سوسیال شبکه‌لرده «بی پی آذربایجان» شیرکتینین ویتسه-پرزیدنتی زائور پاشایئوین لیفتین دویمه‌سینی آیاغی ایله باسماسی گؤرونتوسو یاییلیب.

آچیغی، بونونلا باغلی ویدئویا باخان‌دا تعجبلندیم. دئدیم، ائله معتبر پوست‌دا قرار توتموش آدام نیه بئله حرکت ائلسین آخی! سونرا اؤیرندیم کی، سن دئمه، کوروناویروسا گؤره اؤلکه‌ده الده‌ن ایستیفاده قاداغان ائدیلیبمیش. تئز آیاغی‌می آتدیم تلفنا، زنگ ائلدیم دوستوما کی، بس بئله بیر قاداغا وار، نه ائدجییک؟ او دا قاییتدی کی، واللاه بیلمیرم، حاضردا آیاغیم‌دا ایشیم وار، سونرا سنه زنگ ائد‌جه‌م.

ایندی اوتوروب قارا-قارا دوشونوره‌م. اما بیر طرف‌دن ده بونو ضروری حساب ائدیره‌م. آخی، معاصر اینسانین ایلک اجدادلاری آیاقلارین‌دان یاخشی ایستیفاده ائدیبلر، بیزیم اونلاردان نییمیز اسکیکدیر؟!

تعلیماتا عمل ائتمک لازیم‌دیر. بیر اؤلکه‌نین نفوذلو قورومونون رسمی‌سی لیفتی آیاقلا آچیرسا، دئمه‌لی، بیر بیلدیی وار دا. اونا گؤره ده خالق اولاراق آیاغیمیزی اینکیشاف ائتدیرمه‌لی، حتی هر ایکی‌سینی آمپوتاسییا ائتدیریب، چینیمیزه تیکدیرملیگیک. حیات‌دان ایکی آیاق‌لی یاپیشماق اوچون بونو ائتملیگیک.

کوروناویروس دؤورودور، تمیزلییه رعایت ائلمک لازیم‌دیر. اگر بی پی امکداشی لیفتی آیاغی ایله آچماسایدی، ایندییه هامیمیز الیمیزدن ایستیفاده ائدیب، کورونایا یولوخموشدوق.

حقیقتا، او، بو حرکتی ایله اوشاقلارا دا چوخ گؤزل نمونه اولدو. چوخ گومان کی، اونون آیاق‌قابی‌سینین آلتین‌دا کوروناویروس اولوب. اونا گؤره ده احتیاط‌لی اولمالی‌دیر. بیردن قونشولارین‌دان کیم‌سه او لیفتین دویمه‌سینی علی ایله باسیب ویروسا یولوخار، سونرا بو ویروسو زائور بیه ده کئچیرر. ایراق اولسون!

تکلیفیم بودور کی، باکی آیاق اونیورسیتئتی تاسیس ائدیلسین و دیرلی زائور بی ده اورا رکتور تعیین اولونسون. اینانین، تحصیلیمیز دونیایا عمل‌لی-باش‌لی آیاق آچار!

بایاق‌دان، دوغروسو، بو واختا قدر الیم‌دن ایستیفاده ائتدییمه گؤره ائله خجالت چکیرم کی! چوخ پئشمانام. اوشاق اولموشام، بیلممیشه‌م. من بیر ده غلط ائدره‌م، باشیمی باشا دؤیره‌م الی‌می نیه‌سه وورارام!

یئری گلمیشکه‌ن، ائله بو یازینی دا ایندیجه آیاغیملا یازدیم...