سولدوزدا سیلاحلی کورد دسته‌لرینین سولدوزو اله کئچیریب، قورماق ایسته‌دیکلری خیالی کوردوستانا قاتماق جان‌آتمالاری سولدوزلولارین جانلا، باشلا، قانلا سولدوز اوغروندا ساوشمالاری ایله بوشا چیخدی.

سولدوزا قیراقدان گلیب، بوراداکی آزلیق(اقلیت) کوردلری اؤزلرینه قوشان سیلاحلی کوردلر موللا حسنی گلندن سونرا قورخولاریندان داغلارا، آیری شهرلره قاچمیشدی‌لار.
سولدوزدا بعضی آل‌وئرچی، علاف و آغ‌ساققاللار سولدوزلولارا قارشی دئمکراتلا ایش‌بیرلیک ائدن، یا دا سوسماقلاریلا خیانت ائدن کوردلری سولدوزا قایتارماغا گئتمیشدیلر...
آرتیق سیرالار بللی اولموشدور. قارشی‌دورمالار تام گؤز قاباغیندایدی. سولچولارین گؤزلوک‌لری خالقی بئله گؤروردو: بیر طرف اؤزلری (کمونیست) ، او بیری طرف ایسه غیر کمونیست (خیردا بورژووا، فئودال ...)
انقیلابی‌لر ایسه: انقلابی – ضد انقلابی (ساواکی)
دولت، سولچولار، پان ایرانیست‌لر (میللی مذهبی‌لر ده)، تهراندان گلن طالقانی آداملاری، کوردلر... بو ساواشی کیچیلدیب‌ ـ‌ اورت‌ـ‌باسدیر ائتمک اوچون ایکی طایفا آراسیندا بیر ساواش کیمی مساله‌نی قلمه آلماقلا هر کس اؤز بالیغینی سودان توتماق ایسته‌ییردی.
دولت – «اؤلکه‌ده هله بیرلییک واردیر» ـ دئیه، مساله‌نی بیر جور اؤرت‌ـ‌باسدیر ائتمک ایسته‌دییی اوچون بوتون الده ائدیلمیش سندلری اؤزو ایله آلیب آپاردی. قزئت‌لرده یازیلمیش خبرلرده عمومی باخیش بئله ایدی. حتا نئچه ایل سونرا دا بو حاقدا جدی بیر کیتاب و مقاله یازماغی بئله خوشلامیردیلار. آما دمکرات حیزبی هر امکاندان، حتا بی‌بی‌سی فارسی تلویزیونوندان استفاده ائدیب هر ایل اؤزونو مظلوم کیمی گؤسترمه‌یه چالیشیردی.
بیزجه، بو سینیق قولداکی یارا دوز باغلانمامیشدی و اَیری بیته‌جکدی. بونون اَیری بیتمه‌مه‌سی اوچون بو اَیری بیتن قول سیندیریلیب، یئنیدن دوزگون باغلانمالیدی!

سولدوزلولارین اؤلوم ـ قالیم ساواشینین گیزلی مساله‌لری نه ایدی؟ هانسی مساله‌لر دولت و بعضی گروهلار طره‌فیندن گیزله‌دیلیردی؟

ایکی مقامی اونوتماق اولماز. بو ایکی مساله دولت، کوردوستان دموکرات حیزبی و باشقا گوج‌لر طره‌فیندن گیزله‌دیلیردی. بونلاردان بیری دمکرات حزبینین دفترلریندن تاپیلمیش جنگی نقشه‌لری و بعضی دستورلاری، ائله‌جه ده نالوسی عایله‌سین ائویندن قاسیملی‌نین تاپیلمیش دوستورونو تهران‌دان گلن هئیت اؤزو ایله آپاردی. قاسیملی‌نین دستوروندا بئله یازیلمیشدی: سولدوز شهری اله کئچندن سونرا قوشاچای‌ین تاتاوو چایی اوزرینده‌کی کؤرپو پارتلادیلمالیدیرکی، تبریزدن یاردیمچی قوشون سولدوزا گله بیلمه‌سین! (سن دئمه، بو قیریم قاباقکی قیریم دئییلدی، مساله تالانچی چته‌لرین تالانیندان چوخ فرقلی ایمیش!)
ایکینجی حادثه ایسه بو ایدی: سولدوزون فورودآباد محله‌سینده بیر نئچه قاریشیق (دورَگه) عایله یاشاییردی. (آدلارینی گتیرمک مصلحت دئییل). فروردینین 30-دا همین عایله‌لرین قاپی‌لاری قیرمیزی رنگ ایله بویانمیشدی! بونون سیررینی بیلمک اوچون دلیل اولمالی ایدی...
سونرالار همین عایله‌نین دمکرات حیزبینه قوشولان اوغلو گلیب توّاب اولور. همین عایله‌نین قاپیسی قیرمیزی رنگله چوخ گومان بونا گؤره بویانا بیلردی کی، فوتبال میدانی میتینگی بیتندن سونرا گئجه تورکلری قیراجاقلاری زامان همین یاری کورد-یاری تورک عایله‌لر اؤلدورولمه‌سین!؟
بئله بیر احتیمالی ایره‌لی سورمک اوچون سولدوز تورکلرینین یاخشی دلیل‌لری وار ایدی. یعنی یاشادیق‌لاری تجربه‌لر و دیل‌لر ازبری و آتا سؤزو کیمی قولاقلاردا سیرغا اولان بیر نئچه سؤز وار ایدی:

کوردون چؤره‌ییی دیزی اوستونده اولار. ائرمنی‌نین ائوینده یات آما چؤره‌یینی یئمه، سنی زهرله‌در. کوردون چؤره‌یینی یئ، آما ائوینده یاتما کی، گئجه دوروب باشینی کسر!

بئله بیر دوشونجه ایله مساله‌یه یاناشاندا بو قاپی‌لارین قیرمیزی رنگله بویانماسینین سیرری آچیلمازمی؟
اگر فوتبال میدانینا یاپیشیق ائوده فیلانکسین اَلیندن قورخودان بیلمه‌دن آچیلان گولـله بیردن آچیلماسایدی، او گئجه نه اولا بیلردی؟؟؟ سیزجه، سونرالار ائرمنیلر طره‌فیندن تؤره‌دیلمیش «خوجالی سوی‌قیریمی» کیمی بیر اوخشار سوی‌قیریم دا تورکلری گؤزله‌یه بیلمزدیمی؟!
تهرانداکی، قندیلده‌کی، عراقداکی و اقلیمده‌کی نه جور دوشونورسه، دوشونسون، بیز عاغلیمیزی اونلارین الینه وئره بیلریکمی؟!
آخی هر زامان دوستلوق الینی اوزالتمیشیق، مینلرجه جانیمیز، کیلومئترلرجه توپراغیمیز الدن گئدیب!

دده قورقود دئمیکشن:

قاری دوشمندن دوست اولماز!