کرونا ویروسونون قورخسو بوتون شهرده، اؤلکه ده و دونیادا یاییلمیشدی. هامیا ائوینیزده اوتورون چاغیریسی گلیردی.

ائشیه چیخمایین دئییلیردی. اویسا او بیر ایل ایدی ایچرده ایدی. بیر ایل ایدی پنجره سیز یاشیردی. گونشی هر گون بیر ساعات دؤرد دووار آراسیندان گؤره بیلیردی. اوچ آی بویونجا سورغودا ایکن گونشی بئله گؤرمه میشدی. سون دوققوز آی زینداندا یاشاسا دا گونشی گؤره بیلدیگی اوچون موتلو ایدی. زینداندا اینساندان، سسیزلیکدن و کیتابخانادا اسکی و ایدولوژیک کیتابلاردان باشقا بیر شئی یوخدور. گونونو اونلار ایله باش ائتمه لیسن. نه بیلگی سایار وار، نه اینترنت، نه وای فای، نه تلگرام، نه ده اینستا... یاشادیغین سللول آرخاداشلارین سنین هر شئییندیر. گونون اون آلتی ساعاتینی اونلار ایله باش ائتمه لیسن. یوخسا زامان نئجه کئچر بو دؤرد دووار آراسیندا. زامانین چوخلوغو و بوشلوغو بوغار اینسانی بورادا. زینداندا بیر تک شئیین قاتیلی سن؛ زامانین. اونو نه قدر یاخشی اؤلدوررسن او قدر موتلو اولارسان.

بیر ده ایکی هفته ده حیات یولداشی و قیزینین اونو زیارت ائتمه سی موتلو ائدیردی. اون یاشیندا آیلا قیزی دونن اونو زیارت ائتمیشدی. آتاسینا ائوده اوتورماق دان داریخدیغینی دئییردی. آتاسی گولومسه دی.

- قیزیم ائوده اوتورماق گؤزلدیر. ایسته دیگینی اوخویا بیلیرسن، ایسته دیگینی یئیه بیلیرسن، ایسته دیگینه باخا بیلیرسن، چوخ داریخدین پنجردن ائشییه باخیب موتلو دا اولارسان. بونلارین ده یرینی بیل. چونکو بورادا اونلارین هئچ بیری یوخدور. اینسان دویومسوز بیر وارلیقدیر قیزیم. الینده اولدوقلارینین ده یرینی، اونلاری ایتیردیگی زامان آنلار. من سنین یئرینده اولمایی چوخ ایستردیم.