99جو ایل‌دن ۳۳۷ گون داها قالیر.

اول‌لر کورونا ایله مرتبط چالیشان بیر ایکی کانالدا عضو ایدیم، لازیم اولان بیلگی‌لری اوردان اؤیره‌نیردیم. بیر آی سونرا تلگرامدا بوتون گروه‌لار و کانال‌لار "کورونا نامه" اولونجا، هامیسندان چیخدیم.

بو گؤرونمز نحس ویروسون "ایت یئیه‌ن‌"لرین اؤلکه‌سیندن چیخیب گلیب بورالاردان باش چیخارتماسینا هئچ کس اینانمیردی. اوشاقلیغیمیزدان بری گؤز آچیب گؤردویوموز آدام‌لارین ایچینه، کوچه‌لریمیزه، ائولریمیزه، جیبیمیزده‌کی پول‌لارین، آغزیمیزاداکی تیکه‌‌نین آراسینا گیریب قاتیشماسینی هئچ بیریمیز یوخوسوندا دا گؤرمزدی.

کورونا ایله موباریزه ایکینجی فازا کئچیب، اول اول‌لر هامی شوخلوغا سالمیشدی، الکل‌لا مرتبط جوک‌لار جورلاییر، مجازی آلاندا نوغول نابات کیمی پایلاشیردیلار. ایندی بونلارین هامیسی دایاندیریلیب. کورونانین آددیم‌لاری داها اوجادان قولاغیمیزین دیبیندن گلیر.

بیر میوه‌چی‌دن "نه‌دن دای ماسک وورمورسان، الجک گئیمیرسن؟" دئیه سوروشدوم. جوابی چوخ مختصر ایدی: هاچاناجان قاچیم؟ به گؤزومو نه ایله توتوم؟ قارنیمی نمنه ایله دولدوروم