آنا صحیفه یازارلار |
هامینیز روح اکیزینیزی گؤزلیین، تک چارهنیز گؤزلهمکدیر
آرتیق کارانتینین، من نه بیلیم، نئچنجی گونوندییک. بیلیرم، بوتون گونو ائوده اوتورماقدان، چای ایچیب، یئمک یئییب، فیلمه باخیب، یاتماقدان، داها دوغروسو، یوخویا گئده بیلمهمکدن بئزمیسینیز. بس، بو فورصتدن ایستیفاده ائدیب یوخویا گئتمدیینیز بئله گئجهلردن بیرینده اؤزونوزله باش-باشا قالماغی یوخلامیسینیزمی؟ اؤزونوزو سورغو-سوالا توتموسونوزمو؟ اول گونده ۳ دفعه، کارانتین گونلرینده ۳-۴، حتی ۵ دفعه قیدالاندیغینیز بیر واختدا گئجه روحونوزو قیدالاندیرمیسینیزمی؟
منجه، علینیزده نه قدر فورصت وار، بیر گئجه آییرین اؤزونوزه. همین گئجه گؤزلرینیزی یوخ، روحونوزو دینلهندیرین. بوش اوتاغین بیر کونجونه قیسیلیب، دیزلرینیزی قوجاقلاییب دوشونون... دوشونون کی، سونونجو دفعه نه زامان حضورلو و خوشبخت اولموسونوز؟ عائلهنیزلهمی؟ یا اونلار دا بو گون دونیانین اذیت چکدیی خستهلییه یولوخسالار، یا دا عکسی، سیز یولوخسانیز، سیزه یاخین گلهجکلرمی؟
ایندی بعضیلرینیز دوشونورسونوز کی، نه عائله، منیم اوچون جانیندان کئچهن دوستلاریم وار. یوخلایین. زنگ ائدین بیر دوستونوزا، دئیین کی، "من کوروناویروسا یولوخموشام، گل منه کؤمک ائله"... نتیجه آشاغی-یوخاری بللیدیر. و او زامان آنلایاجاقسینیز کی، یالنیزسینیز. یالنیز... ائینهن دوغولان کؤرپهلر، یا دا اؤلنلر کیمی یالنیز...
یاخشی، بس، بو یالنیزیلیغی سیزینله کیم بؤلوشه بیلر؟ البته، یالنیز و یالنیز اؤزونوز. داها دوغروسو، روحونوز. اگر بیر موسیقیدن، بیر شئیردن و یا یاغیشین شیریلتیسیندان کؤورلیرسینیزسه، دئمک کی، سیزین سیزه همدهم اولا بیلهجک بیر روحونوز وار. بو حالدا بو پلانئتده یالنیز بئله اولسانیز، هر شئیین اؤهدهسیندن گلجکسینیز و ایناملا یاشایاجاقسینیز.
بیر اینسانین ان بؤیوک زنگینلیگی اؤز روحونو تانیماسیدیر. اؤز روحونو تانییان بیری ایسه هر زامان اؤز روح اکیزینی گؤزلیر. همین او گؤزلدیی مدتده اطرافیندا میلیونلارلا آدام اولسا بئله، گؤزلهیهن هر زامان یالنیزدیر. اؤز روح اکیزینی تاپان ایسه بوتؤو بیر دونیادیر. فرقی یوخدور گؤزلدیینین بدهنینین یاشی، میللیتی، ایرقی... چونکی روحون نه رنگی، نه ده یاشی وار.
هامینیز روح اکیزینیزی گؤزلیین، او، گلنه کیمی هامینیز یالنیزسینیز، تکسینیز، مزلومسونوز، زاواللیسینیز...تک چارهنیز گؤزلهمکدیر. گؤزلیین، روحونوز آسیمانا پرواز اولانا کیمی...
عشق ایله گؤزلیین، عشقده قالین.
بو دونیانی عشق خلاص ائدجک.
تاریخ
2020.04.09 / 19:47
|
مولف
اجمی اسدوللا
|