کولتور، انسانین بیولوژیک اولاراق دئییل، سوسیال اولاراق قوشاق‌دان- قوشاغا کؤچوردویو مادی و مادی اولمایان اورون‌لرین (محصول‌لارین) بوتونودور.

گونلوک دیل‌ده "کولتورلو اولماق" بیلگی‌لی، گؤرگولو، نزاکت‌لی اولماق آنلامینا گلیر. کولتورلو آدام اویقارلیغین (مدنیت‌ین) نعمت‌لریندن بیلینج‌لی (شعورلو) اولاراق استفاده ائله‌ین ائییتیم‌لی (تحصیلات‌لی) آداما دئییلیر.

کولتور تئرمینی‌نی، گونوموزده‌کی معناسینا یاخینن بیر شکیلده ایلک دفعه ۱۷-نجی یوزایلده ساموئل وَن پوفئندورف قوللانمیش‌دیر. اونون دئدییینه گؤره، کولتور طبیعته قارشیت اولان و بللی بیر توپلومسال یاتاق ایچینده میدانا چیخان بوتون انسانی اثرلر‌دیر.

بیر توپلومون تاریخی سوره‌ج (رَوند) ایچینده ایجاد ائتدییی و قوشاق‌دان- قوشاغا گؤتوردویو هر نوع مادی و معنوی اؤزه‌ل‌لیک‌لرین هامی‌سینا کولتور دئییلیر. کولتور، بیر توپلومون (جامعه‌نین) کیم‌لیگینی یارادار و اونو باشقا توپلوم‌لاردان فرقلی قیلار. کولتور، توپلومون یاشاییش و دوشونوش طرزی‌دیر.

کولتور، عمومیت‌ده ایکی عنصردن اولوشور:
۱- مادی کولتور عنصرلری: بینالار، هر نوع آراج-گره‌ج (ابزار و تجهیزات)، گئییم‌لر و س...
۲- معنوی کولتور عنصرلری: اینانج‌لار، گله‌نک‌لر (سنت‌لر)، نورم‌لار (هنجارلار)، دوشونجه بیچیم‌لری و س...
کولتورون مادی و معنوی عنصرلری آراسیندا داواملی اولاراق بیر ائتکی‌لشیم (تعامل، قارشیلیقلی تاثیر) واردیر. بیرینده مئیدانا گلن بیر ده‌ییشیم او‌ بیرینی ده ائتکی‌لر. کولتور، توپلومون طبیعی چئوره‌سیندن، یعنی جغرافی شرایطیندن تاثیر آلیر. مثال اولاراق، داغ‌لیق بؤلگه‌لرده یاشایان توپلوم‌لارین کولتورو ‌ایله وئریم‌لی اووالاردا (دشت‌های حاصل‌خیز) یاشایان توپلوم‌لارین کولتورو بیری- بیریندن فرق‌لی‌دیر.

کولتور گؤره‌لی‌ (نسبی)دیر، یعنی هر توپلومون اؤزونه مخصوص کولتورو واردیر. کولتور تاریخ‌سل‌دیر، یعنی کئچمیش‌دن گونوموزه داوام ائتمکده‌دیر. کولتور دوراغان (ایستا، ثابت) دئییل، زامان ایچینده ده‌ییشر. مادی عنصرلر داها سرعت‌لی ده‌ییشر، آیریجا هر توپلوم‌دا کولتورل ده‌ییشیمین سرعتی بیری- بیریندن فرق‌لی‌دیر. کولتور انسان یاپیتی (اثری)دیر، انسان‌لار هم کولتورو اولوشدورورلار (ایجاد ائدیرلر)، هم ده کولتور‌دن تاثیرلنیرلر.