بیر آی اول بیز بیر کتاب نشر ائله‌دیک، بیز دئینده، 20 نفرلیک بیر اکیپدن صحبت گئدیر، بو کتاب «دده‌م قورقودون تورکمن‌صحرا کتابی‌»دیر.

کتابین اورژینال نسخه‌سی تورکمن‌صحرادا ساخلانیلدیغینا گؤره بو آد اونا وئریلیب، آما اصلینده کتاب بیزیم آذربایجاندا یازیلیب. بو کتاب ائله بو ایلین ایچینده کشف اولدو و علم عالمینده بؤیوک عکس صدالار اویاندیردی، تورکیه‌ده و باکیدا، هم ده ایراندا. بیز (ائلبیلیمی موسسه‌سی اولاراق) اونون اوستونده ایشله‌دیک.

بو کتابدان سانیرام هر کسین ائوینده بیر نسخه اولمالیدیر، چونکو بیزیم آنا کتابلاریمیزداندیر. بو کتاب قدیم حماسی ادبیاتیمیزین گؤزل نمونه‌سی‌دیر و صفوی دؤورونده یازیلمیشدیر، آنجاق کؤکو چوخ قدیم‌لره گئدیب دایانیر، سینه‌دن - سینه‌یه، آغیزدان - آغیزا گلیب صفوی دؤورونده یازییا آلینیب و سونرا قاجار دؤورونده ده اونون اوستوندن استنساخ ائدیلیب. محدود سایدا و چوخ نفیس بیر کیفیتده چیخیب و ایچینده کتابین اورژینال صفحه‌لریندن بیر نئچه‌سی‌نین ترانسکریپسیونو هم ده کتابداکی جغرافیانین خریطه‌لری وئریلمیشدیر.

کتابین اساس یازیچیلاری: دکتر جمال آیریمی، نیگار خانیم خیاوی، دکتر حسین فیض‌الهی وحید، مهندس ناصر ب.کریمی و من (علیرضا صرافی) دیر.

جناب دکتر حسین محمدزاده صدیق و جناب اسماعیل هادی ده عالی مشاورلریمیز اولموشلار. باشقا بؤلوملرده مسئولیتلی و چالیشان دوستلاریمیز: احد فرهمندی، دکتر سیامک ارگین افشار، دکتر ارشد نظری، اولکر تبریزی، دکتر توحید ملکزاده دیلمقانی، مهندس جعفر کیوانچهر، روح‌الله صاحب‌قلم، سوسن نواده‌رضی، شبنم توحیدی، عادل برازنده، علی برازنده، علی خالط‌آبادی، گونش امانی، نوید محمدی.

بو کتابی آلماق اوچون باخمییاراق کی، معتبر کتاب ساتیش مرکزلرینه گؤندریلیب، آنجاق بوگونکو شرایطده نه اولار توکانلارین آچاجاق و نه سیزین ائودن چیخماغینیز توصیه اولور، اونونچون بیزیم، آنلاین کتاب ساتیش مرکزینه #ائوده‌آل_سایتینا www.wvdeal.ir باش ووروب، سفارش وئریب قاپینیزدا تحویل آلا بیلرسینیز.