بئله لیکله ابولحسن بنی صدر قزوین نین احمد آباد کندیندن گئری دؤندوکدن سونرا، محمد مصدقی تبلیغات باخیمیندان عزیزلمک اوچون، تهران اونیوئرسیته سینده چیخیش ائتدی. بنی صدر یانچیلاری محمد مصدقین و آیت الله طالقانی نین تصویرلرینی پلاگاردلاردا داشیرکن، اونون مخالفلری ده اعتراض علامتی اولاراق محمد مصدقین ملکه ثریا پهلوی نین الینی اؤپدوگو تصویری داشیردیلار.

بنی صدر دانیشیغا باشلارکن، اونون سسی ائشیدیلمه سین دئیه، مخالفلری سس اوجالدانین (بلندگونون) سسینی قیسماق و سس کوی سالماقلا مزاحمت ائتمگه چالیشدیلار. پلیس ده بو مسئله ده اغماز ائتدیگی، مخالیفلرین قارشیسینی آلمادیغی، یوخسا آلابیلمدیگی اوچون، بنی صدر جاماعاتا اوز توتاراق، بونلاری سوسدورون دئیه مراجعت ائتدی:

"مردم جواب اینهارا بدهید".

بئله لیکله مصدقچی سازمان مجاهدین خلق محفلی و ایدئولوژی باخیمدان اؤزلرینی تئوکراتیک روحانی کسیمه رقیب گؤرنلر، مخالف شعار وئرنلری توتاراق اونلارین کارتلارینی آلیب بنی صدره وئرمکله، بنی صدر اونلارین کمیته چی و سپاهی اولدوقلارینی تریبوندان حاضیر انسانلارا بیلدیردی.

بو آردا هر ایکی طرف بیربیرلری نین علیهینه شعار وئرمکله سیاسی چکیشمکلر مخالفت آشاماسینا و مرحله سینه یوکسلدی. حزب الله-چیلار و کومیته چیلر و اونلار ایله دایانیشماق ایچینده اولانلار دانیشیغی داغیتماق اوچون بنی صدر علیهینه شعار وئرمگه باشلادیلار:

"سپهسالار پینوشه، ایران شیلی نمیشه"!

"بنی صدر دق کرده، یاد مصدق کرده"!

بئله لیکله اؤزلرینی بنی صدر یانچیسی قلمه آلان قوروپلاشمالار دا فرصتی غنیمت سایاراق سیدمحمد بهشتی و حزب جمهوری اسلامی علیهینه شعار وئرمگه باشلادیلار:

"راه نجات انقلاب -------- خلع‌یَد از حزب چماق

حزب چماق بدستان ----- - باید بره گورستان

مسلمان بپاخیز ------- ایران شده رستاخیز" (۱)!

بنی صدر اؤز مخالیفلرینی چماقدار قلمه آلدیغی اوچون، ۱۳۵۹-ونجو ایلین اسفند آیی نین ۲۵-ینده آیت الله خمینی نین حضورونداکی اوتورومدا سیدعلی خامنه ای و سیدمحمد بهشتی طرفیندن تنقید آتیشینا توتولدوغو دا او زامانکی مطبوعاتا سیزدی و یانسیدی.

او تاریخدن اعتبارا بنی صدر ده روحانی تئوکرات کسیمه اؤگئی قارداش گؤرونمگه و رجائی نین ساوادسیز و باشاریقسیز اولدوغونو اورتایا قویماقلا بو مسئله نی قابارتماغا باشلادی. بنی صدر اؤنجه اؤزونو روحانیته تسلیم ائتدیگی اوچون، بو مسئله نی روحانی تئوکرات کسیم "کومیته حل اختلاف" آدی آلتیندا گؤتور و قوی ائتمگه چالیشدی. بئله لیکله ۳ نفر روحانیدن عبارت اولموش "حل اختلاف کومیته سی" یاراندی:
۱- محمدرضا مهدوی کنی: آیت الله خمینی طرفیندن تعیین اولدو.
۲- آیت الله شهاب الدین اشراقی: بنی صدر طرفیندن تعیین اولدو.
۳- آیت الله محمد یزدی: هاشمی رفسنجانی مجلیس رئیسی، بهشتی دیوان عالی کشور رئیسی، محمدعلی رجائی بیرینجی وزیر طرفیندن مسئول تعیین اولدو.
۱۳۶۰-ینجی ایلین فروردین آیی نین ۱۲-سینده "حل اختلاف کمیته سی" بنی صدری مجرم و اختلاف سالان شخص دئیه تانیتدی(۲).

بنی صدر بو قضاوت ایله راضیلاشمایاراق اختلافین حل یولونو "رأی عموم" و خالقا مراجعه ائتمک دئیه مسئله نی داها دا دیرماندیردی. بئله لیکله مجاهدین خلق بو اختلافی حل ائتمک اوچون رفراندوم مسئله سینی اورتایا قویماقلا (۳)، حاکیمیت ایله آرالاریندا اولان تعارفات و "پدر طالقانی" حئکایه لری گئریده قالیناراق جمهوری اسلامی مسئوللاری طرفیندن دوشمن دئیه قلمه آلیندی.

اتک یازی:

۱) رستاخیز کلمه سی شاه زامانینداکی شاهین "حزب رستاخیز" آدلی محفلینه اشارت ائدیردی. بو حزبین یئرینه تئوکراتیک روحانی کسیم طرفیندن "حزب الله" محفلی مطرح اولماغا باشلامیشدی.
۳) روزنامه کیهان، ۱۲ خرداد ۱۳۶۰
۳) روزنامه مجاهد، شماره ۱۲۲، تاریخ ۷ اردیبهشت ۱۳۶۰.