدا لاپ سون سیرادا اوتوروب و کیلاسا باخدی. گؤزلری گولوردو و ایچینده بو شئعری اؤز اؤزونه اوخوردو:

ایستیرم سئودانی قانیما قاتام
ایستیرم واریمی یوخوما قاتام
دار پالتاردیر ایینیم ، جانیم سیخیر
ایستیرم اینیمی چیخاردام آتام
آی سئوگی یاییندان یاییلان اوخلار
آییقلیق سئویرم قویمایین یاتام
سیغماییر باغریما یاغیرتیلاریم
هاچاناجاق گره ک باغیرتی اوتام
ساحیلی ساخلایین عاغیللی لارا
من گئدیم دنیزدن دنیزه باتام