- الی ـ قولو سینسین، کیم سنی بو گون سالدی؟
باخدیم اونون گؤزلرینه، یادیما گلدی. او قادین منیم آناما چوخ بنزه‌ییردی. گؤزلری شه‌وه ایدی. ساچلاری آغ ـ آپپاق، آغ یون کیمین، شالین آلتیندا گیزلنمیشدیلر.

- باشینی قوی دیزیم اوستونه بیر آز دینجل، چوخ یورغونسان.

- هاردان بیلدون؟

- گؤزلروندن.

- منیم آنامدا، بئله ایدی. اوزومه باخجاق بیلردی یورغونام.

- سنینده باشین آغرییر؟

- هن.

- خینا قوی!

او قادین الین گتیردی. باشیمی قویدو دیزی اوستونه، شالیندا سالدی یارالی قانادیمین اوستونه، بیلمه‌دیم هاچان یوخلامیشام.
گونلر، آیلار گلیردیلر، گئدیردیلر. هر گون منی آپاریردیلار بیر اوزون دالانا سالیب ووروردولار، ال ـ قولومو ازیب سونرا منی بیر قارانلیق یئره آتیب هردن بیر آز چؤرک، سو منه وئریردیلر. بیر نئجه دفعه ایسته‌میشدیم داها آغزیمی بو چؤرک، سووا وورمویوم، بلکه عؤمور باشا چاتسین. آما اولموردو، نیگران ایدیم.
قارانلیق اوزون دالاندا یانلیز قالاندا آنام یادیما گلیردی. اوره‌ییم چیرپینیردی. بئله بیلردیم یئنیدن دونیایا گلمیشم، هامی آغریلار آرادان گئدیردیلر.

یانلیز قالمیشدیم. بیریسی منیم سؤزلریمه قولاق آسمیردی. هئچ قویموردولار دانیشیم، قولو باغلی منی آپارادیلار ووروردولار سونرا منی بو قارا یئره سالیردیلار. چوخ زامان کئچمیشدی. من هر یاندان خبرسیز قالمیشدیم. بیلمیردیم آنامین باشی‌نین خیناسی واردی یا یوخ؟! اونون شالین آتام باشینا باغلاییر یا یوخ؟! سئرچه‌لره کیم تله قورور؟ سریه خالانین سسی گلیر، سئرچه‌لره گینه دئییر:

- آی قانادیز سینماسین، قوش‌لار، نه خبردی بیر بئله قیشقیرتی سالمیسیز؟ هامسینا داریخمیشدیم.

دؤرد ـ بئش گون داها منی وورماغا آپارمادیلار. یئدیم، یاتدیم. بیر گون گلیب منی آپاردیلار اؤزومو یوووم، سونرا منه تزه دوستاق پالتاری وئردیلر. گئییندیم. منی گتیردیلر بیر اوتاغا، اوردان گول قوخوسو گلیردی. چوخ گؤزل بیر یئری ایدی. هر یانی بزکلی، دوزکلی. بیر آغ ساققالی کیشی ماسا دالیندا اوتورموشدو، گیردیم. قول‌لاریم، آغزیم، گؤزلریم باغلی دئییلدی. بیرجه آیاق‌لاریمدا قاندال وار ایدی. او کیشی باشی آشاغا دئدی:

- اوتور!

اوتوردوم. بیر بویانا باخدیم بیر اویانا باخدیم او یئکه کیشی‌لردن خبر یوخدور. هریان گؤزل ایدی. ایندی بو اوتاقدا بیر من ایدیم بیر بو آغ ساققال کیشی! بیزدن سونرا هئچ کیم یوخدور. بیر سس گلمیردی. قیشقیرتی یوخدور، بیریسی باغیرمیردی، بیریسی یالوارمیردی. هر شئی آیین ـ شایین ایدی. چوخ زامان ایکیمیز قالدیق، او کیشی ماسا دالیندا باشینی آشاغا سالمیشدی، منه باخمیردی، اؤز ایچیمده دئدیم:
- گؤره‌سن بو کیشی نه ایش گؤرور؟

بو حالدا او کیشی باشینی قوزادی. منه باخدی گولومسه‌دی. دیک اوتوردو.

