قادین ادبیاتی، ادبیات دونیاسیندا، اولدوقجا یئنی بیر قاورام‌دیر. ۱۹.جو یوزایل‌لییین اورتالاریندا ارکک ادبیاتچی‌لارین طرفیندن یارانمیش اولان بو قاورام هله ده بؤیوک-بؤیوک دارتیشمالارین سؤز قونوسو اولماقدادیر. کیمیسی اونو قادین‌لارین طرفیندن یارادیلمیش اولان ادبیات کیمی دوشونور؛ کیمیسی ایسه اونو قادین‌لار حاققیندا یازیلمیش اولان ادبیات کیمی گؤرور.

دده‌قورقود کیمی میفیک اثرلریمیزده قادین‌دان سؤز گئتسه ده، تورک و موغول دونیاسیندا، اسلامی قبول ائتدیکدن سونرا بئله، قادین‌لارین اؤنملی توپلومسال قونوم‌لارینا و حتی حوکومته چاتمالارینا باخمایاراق، کلاسیک ادبیاتیمیز "اسلامی-افلاطونی" دونیا گؤروشونون کؤلگه‌سی آلتیندا قالدیغینا گؤره آتاخاقان و ارککسل بیر ادبیات ساییلا بیلر.

بونا گؤره بیز کلاسیک ادبیاتیمیزدا، حتی کلاسیک قادین شاعیرلریمیزین اثرلرینده بئله، قادین سسینی دویماقدا چتینلیک چکیریک. چاغداش ادبیاتیمیزدا ایسه، بوللو-سوللو قادین ادبیاتچیمیزین وار اولدوغونا باخمایاراق، بو سس اولدوقجا گوجسوزدور. بونون دا آیری-آیری ندنلری اولا بیلر. آتاخاقان بیر تو‌‌‌‌پلومدا دوغولوب قاتی مذهبی باخیش‌لارین آغیر یوکو آلتیندا بویا-باشا چاتان قادین شاعیرلریمیز بیر یاندان قادین ادبیاتینین نه اولدوغونو تانیماغا ماجال تاپمامیش‌لار، باشقا یاندان دا یارادیجیلیغا باشلادیقلاریندا یاشادیق‌لاری توپلومدا او قدر حاقسیزلیق‌لار گؤرموشلر کی چوخلاری عؤمور بویو بیر ارکک کیمی او حاقسیزلیقلارلا اوغراشمالی و حتی ساواشمالی اولموشلار و بئله‌لیک‌له ده اؤز حاق‌لارینی ساوونماغا، اؤز سس‌لرینی چاتدیرماغا فورصت تاپمامیشدیرلار.
سون اون‌ایل‌لرده، نگار خیاوی، سوسن نواده رضی، رقیه کبیری، سحر خیاوی، ویدا حشمت... کیمی بیر سیرا قادین ادبیاتچی‌لار اؤز اثرلرینده قادین سسینی یوکسلتمه‌یه چابا گؤسترمیشلر، بیر-ایکی شاعیر ده قادین سسی ایله پورنوقرافینی بیر-بیریندن آییرد ائده بیلمه‌میشلر.

قادین ادبیاتی، گرکلی اولاراق، قادین‌لارین جینسل اورقان‌لاریندان یا اونلارین جینسل دویغولاریندان دانیشماق دئییل. حتی، داها تخصصی بیچیمده، قادین‌لارین یاشاییشیندان هابئله قادین‌لارین چتین‌لیک‌لریندن دانیشماق دا دئییل. بو باخیمدان، قادین ادبیاتی نه قادین‌لار یارادان ادبیات‌دیر، نه ده قادین‌لاردان دانیشان ادبیات. قادین ادبیاتی قادین سسی وئرن ادبیات‌دیر. قادین ادبیاتی قادین دویغولاری ایله، قادین احساساتی ایله، قادین ذهنیتی ایله، قادین سؤیلمی ایله یارانان ادبیات‌دیر.