دئییرلر هارون الرشید بیرگون بهلولا "آللاهیزا شوکورلر ائدین کی من خلیفه‌ اولدوغومدا طاعون نوخوشلوغو آرادان گئتدی!"دئمیش، بهلول ایسه "آلله هئچ زامان ایکی بلانی بیر یئردن وئرمز!" دئیه، اونو یانیتلامیش. کئشکه بهلولون سؤزو دوز اولایدی و هئچ زامان هئچ بیر میللت بیر یئردن ایکی بلایا راست گلمه‌ییدی!

اؤلکه‌میزین لاپ بئله آغیر گون‌لرینده، کورونا ویروسو بیزیم میللتیمیز اوچون ایکینجی بلا ساییلا بیلر. ایندی، یالانچی، باجاریقسیز، دیل‌قانماز و سالدیرقان بیر حوکومتین دردی بیر یانا، دیل قانمایان و سالدیرقان کرونا ویروسون دا دردی بیر یانا! بئله بیر دورومدا بیر یاندان یازیق میللتیمیزی دوشونورم، بیر یاندان دوستاقداکی ساوونماسیز یولداش‌لاریمیزی، باشقا یاندان دا (!) تانینمیش میللی چالیشقانیمیز سایین ابراهیم ساوالان جناب‌لارینین بو آجیماسیز ویروسا بولاشماسی خبرینی! ایشین لاپ اوزوجو اوزو ده بوندادیر کی الیمدن ده اوزولمک‌دن باشقا بیر ایش گلمیر.

ایندی، بیر الدن ساوالانا اوزولورم، بیر الدن بختی قارا میللتیمیزه، بیر الدن ده (!) بئله بیر آغیر دورومدا کیفیر و چیرکین دوستاق‌لاردا قالان یولداش‌لاریمیزا. دوستاق‌لاردا بهداشت دئیه بیر زاد یوخدور. اورادا ساغلام آدام‌لار دا مین بیر نوخوشلوغا مبتلا اولورلار. هاردا قالسین کی، دیلیم لال، کورونا کیمی سالدیرقان بیر ویروس او جور یئرلره یول تاپا!

اومورام کورونا ویروسو تئزلیک‌له بیزیم یاخامیزدان ال چکه! بیلیرم کی، بو سؤزومه گؤره منی قینایا بیلرسینیز. بیلیرم کی، "بوگون مودئرن بیر دونیادا یاشاییریق، کورونانی آرادان آپارماق اوچون بیلیمسل ایشلملر ایره‌لی سوردورمه‌لیییک، دوعادان، آرزی‌دان و دیلک‌ن بیرزاد چیخماز!" دئیه‌جکسینیز. آنجاق، اونوتمایین کی بیز مودئرن دونیادا یاشاساق دا مودئرن دوشونجه‌لرله، مودئرن مدیریت‌له و مودئرن امکانات‌لا هئچ بیر ایلگیسی اولمایان بیر حوکومتین آخماقلیق‌لارینین اسیری‌ییک. بونا گؤره، منه حاق وئرین کی بئله بیر دورومدا ابراهیم یولداشیمیزا جان ساغلیغی آرزیلایام، دوستاقداکی یولداش‌لاریمیزا جان ساغلیغی آرزیلایام، میللتمیزه جان ساغلیغی آرزیلایام و حتی اونلار اوچون ال‌لریمی دوعایا قووزایام. دوعا ائتمک چاره‌سیز قالان اینسان‌لارین سون چاره‌سی‌دیر!