- هن، گونلر نه‌جور کئچدی؟

دینمه‌دیم. او کیشی اوتوردوغو یئردن قالخدی. گلدی الین قویدو منیم چینیمه، چوخ محبتلی دئدی:

- اوغول، عاغلینی ییغ باشینا ایسته‌ییرم سنی گؤندرم محکمه‌یه، اوردا بیردن دئمییه‌سن منی ووردولار، ها! اوندا گینه‌ده سنی قایتالارلار بورایان بیلیرسن کی...
دئدیم:

- هن.

- یاخشی، ایسته‌ییرسن، تئزلیکجه، قورتولوب گئده‌سن؟

- هن.

- اوندا سوروشسالار «هاچا» یولدا سن بومبا قویدو؟ دئیرسن هن.

- آما من قویمادیم، منیم چامادانیمدان بیر کؤینک، ایکی جانلیق، بیر شالوار وار ایدی.
- بیلیرم. آما بو سؤزلری کیمسه اینانمییاجاق.
بیز بئش یولداش بیر حؤجره ده قالاردیق. بیریسی اوغرو ایدی. بیریسی اوشاقلیقدا آدام اؤلدورموشدو. ایکیسی ده منیم کیمین ایدیلر. اونلاردا بیلمیردیلر نه‌دن بوردادیلار! بیزیم چوخ یاشیمیز یوخدور. تزه ـ تزه دوداق‌لاریمیزین اوست و قارالیردی. بیز اولان دوستاقدان چوخ یاشلی، اوزون بیغلی، آغ‌ساققالی، یوغون کیشی‌لرده وار ایدی. من ایلک گونلری، چوخ قورخاردیم هئچ بیریسینه یاخینلاشمازدیم، آما اونلارین ایچینده بعضیلری منی الدن قویمازدیلار. ال‌لرین منیم باشیما چکردیلر، اونلارین ال‌لری قوخویاردی. چوخ آچیخلاناردیم، آما قورخومدان بیر ذات دئمزدیم. یولومو چکیب اونلاردان اوزاقلاشاردیم. چوخلو واخت‌لار اؤزومو نوخوشلوغا ووراردیم حؤجره‌دن ائشییه چیخمازدیم. منیم یولداشلاریم قورخوسوز گئدیب او قورخولو کیشی‌لرین ایچینده اوتوراردیلار، دوراردیلار. دئییب ـ گولردیلر، کیمسه اونلارا یاخین گلمزدی، اونلارین باشلارینا ال چکمزدی. من بونون سببینی بیلمزدیم.

حؤجره ‌ده گئجه‌لر من یئرده یاتاردیم، آخی بیزیم حؤجره ده دؤرد یاتاق یئری وارایدی.
- نه‌دن هاوا آلماغا گلمیرسن؟ اوغرو یولداشیم دئدی.

- ائله، بئله، حوصله‌م اولمور.

- قورخورسان؟

- کیمدن؟

- او کیشی‌لردن!

من دینمه‌دیم. بیر آز اونلار منه، من اونلارا باخدیم. آرامیزدا بیر گیزلین گولوش کئچدی.

- بو گون گل برابر چیخاق هاوا آلماغا. بیریسی سنه ایری باخسا اؤزوم قانین تؤکرم. آدام اؤلدورن یولداشیم دئدی.

حؤجره‌لرین قاپیسی آچیلدی. هامی بیر ـ بیر حؤجره‌لردن ائشییه چیخیردیلار. جاناوار گؤزو کیمین چوخلارینین گؤزو منی گودوردو. من، دؤرد یولداشیمین آراسیندا هاوا آلماغا چیخدیم. کیمسه منه یاخین گلمه‌دی. دوستاغین ساغ یانیندا دووار دیبینده اوتوردوق بیر آز گونش آلدیق. سونرا دوردوق دولاندیق. داها آرخایینلیق منیم ایچیمه گیرمیشدی.

- ماحمود بی، بورا اوخول- موخول دئییل. بورا دوستاقدیر. بوردا گرک هامی‌ کیمین سنده جاناوار اولاسان. بیریسی ایسته‌دی جیزیغیندان چیخسین، اونا ماجال وئرمه، وور، قوی آغزی، بورونو اییلسین! داها بوردان سون یئری یوخدور. بورا دونیانین آخیریدی. بو سؤزلری منیم آدام اؤلدورن یولداشیم دئدی.

داوامی وار...