مدرسه‌لرین آچیلماسینا بئش- آلتی گون قالیردی. من، بیرینجی صینیفا (به‌قول او زامان‌لار، کیلاس-ی اوله) گئده‌جاق ایدیم. آنام کیتاب‌لاریمی گؤزل- گؤیچک جیلیدلمیشدی. سورمه‌ای روپوشوم، اوستدن تاخما، آغ یاخاسی ایله پالتار آغاجینا تاخیلیب، گول‌میخدان آسلانیردی. یاستی دابان قارا باشماق، آغ ناسقی جوراب و قهوه‌ای رنگده توققالی کیفیم ده یئرده ایدی، گؤتور دوش یولا...

من بتر ذؤوق ائلیردیم، چیچک‌لریم چاتدیردی مدرسه‌یه گئتمک اوچون. اننه‌م (بیزیم‌له یاشایان بؤیوک ننه‌م) هر گون فارسی کیتابیمیزی آچیب، اورداکی عکس‌لرین ناغیلینی منه تعریفله‌یردی. عکس‌لرین بیرینده بیر خانیم یودوغو پالتارلاری له‌ین ایچینده گتیرمیشدی حیه‌طده شریته سرسین. دام‌دا بیر پیشیک دورموشدو او خانیما باخیردی. خانیم پالتارلاری سریب، چیخدی گئتدی ایشی‌نین دالیسیجا. شریته سریلن بیر خاماح بولوز وار ایدی، بولوزون ایپیندن بیز آزی سؤکولموش، هاوادا توولانیردی. دووار اوسته کئشیک چکن شیطان پیشیک یئنیب حیه‌طه بو ایپ ایله اویناییردی. ایپی هر چکدییینده، بولوزون بیر آزی سؤکولوب یئره دوشوردو. پیشیک ده شیرنیشیب گینه ایپی چکیردی! او قدر چکدی- چکدی بولوز یاری اولدو! خانیم گلیب شریت‌دن پالتارلاری گؤتورمک ایسته‌ینده الینی تعجبله بورنونون قاباغینا آپاریب دئدی: واخسئی! من بیلمیرم اننه‌م او خانیمین واخسئی دئدییینی هاردان چیخارتمیشدی. من کیلاسدا او درسی تعریف‌له‌ینده واخسئییی دئدییمده معلیم آز قالیردی تومانینا ایشه‌سین!

اننه فارسی کیتابیمیزی واراقلاییب منه اؤیرتمک ایسته‌ینده دئیردی:

-بالا بیز اممه‌ن‌جوزو اوخوموشوق، بولاردان باش تاپمیرام!

آما «آب بابا»-نی باشاراردی، منه ده او اؤیرتمیشدی. هم ده فارسجا بیردن اونا کیمی سایماغی منه اؤریره‌دیب، یازدیرمیشدی بیله‌مه. من اوندا اؤز آنا دیلیمده، تورکجه‌ مینه کیمی، مین‌دن ده چوخ سایا بیلردیم. آما فارسجا سایاندا یاغ یاندیریردیم.
بیر- ایکی گون مدرسه‌لرین آچیلماسینا قالمیش اننه منی قویدو قاباغینا گینه مدرسه آدابی اؤیرتدی:
-باخ بالاسی، سوروشاجاخلار ایسمین چیست؟ دئنه سوسن.

-یاخجی.

-سورا سوروشاجاخلار شؤهرتین چیست؟ اوندا دا دئنه نواده‌ی‌رضی.

- او دا یاخجی.

-سوروشسالار پیدر چیکاره‌دیر؟ دئنه داوافیروش.

-یاخجی دا اننه، نققده دیه‌جاخسان بولاری. سوت اَزبَر اولموشام.

-اوسسون بالاسی، اؤز دیلیمیز دئییل کی، کیریخاسان بارا قویاسان یار- یولداش یانیندا اوتاناسان.
-نیه اوتانیم آی اننه، منه هر نمنه اؤیرتمیسیز باشارمیشام دا. مگر اؤزون دئمه‌سن بو قیزا هر نه‌دئسن گؤیده وورار؟
-دی سؤزو اوزاتما، قولاق وئر گؤر نه دئییرم. سیجیللئت چیست ده سوروشسالار گینه دئنه نواده‌ی‌رضی. آلدین قولاغیوا؟
-هن اننه اؤرگشدیم. هامیسی قولاغیمدادی.

-ایندی دئ گؤروم ایسمین ندی؟
-سوسن.
-شؤهرتین چیست؟
-نواده‌رضی.
-سیجیللین ندی؟
-نواده‌رضی.
-آی برکانناه سنه. منیم هشو‌باشلی بالام، گون او ‌گون اولا دؤحتور اولاسان.
-من فارسیجان دؤحتور اولمیه‌جاغام اننه، ناخوش‌لار دیلیمی قانمازلار، گئدیب ترسه تَبنه داوا یئییب اؤلر هامیسی...
-هن بالا، حق سؤزه نه دئییم... دؤنرگه بئله دؤنمز همیشه، دونیانین قویروغو اوزوندی...
**
ایندی بیول مدرسه‌نین ایکینجی گونودور. مدرسه‌نی برک سئویرم. تای- توش‌لاریمی گؤروب سئوینیرم. خانیم سنجری‌‌دن ده خوشوم گلیب، یالاننان اؤزونو جیددی گؤرسه‌دیر بیز قورخاق، آما اصلینده مئهریبان‌دیر. کیلاسدا اوتورموشوق، هر نیمکت‌ده ایکی نفر. یانیمداکی سیسقا قیز دونن آغلادیغی کیمی، بو گون ده ایچینی چکیب سیتقایاراق آناسینی ایستیر. آدین سوروشورام، آدینی دئینده زیلیغی اوزانیر آخیر چنه‌سینه، اؤککه‌لریم گلیر آغزیما. دسمالیمی کیفیمدن چیخاردیب اوزونو سیلیب، جیققیلی مینانی دیله توتورام. اؤزگوونجیم (اعتماد به نفسیم) عالی درجه‌ده‌دیر... آتام- آنام هر نه تاپشیریبلار آلمیشام چینه‌دانیما، اننه‌م هرنمنه‌نی اؤرگه‌دیب، قولاغیمدادیر... هرزادی باشاریرام...
کیلاسین قاپیسی چالیندی،‌ معلمیمیز دئدی: "بچه‌ها برپا!" هامی بیردن قالخدیق آیاغا (بونو دونن اؤیرتمیشدیلر بیله‌میزه). قاپی آچیلدی، خانم مدیر، خانم ناظم، ایکی نفر اورتایاشلی کراوات‌لی کیشی، فرانسه مدیریمیز مادر روحانی- (مامئغ)-، و ایلک فرانسه معلمیمیز خواهر روحانی وَنسان (ماسؤغ) بیر به‌ بیر بویوردولار کیلاسا.

-بچه‌ها برجا!

داوامی وار