۱۳۵۹-ونجو ایلین اسفند آیی نین ۱۴-ونده بنی صدر محمد مصدق اوزره تهران دانشگاهیندا ائتدیگی چیخیش و دانیشیق زامانی، مجاهدین خالق تشکیلاتی نین بنی صدری حمایت ائتدیکلری و کمیته چیلرین کارتلارینی آلیب بنی صدره وئردیکلرینی نظره آلاراق، آیت الله خمینی حسینیه جماراندا ۱۳۶۰-ینجی ایلین اوردیبهشت آیی نین ۱۰-وندا مجاهدلره اتمام حجت ائتدی.

آیت الله خمینیدن اوخویوروق:

" ... بیز خالق طرفداری ییک دئیه ادعا ائتمکله اولماز. اونلار اشتباه ائدیرلر. ملتین قوجاغینا گلسه لر، اؤز صلاحلارینا اولار. بو ایشلرینی داوام ائدرسه لر، ملته تکلیف اولونسا، پئشمانلیغین داها سونرا فایداسی اولماز. اوگون ملته تکلیف اولار. بونلار ایله مقابله ائتمک اوچون سون تعیین و تکلیف بللی اولار. او الاهی و شرعی بیر تعیین تکلیف ساییلار.... ملتین قوجاغینا گلین، اسلحه نی یئره قویون. آیری قارداشلار ایله بیرلیکده یاشاماغا چالیشین! بو یاشادیغینیز شرافتلی یاشاماق دئییل، اؤزگه لر اوچون یاشاماق ساییلار. اؤزونوزو یوخا چیخارارسینیز! کئچمیش رژیمین قالیقلارینی و اسلامدان آزمیشلاری سئویندیرمک اوچون یاشیرسینیز! اونلاری راضی سالماق اوچون اؤز جوانلارینیزی الدن وئریرسینیز. آییق اولون! ملته تکلیف اولورسا، سیزه نه ائده جکلری بللی..."(۱).

آیت الله خمینی نین بو اتمام حجتیندن سونرا، مجاهدین خلق ۱۳۶۰-ینجی ایلین اوردیبهشت آیی نین ۱۲-سینده بیر آچیق مکتوبلا اجتماعیته و آیت الله خمینی آدرئسینه مراجعت ائتدیلر، اوخویوروق:

"... انقلابدان ایکی ایل نئچه آی کئچمه سینه، طاغوتی سلطنتی رژیمی نین ییخیلماسینا باخمایاراق، خالق مجاهدلری گئنه ده گونو گوندن اذیتلره، افترالارا، تهمتلره معروض قالیرلار. کئچمیش زامان، دفن اولموش شاه "اسلامی مارکسیست"، "قرمیزی و قارا استعمار عاملی"، "بعث حزبی نین اَل آلتی" دئیه بیزیم علیهیمیزه اولمازین ظولمو اولدوغونا باخمایاراق بو اؤلچوده افترا و تهمت آلتیندا دئییلدیک. رادیو تلویزیوندا، منبرلرده، گونده لیکلرده (روزنامه لرده)، تازا حؤکومتین یایین و باسین اورقانلاریندا مجاهدلر علیهینه اولان افترالاری کئچمیشدکیلر ایله توتوشدورارساق، بو حقیقت اورتایا چیخار. کئچمیش ایکی ایلده ۵۰ نفریمیز قانا بلنمیش، ۱۰۰ برابری ایسه، ایستی و سویوخ اسلحه ایله یارالانمیشلار. هئچ بیر شکایتیمیزه ده قانون باخیمیندان یئتیشیلمه میش.... یئنیلیکده دیوان عالی کشور، بیزی اؤز شهیدیمیزی اؤلدورمکده متهم ائتمیش. شرعی، قانونی و اخلاقی باخیمدان نئجه بؤیوک مسئولیت داشیدیغینی بیلیرسینیز... حضرت آیت الله، انقلابین صباحکی گونوندن مجاهدین خلق بیر شخصه بیله اسلحه چکمه میشلر. بو تاریخه دک غرب و جنوب جبهه لرینده عراقلی متجاوزلرین علیهیندن باشقا بیر گلوله بیله آتمامیشیق. .. .قانون اساسی مسئله سینده سس وئرمدیگیمیزه باخمایاراق بو قانون عملی اولارسا دا اونا تمکین ائده ریک. ..."(۲).

سونراکی گونلر ابولحسن بنی صدر ایسه، "انقلاب اسلامی" آدلی گؤنده لیگینده (روزنامه سینده) قارشی دورمالاری آرادان قالدیرماق اوچون، "برای خروج از بن بست کنونی سالم ترین راه بدون بحران این است که همه موافقت کنند به مردم مراجعه کنیم و با رأی عمومی آنچه باید بشود" دئیه مقاله یازماقلا تئوکرات روحانی کسیمه یاخینلاشماق یئرینه داها دا اؤزونون حاکیمیتدن طرد اولدوغونا یول آچدی (۳).

بئله لیکله تئوکرات روحانی کسیم آیت الله کاشانی و محمد مصدق (۱۳۳۲) زمانیندان فارس ملتچیلری و روحانی تئوکرات کسیم آرالاریندا دوشونجه آیریلیغینیندان یانا اورتایا چیخمیش اختلافلاری سسسیزجه گونجللشدیره رک ملیتچی کسیم ایله حئسابلاشماغا باشلادی. بو ایکی کسیم (فارس ملیتچیلیگی و روحانی تئوکرات کسیمی) آراسیندا قیریلماغا محکوم اولان ایپلر و ساپلار (رابیطه لر) جبهه ملی ایله قیریلاراق مجاهدلر، ملی مذهبیلر، مسلمانان مبارز آدلی ملی و مذهبی محفللر ایله ده تصفیه حئساب اولونماغا باشلاندی