هامی ایله‌شدیک نیمکت‌لریمیزده. معلم، مدیر و آغالار بیرآز اؤز آرالاریندا قیر- قیر فارسجا قیریلدادیب گولومسوندولر، من هئچ نه باشا دوشمه‌دیم. فقط باش‌لارینی دبرتمکدن، ادا- اصول‌لاریندان بیلدیم کراوات‌لی کیشی‌لر بتر آدامدیلار! هئی «آقای بازرس، آقای بازرس» دئییردیلر او کیشی‌لره. آغالارین بیری بایقوشا بنزر گیم- گیرده گؤزلرینی کیلاسین اطرافیندا دولاندیردی- دولاندیردی، سونرا

هامیمیزی میزی- میزی گؤزدن کئچیرتدی. بیردن بایقوش گؤزلری منیم اوزه‌ریمده دایاندی. گؤزلرینی منه بره‌لدیب بیر شئی دئدی، سؤزون قانمادیم آنجاق قاش- گؤز اویناتماسیندان بیلدیم دئییر گل تخته‌سیاه قاباغینا.
دوروب شست‌اینن گئتدیم قاباغا. بتر اننه‌نیردیم اؤز عالمیمده؛ اَیین باشیم تر- تمیز، ساچ‌لاریم ساهمان، دوروشوغوم یئرینده، باشیم دیم-دیک. کیشی سوروشدو:

-اسمت چیه؟

انام اؤیرتمیشدی، تئز دئدیم:

-سوسن.

دئدی:

-فامیلیت چیه؟

مال کیمی هویوخ- هویوخ باخدیم آغزینا! قرار دییردی بونو سوروشالار!

-دخترم فامیلیت چیه؟

سانکی دانا پوخ اوسته دونوب، دوندوم قالدیم. یاناممیه‌سن اننه، بس بونو نیه اؤیرتمه‌میسن آخی؟!»- دئدیم اؤز اؤزومه. داغ یئکه‌لیکده اؤزگوونجیم (اعتماد به نفسیم) سیندی، پارچالاندی، اوغوم- اوغوم اوغولدو جالاندی قارنیمین ایچینه، بورولوب آچیلدیم اؤز ایچیمده، سانجیدان قوورولدوم. ایکی الیمی آپاریب قارنیما، بوکولدوم، خینگ- خینگ باخدیم یئره... آخی قرار دییلدی بئله بیر سوال سوروشسونلار!
معلم- مدیر اوزده گولومسونوردولرآما اصلینده دیش قیجیردیردیلار بیله‌مه، من ایسه چارچک قالمیشدیم. بازرس کؤپئیولی چوخ بیر ریشخندلی حالت ایلن دیشین آغاردیب سوروشدو:

-دخترم فامیلیتو نمیدونی؟!!

من ده شاققیمی سیندیرمادیم، هئی هئی فامیل– فامیل دئدییندن بیر هس هوس آنلادیم، عاغلیمدا بیر آز گزیشیب، دئدیم:

-بؤیوح خانیم، حاجی ریضا، ناصیر، هومای... گینه ده وارهاااا فامیلیمیز چوخدی، هاممیسین دیییم؟!!!!!!!

بونو سن ایدین دئین؟! بیردن قاققا چکیب گولدولر نامردلر. قاهقاها سسی کیلاسی بوردو. مات معطل قالدیم. مگر من گولمه‌لی بیر شئی دئدیم؟! من اوندا بیلمه‌دیم نیه هاممیسی او قدر گولوب گئچیندی... گلیب ائوده جریانی تعریفله‌دیم، گئنه ده هاممی گولدو و هله ده فامیلده مثلدی بو جریان!

آنجاق منه سوروشساز، هله ده کی هله‌دیر، "بیر چوخ‌لاریمیزین یاشادیغی بو سایاق احوالات آغلامالی‌دیر!" دئیرم.

سون.