ـ ایگید عسگر مؤحکم دایان

ایللر اؤنجه ایبراهیم ساوالان، اورمو زیندانیندایکن، حاققیندا بیر یازی یازمیشدیم

او یازی‌نین چوخ یئرلرین خاطیرلاماسام دا... آنجاق یادیمدا قالان باشلیغی اؤز شئعری‌ایله باشلانیردی:
منی سسله‌ییر اۆچ کیشی

محمدامین، سونرا به‌ییم، ایزین وئرین سئودیییم قیزین آدین سؤیله‌مه‌ییم

سیزجه ایبراهیم ساوالانین سئودیگی قیز هانسی موتلو و بخته‌ور قیز اولا بیلر؟

ـ آنجاق من بئله دۆشونورم ایبراهیم‌ین سئودیگی قیز؛

"یوسوف حایال اوغلو" دئمیشکن:

مینیجیک بیر قیز واردی

بیر اورماندا یاشایاردی

قارانلیقدا ایتسه‌یدیک

الیمیزدن توتاردی

یئریدییی چیمنلرده

پاپاتییالار آچاردی

اوموزلاریندان گؤیرچینلر اوچاردی

اؤلدوردولر یاریم قالدی

دوداغیندا سون گۆلوجوک

یالنیزجا بیر آدی قالدی

قیزین آدی "اؤزگورلوک".

و ایبراهیم‌ین سئوگیلیسی کسینلیکله اؤزگورلوک‌دور.

او یازی‌نین آنی‌سیندان آیریلیرام

هر دؤنه سنی زیندانا گئتدیگینده یولا سالدیغیمیزدا دوداغینین قیراغینداکی گۆلوشله نه‌اولوب کی قاییدیرام دا بئش ـ اۆچ گۆنه دئدیگین کیمی، گئنه بئش ـ اۆچ گۆنه قاییتماغینی صبیرسیزجه‌سینه گؤزله‌ییریک، گؤزلریمیز دولو اولسا دا، اومودلا دؤنمه‌یینه اینانیریق آخی سن قرارلارینا تئز یئتیشن و وئردیگین سؤزو دۆز واختیندا توتان تکجه تانیدیغیم اینسانسان...

او اۆزدن سئوه‌نلرینی و ان اؤنملیسی سئوگیلین اولان اؤزگورلویو گؤزو یولدا قویما ـ تئز قاییت.