ملی مسئله میز و اونون یولونا گیرمه سی اوچون فارسلیق مفکوره سی طرفیندن هؤرولموش مانعلر!

نظر: حاکمیتی یولا گتیره بیلمه‌دیک. حزب اللهی دا یولا گتیره بیلمه‌دیک. بو طرفدن ده اپوزیسیونو الدن وئریریک آخی.

جاواب: سیزین بو نظر اوزره خالق دیلینده بیر بایاتی وار. اونو ایفاده ائشیدک. بلکه سیزین اورتایا قویدوغونوز مسئله نی گؤتور، قوی و تحلیل ائتمک راحات اولسون:

عزیزیم آلما قالا
بوشقابا آلما قالا
نامرد گلیب مرد اولماز
بویونجا آلما قالا!

دئمک، دیل و مدنیت باخیمیندان اؤزونو فارسلیق ایله، فارسلیق اساسیندا تانیملایان و تعریف ائدن، تورک دیلینه، تورک مدنیتینه یاساق و قاداغا قویان بیر حاکیمیتدن و ائله جه ده بو قهارلیغا قول اولاراق آدینی "حزب الله" قویموش شخصلردن تورکلوک اوچون بیر فرج اومماق اؤزو ده دوشونجه یئریتمک و فیکیراولوشدورماق باخیمیندان خاملیق ساییلار.

کئچمیش پایلاشیملاردا آنلادیلدیغی و ایضاح ائدیلدیگی کیمی، ملی مسئله آچی و زاویه سیندن فارسلیق مفکوره سینی اساس گؤتورموش فارس حاکیمیتی و اونا اوپوزیسیون ساییلان فارس مخالفتی فارس اولمایان دیل و مدنیتلر ایله باریشماز مقامدا یئر آلارلار.

دئمک، تورک دیل بیلینجی و شعورونا مالیک اولمایان هر هانکی بیر تورک ده اؤزونو فارسلیق اساسیندا، فارس تاریخی و مدنیتی ایله تانیملارسا، تعریف ائدرسه، او دا تورکلوک علیهینه فارس حاکیمیتی و اونون مخالفتی ایله بیر خندقده یئر آلاجاق و لازیم گلرسه، تورکلوک علیهینه قورشون سیخاجاق و دوشمن صفینده یئر آلاجاق بیر جاهیل ساییلار.