بیر دنه فاغیر ویروس تاپمیسینیز، ساغ‌دان دا دؤشییرسینیز، سول‌دان دا. کوروناویروسو دئییرم... هامی اؤزونه ال قاتیب کی، آیه بو ویروس یامان‌دی، قویما گل‌دی...

دوشونوره‌م کی، بیز کوروناویروسا قارشی حؤرمت‌سیزلیک، قدیربیلمزلیک ائدیریک. چونکی بو ویروسون اونلارلا فایداسی وار، من بیر نئچه‌سینی سادالاییم، سیز ده باخین:

۱. کوروناویروس اؤز یومرو بده‌نی ایله عائله بودجه‌سینه میسیل‌سیز تؤهفه وئریر. مثلاً، بو ویروس یاییلان‌دان بری اوشاقلار چؤله چیخماق، استراحت مرکزلرینه، پارکلارا گئتمک، باهالی آتراکسیونلاردان ایستیفاده ائتمک ایستمیرلر و یاخود ایسته‌سه‌لر ده، «کورونااا، اولماز» دئییریک. گؤرون بو ویروس عائله بودجه‌سینه نه قدر فای‌دا وئریر. خصوصاً ایندی – دونیادا اقتصادی بحرانین گؤزلنیلدیی بیر واخت‌دا.

هله تویلارا، نیشانلارا، قندسین‌دیلارا، اوزوککئچدیلره، خینایاخ‌دیلارا، نووروز تؤره‌نلرینه قویولان قاداغالار سببین‌دن نه قدر قاباغا دوشدویوموزو دئمیرم.

۲. تحصیل موسسه‌لری باغلان‌دی. هم ده گؤرون نئجه، هان‌سی گونلرده... مینلرله والیدین معلملره ۸ مارت هدییه‌سی آلماق‌دان خلاص اولدو. بونا اوشاقلارین دیگر خرجلرینی ده علاوه ائتدیک‌ده اورتایا جدی مبلغ چیخیر. یعنی یوخ یئردن بو ویروسا گؤره آزی ۲۰۰-۳۰۰ مانات قاباق‌سیز. باخ، داها نه ایستییرسینیز؟

۳. کوروناویروس کیملری اؤلدورور؟ چوخ یاش‌لی، خسته، اؤلوم آیاغین‌دا اولان شخصلری. آ کیشی، سیز بیلیرسینیز بو خسته یاش‌لیلار اؤلکه‌یه نه قدر مادی زیان وورور؟ میلیونلارلا پئن‌سییا اؤدنیر ائ بونلارا. اؤلورلر، اؤزلرینین ده جانی دینجلیر بو اذیت‌لی عؤموردن. یعنی کوروناویروس نه ائتدیینی یاخشی بیلیر. اوندان چوخ بیلیرسینیز؟!

۴. بو ویروس یاییلان‌دان سونرا دونیادا آتموسفئر عمل‌لی-باش‌لی تمیزلنیب. بئله کی، چین‌ده آتموسفئره زهرلی گاز بوراخان بؤیوک زاوودلار، فابریکلر باغلانیب. نتیجه‌ده هاوا کیرلیلیین‌ده جدی آزالما مشاهیده اولونور.

۵. کوروناویروس یاییلان‌دان... یوخ، یوخ، یاییلماق یوخ، کوروناویروس دونیامیزا تشریف بویوران‌دان سونرا بیر چوخ حبسخانالارداکی محبوسلار آزاد ائدیلیب. معلومات اوچون دئییم کی، او مهبوسلار دؤولت حسابینا یاشاییرلار. بیر محبوسون حبسخاناداکی بیر گونو دؤولته خیلی خرج یوکلییر. کوروناویروس موبارک قدملرینی یئره باساندان سونرا خئیلی محبوس آزاد ائدیلدی و دؤولتلر اونلارین خرجینی چکمکدن خلاص اولدو.

بو، دونیامیزین چیلغین و توپپوش قوناغی کوروناویروسون فایدالارین‌دان ساده‌جه بیر نئچه‌سیدیر. آچیغی، قارداش قارداشا بو یاخشی‌لیغی ائتمز. باخ، کوروناویروس بون‌دان آرتیق سیزه نه ائتسین؟!

تکلیف ائدیره‌م کی، بون‌دان سونرا کوروناویروسا حساس یاناشاق، اونا قایغی، سئوگی گؤسته‌رک. ایراق اولسون، بیردن کوسوب گئدر، ائویمیز ییخیلار.

سیزه بیر سیرر آچین: اصلین‌ده، کوروناویروس بدخرج‌لییه قارشی آنتی‌ویروسدور. هر اؤلکه‌یه لازیم.