ایش‌لریمیز آنورمال‌ یول‌لاردان سونوجا چاتیرسا، نورم‌لاریمیزی یئنی‌دن گؤزدن کئچیرمه‌ییمیز گره‌کمه‌ییرمی گؤره‌سن؟

بعضن ایش‌لریمیزدن- داها دوغروسو اؤزوموزدن- اومدوغوموز، ایسته‌دیییمیز یا گؤزله‌دیییمیز سونوج‌لارا چاتمیریق یا دا لاپ ترسه سونوج‌لارلا قارشیلاشیریق.
بعضا قارپیز توخوموندان بادام آغاجی بیتمه‌سینی اوموروق، یا دا بامادور شیتیلیندن سوغان بئجرمه‌سینی.

گؤرورسن بیری مهندس‌لیک اوخویوب، چؤرکچی‌خانادا وردست ایشله‌ییر. یا او بیریسی درسینی زورلا، لاپ نه‌وئریم نؤمره‌یله بیتیریب آما فیلان اداره‌ده دایی‌سی رئیس‌دیر، بو دا اونا معاون اولوبدور... معلیم‌دیر، موسافیرکئش‌لیق ائدیر، لاپ اعلا جراح‌دیر آپارتیمان سالدیریب ساتیر، یازیچی‌‌دیر سلمانی‌لیق ائدیر، یا رسسام‌دیر مولک دلال‌لیغینا باخیر... هله ایل‌لرجه مملکتین بودجه‌سی‌نی توکه‌ده‌رک درس اوخویوب، دوز- دوز گزن ایش‌سیزلری دئمیرم.

گؤره‌سن سورون باخیشیمیزین دوغرو اولماماسیندادیرمی، یوخسا ایش طرزیمیزده آخساق‌لیغیمیز وار، یا بلکه ده سئچدییمیز یانلیش یول‌دور بیزلری یولسوزلوغا سوروکله‌ین؟! یا بلکه ده اولا بیلسین کی، باخیشیمیز و طرزیمیزله سئچدیک‌لریمیزین آراسیندا اویوشمازلیق واردیر دا، بیز گؤرموروک یا دا گؤرمزدن گلیریک؟!

دوزدور کی بیزلر هامی‌‌میز تقللوب ائله‌مه‌یی مذموم بیلیریک، آما بیر چوخ واخت تقللوب ائدیب یاخشی نتیجه‌یه چاتمیشیق دا.‌ بس ندن‌دیر کی، تقللوبو یاخشی سونوجا چاتا بیلن بیر یول کیمی آراشدیرمیریق، یا باشقالارینا تانیتمیریق گؤره‌سن؟ یا مثلن یالان دانیشماغین پیس اولدوغونو بیله- بیله یالان دانیشاراق ایش‌لریمیزی یئرینه اوتورداندا، نیه یالان دانیشماغی بیر یول یؤندم کیمی اینجه‌لمه‌ییب اؤیره‌نمیریک یا دا اؤیره‌تمیریک؟ رشوه وئرمه‌یی، روشوه آلماغی، قانونو فیرلانماغی، جینس آنبار ائلمه‌یی، مادی قازانج اوچون قاداغان ایش‌لری یاسالایاراق قانونو (داها دوغروسو اؤزوموزو) ازیب کئچمه‌یی نیه بیر تعریفه سیغدیرمیریق، چرچیوه‌یه سالمیریق گؤره‌سن؟؟؟ ایش‌لریمیز آنورمال‌ یول‌لاردان سونوجا چاتیرسا، نورم‌لاریمیزی یئنی‌دن گؤزدن کئچیرمه‌ییمیز گره‌کمه‌ییر می گؤره‌سن؟

بو گون‌لر هامی‌نین هامی‌دان خبری وار. حتتا بیری‌- بیریمیزین لاپ کیچیک نؤکته‌لریمیزی ده بیلیریک یا دا بیلمک ایستیریک. بیلمه‌سک بیله، قورجالاییب تاپیریق. بو گون‌لر باشقالاری‌نین یاشام طرزی بیزی چوخ ماراقلاندیریر. بوتون فیکریمیز، دغدغه‌میز و گؤزوموز اؤزگه‌لرده‌‌دیر. بو بیر گئرچک‌دیر کی، بیزلر باشقالاری‌نین یاشامینی اؤز یاشامیمیزدان داها آرتیق قورجالاییریق. هئچ سوروشموروق بالام بس اؤزوموزدن نه خبر؟ بس نه عجب اؤزوموزو بؤیوتَج (ذره‌بین) آلتیندا قویوب اینجه‌له‌ییب قورجالامیریق؟ نئجه دئیرلر، اؤزگه گؤزونده چؤپو گؤرور، اؤز گؤزوموزده دیره‌یی بس ندن گؤرموروک آخی؟!

اؤز- اوزوموزله صداقتلی داورانارساق، و دوشوندوک‌لریمیزی دئییل، ائتدیک‌لریمیزی، گئرچکدن ائتدیک‌لریمیزی یازارساق، اولای‌لاری نئجه اولمالی‌دیرلار شکلینده دئییل، گئرچکدن نئجه کی وار، نئجه کی اولورلار کیمی کاغیذا کؤچورورسک... سیزجه نه کیمی بیر شئی سودان چیخار؟!

فیلان اداره‌یه گئدنده مقنعه اوستوندن چرشاب سال باشینا، بهمان رئیسی گوره‌جکسن‌سه آز-ماز ساققالین اولسون، او یئره گئدیرسن تر- تمیز گئیینمه، بو یئره گئدیرسن فوکول کراوات تاخ گئت... بئله یازما فیلانکسه ده‌یر، ائله دئمه بئهمان‌کسین قیلینجی‌نین قاشی دوشر... قاباغا کئچمه گیج دئیرلر، دالی‌یا قالما بیج دئیرلر...

دوغوردان بیز کیمی توولاییریق؟ نیه بیله- بیله توولانماق ایسته‌ییریک؟ بیزیم گئرچه‌ییمیز نه‌دیر؟ بیز ائتدیکلریمیزی‌می یازیریق یوخسا یازدیقلاریمیزی‌می ائدیریک؟.... نه یازیق کی هئچ بیری.

بیز اوخومادیق‌لاریمیزی، یازمادیق‌لاریمیزی، اؤیره‌نمه‌دیک‌لریمیزی عمل ائدیریک، و کیتاب‌لاردا، اوخول‌لاردا، بیلیم‌یوردلاردا ائلمه‌دیک‌لریمیزی، ائتمه‌یه‌جک‌لریمیزی اوخویوروق هر گون...

یعنی بیزده، نه ائتدیکلریمیز بیلدیک‌لریمیزله توتور، نه ده بیلدیک‌لریمیز ائتدیکلریمیزله! بئله گئدرسک گؤرن هارا چاتاجاغیق گله‌جکده؟...