سورقو: ایسلام و دموکراسی آنلاییشی اوزره نه دئمک ایسترسینیز؟

جواب: دئموکراسی و دین مسئله لری کئچمیشده غربده ده اولموش. غرب مسیحیتین زامانلا اویقونلاشمادیغی اورتا عصرلرده درک ائتمیش. بئله لیکله امتچیلییکدن ملت آنلاییشینا کئچمک عرفه سینده پروتئستان کلیساسی یارانمیش و مسیحیتده ده رئفورم ائدیلمگه باشلانمیش. ایسلامیتده ایسه هر هانکی دگیشیکلیگی ائتمگی مذهبی کسیم خلاف ایسلام و ایسلامیت قلمه آلدیغی اوچون ایسلام اؤزو سیاسی بیر دین اولماسینا باخمایاراق ایسلام بیر دین اینانجی اولاراق سیاستدن اوزاق توتولمازسا، مسلمان توپلوملار اوچون خوش گون اولمایاجاقدیر.

دئمک، دین و مذهب آنلاییشیندا دگیشیکلیگه یول وئرمک ایستمگنلر یاخشی گلجک و قانسیز و قاداسیز بیر توپلوم یاراتماق اوچون دین مسئله لرینی سیاسته دخیل ائتمکدن اوزاق دورمالیدیرلار.

دینی اینانجلار سیاسی هدفلره وسیله اولارکن انسانلارین اجتماعی بصیرتلری باغلاناراق حوری و غلمان منطقی ایله سیاسی مسئله لری گؤتور قوی ائتمک آنلاییشی اورتایا قویولار. بئله لیکله توپلومو نئجه خوشبخت یاشاتماق یئرینه "شهیدلیک" درسی توپلوما آشیلانماغا و انسان نئجه اؤلرسه شهید ساییلابیلر و بهشته یول تاپابیلر آنلاییشی توپلومدا چتینلیکلری حل ائتمک منطیقی نین یئرینه اوتورموش اولار.

اؤلومه داها آرتیق دوشونن انسانلار ایسه، موجود دوروم و وضعیتی درک ائتمکدن، توپلوم و اجتماعیتین چتینلیکلرینه حل یولو تاپماقدا عاجز اولارلار.