قار چیچگی باشین آچوب باهار گلیر بیزیم ائله

شاختالی قیش قویوب قاچوب باهارگلیربیزیم ائله

اسكی چاغ لاردان، یئنی ایلی قارشیلاماق #موغان_بؤلگه‌سینده اؤزل دب‌لرله کئچریلیر. کئچمیش دب‌لرین چوخو ایندی آرادان گئتسه ده تک- توک قیریلیب قالانی دا وار. بورادا بایرام آیینا عاید اولان اؤزل بیر قونودان (موضوع) دانیشماق ایستردیک و او دا هاناقوشو ایله باغلی اولان بیر قونودور.

کئچمیشده موغان ماحالیندا ال ایش‌لری، اؤزل‌لیکله توخوجولوق صنعتی ان چوخ دیرلی بیرصنعت ایمیش و بوتون جاماعات اؤزل‌لیکله خانيم‌لار، ایلین چوخ چاغین توخوجولوق ایله کئچیریب، بو یول ایله عائله اوچون گلیر الده ائدیرمیشلر.

موغاندا خالچا، فرش، قالی يا هانا توخوماق پاییز و قیشدا، چوخ اولارمیش و بو چاغ‌لار هر بیر آیدا هر بیر عاییله‌ده آزی بیر خالچا کسیلرمیش. خانیم‌لار قیشین آخیر خالچاسین ائله تنظیم‌لرمیشلر کی، بایراما اون- اون بئش گون قالمیش قورتارا چون هم ائوی واختیندا تمیزلیه‌لر هم ده بیر نئچه گون دینجه‌لیب، داها بایرامدان سونرا چؤل ایش‌لرینه حاضیرلاشالار.

بایرام آیندان بئش- اون گون کئچمیش آلاجهره آدلی بیر قوش «چیسدادا چیسدادا چیسدادا» سسیله اوخوماغا باشلاییر و بو قوش ایندی ده وار. بو قوشون گلمه‌سی و اوخوماسی خالچا یا هانا توخوجولاری اوچون بیر خبردارليق دير و اونو گؤستریر کی، بایراما بیر شئی قالماییب و واخت داریخیب. هاناسیندان چوخ قالان هر بیر کیمسه قونشو خانیم‌لاریندان ایمجی چاغیرار تا واختیندا هانا کسیله و هانانین قیرخینی بایرام گون‌لرینه کیمی سوپورولوب تمیزلنه. آلاجهره قوشو بونون اوچون ائل آراسیندا هاناقوشو دا آدلانیر.

کئچمیش چاغ‌لار، رادیو، تلویزیون، ساعات، ایل سایار (تقویم) و... اولماديغي اوچون، آلاجهره قوشونون چیخماسی و اوخوماسی بایرامین بیر خبرچیسی کیمی تانینیرمیش. آلاجهره «چيسدادا چيسدادا» اوخويان حالدا، هانا آرخاسيندا اوتوروب توخويان خانيم‌لار دا اونلا سس سسه وئریب دئيرميشلر؛

هاناسی يازا قالانين ديلي گوده اولار ديلی گوده اولار
جهره‌سی يازا قالانين ديلي گوده اولار ديلی گوده اولار