سورقو: افغانستانداکی اشرف غنی ایله عبدالله عبدالله نین هر ایکیسی نین اؤزلرینی جمهور باشقانی دئیه تانیتماقلاری اوزره نه دئیه بیلرسینیز؟

جاواب: افغانستان بیر ملوک الطفائفی، چوخ ائتنیکلی توپلوم و اجتماع اولدوغونا باخمایاراق دونیا بشریتی نین مملکت اداره ائتمک اوصولو اؤلچو و حدینده گلیشمیش و انکشاف ائتمیش دئییل! افغانستاندا ایکی دیل اؤلکه نین باشدان باشا (سراسری) رسمی دیللری و او بیری دیللر ده اؤز یئرلرینده و محلده رسمی اولماقلارینا باخمایاراق پشتون توپلومو ذهنیت باخیمدان افغانستانی پشتونلارین مملکتی قلمه آلار.

فارسچا دا افغانستاندا رسمی اولدوغو اوچون بو دوروم و وضعیتدن تاجیک و دری دیللیلر اندیشه کئچیرمگه و بو مسئله نین قارسینی آلماغا چالیشارلار. باشقا یاندان تاجیکلر افغانستاندا اولدوقچا داغینیق و نفوس باخیمیندان آز بیر بیچیمده و شکیلده یاشایارلار. مسئله بئله اولدوقدا عبدالله عبدالله تمثیل ائتدیگی تاجیکلر هزاره لری و اؤزبکلری اؤز یانینا آلماغا و پشتونلار علیهینه جبهه آچماغا و پشتون تمامیتچیلیگی دوشونجه سینی سیندیرماغا چالیشار. اصلینده تاجیکلر اؤزلری ده دئموکرات اولمادیقلاری اوچون هزاره و اؤزبکلری بو قارشی دورمادا بیر وسیله کیمی قوللانماغا و اؤز قدرتلرینی افغانستاندا تثبیت ائمگه چالیشارلار.

افغانستانداکی اؤزبکلر باشدا ژئنرال دوستوم اولماقلا تاجیک و هزاره لر ایله پشتون تمامیتچیلیگی علیهینه بیرلیکده جبهه اولوشدورارکن بیر سایدا اؤزبکلرین پشتولاری دستکلمه سی بو مسئله نی داها دا مرکب بیر دوروم و وضعیته گتیرمیش گؤرونر.

دئمک، افغانستانداکی ملی توپلوملاری تمثیل ائدن قبیله باشچیلاری عقلی باشلاریندا اولمازسالار، افغانستانی ائتنیک بیر ساواش گؤزلمک اوزره-دیر. بو مسئله دانیشیق و مدنی یول ایله اولارسا، افغانستان تورپاقلاری اوچ بؤلوگه بؤلونموش اولاجاق. مدنی بیچیمده و شراییطده بو مسئله حل اولمازسا، افغانستان بیر داها ایچ ساواشا سوروکلنمیش اولاجاق گؤرونر.