بو اؤیکو ۳ بؤلومده سونولور

(۱) ‌‌

پیلله‌لردن چیخا - چیخا ساختمانین دروازاسینا باخیرام. همیشه‌کی کیمی گئنه ده آچیقدی. آچار چیخارتماغا گرک یوخدور. کتومو ساغ قولومون اوستونه آتیب پارکینگده اولان ایشچیلرین یانیندان کئچیب آسانسورا ساری گئدیرم. آرخامجا ایکی ایشچی ده آسانسورا مینیرلر؛ اللرینده جعبه وار. هانسی قاتا گئده‌جکلرینی سورمورام؛ بیلیرم میکائیلین ائوینه گئدیرلر. بیرینجی قاتی وورورام؛ قاپی باغلانیر.

بیر‌ازادان، قاپی بیرداها آچیلینجا، قارشیدا میکائیلی گؤردوم. آسانسورون اؤنونده ایشچیلری گوزله‌ییردی. منی گؤرن کیمی اوزو گولدو:

- یورولما قارداشیم؛ ایشدن گلیرسن؟

چتینلک‌له دوداقلاریما قورو بیر تبسم قوندوروب باشیملا سؤزونو دوغرولادیم:

- هیم ...

میکائیل منی گؤرونجه چوخ هیجانلانمیشدی؛ سانکی اوزون بیر حسرتدن سونرا گؤروشوردوک. منه ساری گلیب دئدی:

- ائله بیل چوخ یورقونسان قارداش؛ ... گل! گل گئدک بیر قهوه ایچک؛ بیرآزدا ایله‌‌شک ...

- ساغول قارداش! ایشه قایتمالییام؛ قالسین سونرایا.

الینی کورییمه قویوب ائوه ساری یونلندیردی:

- یوخ؛ قالماسین سونرایا! گل ...

ایچری کئچریک. میکائیل همیشه‌کی کیمی "هاردا راحاتسان ایلش" دئدی.

من ده همیشه اولدوغو کیمی ایش اوتاغینا ساری یئریدیم. میکائیلین ائوی چوخ گئنیش و گوزل بیر ائو ایدی. ایش اوتاغی سا داها گوزل ایدی. بیر طرفی دنیزه باخان ایش اوتاغینین اورتاسیندا حالقا شکلینده بیر سیستم واریدی. اورتا سیندا ایکی صندل قویولموشدو. کتومو میز اوستونه بوراخیب صندللرین بیرینده اوتوردوم. صندلی بیر دؤور فیرلاداراق یازیلاری تئز - تئز دییشیلن، باشیمین اوستونده کی مانیتورلارا باخدیم. قاباغیمدا‌ کی مانیتورو آچدیم.

او... ه ... بیرآندا اوچ مین پیامین آلینماسینین تصدیقی گلدی. آردیجا آرد - آردا تشککور پیاملاری گلیردی ....

میکائیل قهوه‌لرله گلدی. قهوه‌لری میزین اوستونه قویوب بؤیرومده کی صندلده اوتوردو:

- بیلمیردیم بو ایشله ده ماراقلانیرسان!

باخیشیمی مانیتوردان آلیب میکائیله ساری دؤندوم. او، قاباغیندا کی مانیتوردا پیاملاری چئک ائتمه‌یه باشلامیشدی. پیاملارا باخارکن آرادا دا باشینی دؤندریب منه باخیردی.
میکائیل‌له یاشید ایدیق. من، اوندان بیرآز اوجا اولسام دا او داها جاوان گؤرونورردو .

اونون مانیتورندا کی یازیلاری آیدین گؤروم دئیه صندلیمی بیرآز داها اونا یاخینلاشدیردیم. "بونلارین هامیسی بوگونون دیر می؟ " دئیه سوروشدوم.

مانیتورون یاشیل بؤیوک دویمه‌سینی ووروب منه ساری دؤندو:

- هه!

- دوزدن یورولما!

میکائیل گولومسه‌یه‌رک فینحانی منه اوزالتدی. "یورولماماشیام" دئدی.

- آجی اولسون؟

باشیملا تصديقله‌دیم :

- هه؛ آجی اولسون!

فینجانی الیندن آلیب بیر قورتوم ایچدیم.

- منیم ایشیم سنین ایشین‌جن چتین دئییل؛ آنجاق هردن چوخ یورولورام. دوزدن سن چوخ گوجلوسن قارداش. قهوه‌سینه شکر تؤکه - تؤکه دئدی:

- اؤيله دئییل؛ هامیمیز بیلریک کی، سنین ایشین بيزيمكي‌لردن چوخ چتین دیر. .

سونرا مانیتورو گؤرسه‌درک آرتیردی:

- بو پیاملارا باخ ! منیم یورقونلوغومو آلان ائله بو تشککورلردیر. ....

قهوه‌نین هامیسینی بیر نفسه ایچیب دئدیم:

- سنجه منه ده بؤيله پیاملار گله بیلر؟

بیر - بیریمیزه باخیب دئدیییم سوزوه اوجادان گولدوک ...

ساعاتا باخیب "من گئتمه‌لییم "دئدیم.

میکائیل دا باشینی ترپتمکله راضیلشدیینی بیلدیردی.

قالخیب" قهوه اوچون چوخ تشککور!" دئدیم.

میکائیل دا یئریندن قالخدی:

- گلدییين اوچون ساغول. هر زامان واختین اولسا گل قهوه ایچک!

- گؤروشه‌ریک ....

ماشینی بیمارستانین حیطینده ساخلاییب ایچرییه ساری یئریدیم . هاوادا سازاق واریدی. نفسلر آغیزدان چیخاندا بوغلانیردی. قار قوخوسو گلیردی. اورژانسین قاباغیندا دایانیب بیر دفعه ده ساعاتا باخیرام. هله بیر- ایکی دقیقه واخت قالیر.

هاوا گئت - گئده سویوقلاشیردی.

قاپینین آغزیندا دایانیب اللریمی کتومون جیبلرینه قویدوم.

تلفونلا دانیشا - دانیشا قاپینی آچدی. اونونلا ایچری کئچدیم. چوخ اوجادان و حیرصلی دانیشیردی:

- دونن دئدیم او مارکادان نه وارسا بازاردا قالماسین. هر ایشی گرک اؤزوم دئیم، اؤزوم گورم؟! الان زنگ ائله هامیسی گلسین اورا. مریضخانادایام. بیر ساعاتا گلرم . ... یوخ؛ بیراز سینه‌م آغریییر . ...

ايكيميز ده آسانسورین قاباغیندا دایاندیق. قیرمیزی ایشیقلی نمره‌یه باخدیم. یئتیشمه‌یه بیر قات قالیردی. آسانسورین قاپیسی آچیلدی. اوچ نفر چیخدی. بیز ایکیمیزدن باشقا اوچ کیش داها آسانسورا کئچدی.دیققتله آیاغیندان باشیناجان باخدیم. آلچاق بویو، یوغون قارینی واریدی. اوقدر یوغون کی، او قارینی اولماسایدی بلکه بیر نفر داها بیزیمله اوسته چیخا بیلردی. «آردی وار»