اوزوم زامان اولدو وطنین کوچه لرینده گزمه دیم. اوزون زامان اولدو سئوگیلیمی وطنیمده سئوه نمه دیم. اونو هر زامان وطندن اوزاقدا سئوه بیلیرم سون ایللرده. اوچ ایلده آرتیقدی وطنیم منه یاساقدی. اونو گؤرمک بئله منیم اوچون یاساقلانیبدیر. حبسیمی بئله وطنیمده ن اوزاقدان چکدیردیلر منه. سونرا دا سورگون گونلری. ایندی ایسه یئنی بیر پرونده و یئنی سوچلامالار. بعضن اؤز اؤزومه دوشونورم منیم سوچوم نه دیر دئیه؟ بو تورپاقلاردا دونیا گلمک می ؟ بو تورپاقلاردا وطنسیز یاشاماق می؟ عدالتسیز بیر توپلومدا یاشاماق می؟ یوخسا وطنسیزلیگه و عدالتسیزلیگه اعتراض ائتدیگیم اوچون مو؟ اویسا منیم اعتراضیم ییخماق و یاخماق ایله ایله یوخ ساده جه سازی ایله دیر. نده ن بو تورپاقلاردا یازیدان و قلمدن بو قدر قورخورلار کی؟

اوچ ایل حبسدن سونرا اوجقار بیر شهره سورگونه گئدرکن بونلاری دوشوندوم. اوتوبوس دا یول بویو شهرلره و اینسانلارا باخدیم. اللریمده کی قانداللارا باخان اینسانلارا ساده جه گولومسه دیم. هر کسین باخیشیندا بیر سوچ یازیردی منه. کیمسه نین باخیشیندا بو اینسانین سوچو یازماقدیر گؤره بیلمه دیم. اؤز اؤزومه دئدیم؛ بلکه ده بو جغرافیا نین سورونو دؤولتلردن چوخ بورادا یاشایان توپلوملارین حیاتا باخیشلاریندادیر.

یئنی بیر پرونده ایله یئنیدن سیزدن اوزاق قالاجایام سانکی. یئنه بایرامی وطنسیز و سئودیکلریمدن اوزاق. باهارین قوخوسون یئنه ایچیمه چکه بیلمه یه جم. بیلیرسینیز حبسخانا نین قوخوسو بوتون مئوسیملرده عئینیدیر.

سوچومو بیلیرم اصلینده اؤزوم. سوچوم منیم آزربایجان اولمامدیر. آخی آزربایجان دا یاساقدیر و حبسده دیر. آخی اونون دیلی ده یاساقدیر. اونون دا یازماسی یاساقدیر. آما من دونیایا گلدیگیم گوندن بری آزربایجانام.