ابولحسن بنی صدر جمهور رئیسی اولدوقدان سونرا، صادق قطب زاده جمهوری اسلامی حؤکومتی نین خاریجی ایشلر ناظری اولدو. قطبزاده نین آمریکا مقاملار ی ایله گیزلین پاچ اوینادیغینی آیت الله خمینی ائشیده رک، 1358ینجی ایلین اسفند آیی نین 4-ونده، آمریکالی توتولموشلارین (گروگانلارین) مسئولیتینی "انقلاب شوراسی"نا وئرمکله قبطزاده نین گروگانلار مسئله سینده الی بوشا چیخدی.

صادق قطبزاده دیپلوماتیک باخیمدان اعتبارسیز اولدوغونو درک ائده رک آیت الله خمینی-دن آرا آچماغا باشلادی. بئله لیکله قطبزاده و ابولحسن بنی صدر "دانشجویان خط امام" علیهینه انتقاد ائتمگه باشلارکن، 1358-ینجی ایلین اسفند آیی نین 16-سیندا "دانشجویان خط امام " گروگانلار" اوزره تصمیم توتمانی انقلاب شورا سی نین اختیارینا قویماغا حاضیر اولدوقلارینی بیلدیردیلر(1).

دؤلت تشکیل وئرمیش محمدعلی رجائی آیت الله خمینی قارشیسیندا مخلیص خادیم اولدوغو اوچون، بنی صدر رئیس جمهور اولماسینا باخمایاراق، رجائینی گؤرمگه بیله گؤزو یوخ ایدی. بئله لیکله بنی صدر داواملی رجائی نین باشاریقسیزلیغیدان آیت الله خمینی-یه شکایت مکتوبو یازیردی. رجائی اؤزونو "خط امامی" دئیه، تقدیم ائتدیگی اوچون، آیت الله خمینی تلویزیوندان یاییلمیش دانیشیقلاری نین بیرینده "رجائی ساوادسیز دا اولسا، اونون ایمانی نین بنی صدردن آرتیق" اولدوغونو وورقولاراق، رجائی نی اؤز حمایت چتری نین آلتینا آلدی. اوسته اشاره ائتدیگیم کیمی بنی صدر خاریجده جبهه ملی محفلی و ادبیاتی ایله تربیت اولدوغو اوچون، او دا علی شریعتی کیمی مذهبی سیاست خدمتینه آلان بیر شخص ساییلاردی و بوگون ده ساییلار.

1359-ونجو ایلین اسفند آیی نین 14-ونده محمد مصدقین اؤلومونون ایل دؤنومونده بنی صدر مصدقچیلری اؤز یانینا آلاراق قزوین نین احمد آباد کندینه مصدقین قبرینی زیارت ائتمگه گئتدی. اونون مخالیفلری ایسه یاواش یاواش بیره لنمگه و اونون علیهینه شعار وئرمگی جامعه-ده یئرینه سالماغا چالیشدیلار، حزب الله-چیلار و کمیته چیلر طرفیندن وئریلمیش شعارلاردان بیری بو ایدی:

"بنی صدر دق کرده، یاد مصدق کرده!".

بنی صدر او زامان "فرمانده کل قوا" ساییلدیغی اوچون، فارس سولچولوق ادبیاتینا گیرمیش "آلینده و پینوشه" آنلاییشیندان یولا چیخاراق، بنی صدری شیلیده "آلینده" حاکیمیتی علیهینه چئوریلیشه قول چکمیش ژئنرال پینوشه ایله عئین مقامدا و پوزیسیوندا اولدوغونو ادعا ائدیردیلر. بو اساسدا کمیته چیلر و حزب الله-چیلار بنی صدر علیهینه موضع توتارکن شعار وئریردیلر:

- "سپهسالار پینوشه، ایران شیلی نمیشه"!

دئمک، ابولحسن بنی صدر محمد مصدق کارتینی اورتایا قویماقلا بیر بؤیوک قومار اویونونا گیرمیش ساییلاردی. بو اساسدا فارس حاکیمیتچیلیگی اوزره و فارس حاکیمیتی نین ایچینده حئسابلاشماقلار "تئوکرات روحانیت طرفدارلاری بیر طرفده"، "جبهه ملی، نهضت آزادی و مجاهدین خلق طرفدارلاری ایسه او بیری طرفده" بیر قدرت ساواشی باشلامیش اولدو دئسک، یانیلماریق. حزب توده ایران و اونون تإثیرینده اولان محفللر ده او زامان روسیه کمونیستلیگی سیاستینی قاباغا آپاردیقلاری و جبهه ملی و اونا باغلی اولان محفللرین ترسینه سیاست یئریتدیکلری اوچون، اؤز موقعیتلرینی تئوکرات روحانی کسیمین یانیندا یئر آلماق و لیبراللاری قدرتدن سالماق اوچون اویقون یول حئساب ائدیردیلر.