هر طرفدن آغلاییش سسی گلیر، ییغین ییغین اینسانلار وار. تلویزیوندا نوحه باشدان آپاریب. ائوده دورابیلمیرم، کوچه یه چیخیرام، قونشونون دوواریندا یازیلی بیر پارچا گؤزومه تیکیلیر: شهادت جانگداز… مسجیدین مناره سیندن قالخان الله اکبر سسلری… یئنه ائوه سیغینیرام. بیلگی سایاریمدان جلیل ممد قولوزاده نین اؤلولر پیئسینی آچیرام و باشلایرام اوخومایا.

کئفلی ایسکندرین دانیشیغینا تاخیلیب قالیرام:
«آخ، آلله ین آلتیندا شیخ نصرالله کیمی منیم ده بیر علمیم اولسایدی کی، بورادا یاتان اؤلولر ایله دانیشا بیلیه یدیم… »

اؤلولر پییئسینده جلیل ممد قولو زاده خالقین ساوادسیزلیغینی، جاهیللیگینی و شیخلرین سؤزلرینه نئجه ایناندیقلارینی و شیخلرین ده میللتی نئجه سریدیکلرینی یازیر. شیخ اؤلولری دیریلدیگینی ادعا ائدیب و خالقی سویوب جاوان قیزلار ایله ده بیرلیکده اولوردو. خالقین گؤزو گؤرموردو . بو دورومدان راحاتسیز اولان و اعتراض ائدن اسکندری ایسه جاماعت دؤووردو.

جلیل ممد قلیزاده بو اثرینی ۱۱۰ ایل بوندان اؤنجه قلمه آلمیشدیر. کیتابی اوخورکن سون گونلرده یاشانان اولایلاری دوشونوب اؤز اؤزومه دئدیم؛ نئجه اولار بیر خالق ۱۱۰ ایله فیکری اولارق دئییشمز؟ سورون هاردادیر؟ بو خالق ندن بئله اولوبدور؟ بیر نفر اؤلدو و اونون اؤلومونده ۱۰۰ دن چوخ اینسان دا اؤلدو. کیمسه او یوز اینسانین آدینی بیلمه یه جک بئله. حتی هئچ بیر تلویزیون آدلارینی دئمه یه جک. ندن بیلیرسینیز چونکو شیخ بئله ایستیر.

هر چاغین اؤلولری واردیر. آما بیزیم چاغین اؤلولری دیری ایکن اؤلورلر.