آرتیق اسکی گونلر کیمی دئییلدی. اسکیدن آزربایجانین ایکی نسلی آراسیندا بیر قوپوقلوق یاشانمیشدی. یئنی نسل اسکی نسل ایله ایلگی قورابیلمیردی. اسکی نسلده میللی مسئله ایله ماراخلانان چوخ آز ایدی. چونکو اونلار ایچینده امانسیز بیر قورخو یارادیلمیشدی پیشه وری و خالق مسلمان حرکتلری. آزربایجان سؤزو هاردایسا یاساق حالی آلمیشدی. یادیمدا اوشاق ایکن الیمه ندنسیز قلم ایله آی اولدوز شکلی چکمیشدیم، قارداشیم دئدی اونو سیل. ائشیکده گؤرلر، عائله میز اوچون سورون اولار.

اوگون آخشاما دوغرو دیشاری چیخاجاقدی. آتاسی سوروشدو اوغلوم هارا گئدیرسن؟
- آتا، یولداشلارلا تبریزین دوورلارینا وطنی یازماغا گئدیرم. بیر ده وطنیمیز اوچون چالیشیب توتوقلو اولانلارین آزادلیغی اوچون یازاجاییق.

آتاسی گولومسه دی، دئمک وطنی شهریمیزین دورالارینا یازاجاقسینیز. نه غریبه دیر، یاشادیغین تورپاقلارین آدینی یازماق و باغیرماق اوچون گیزلیجه قارانلیغین گؤزتچیلرینده اوزاق گئتمه لیسینیز. دیققیتلی اولون اوغلوم.

او گئجه تبریزین بیر چوخ خیابان و کوچه سینده «یاشاسین آزربایجان» شعاری یازیلمیشدی. گئجه نین گؤزتچیلری سحر چاغی شهرین دوورلارین بئله گؤرونجه ده لیه دؤنموشدولر. ایلیم ایلیم کیمین یازدیغین آختاریردیلار. سونوندا آختاردیقلارینی تاپدیلار. آتا و اوغولون ائوینه هجوم ائدیب هر ایکیسینی ده توتوقلادیلار. آتاسی اوغلونو یالنیز بوراخماماق اوچون اونونلا بیرلیکده دوورالاری یازدیغینی دئدی. سونرا آرتیردی:

- منیم اؤز وطنیمده اؤز آنادیلیمده اونون آدینی دوورا یازماق سوچسا من ان بؤیوک سوچلو اولماق ایستیرم.
هر ایکیسینه ده قاندال ووارکن آتا بیر الی ایله گئجه نین گؤزتچیلرینی ده لی ائدن بوزقورد ایشارتی ایله سلاملادی زیندانین یولونو. سول طرفینده اوغلو ایله بیرگه قانداللانمیش، ساغ الی ایسه قارانلیق گوجلرین الینه باغلی ایدی.

ماشینا مینرکن باغیردی:

- سنی دوورا یازدیم وطن اونو سیلدیلر، آما اوره ییمده کی سنی سیله بیلمزلر.