اولدوز باتدی، اؤلدو شام، کیمسه اویاق قالمادی!!!

بو دونیادان بایرام یئلی کیمی اسیب کئچه‌نلر، روحوموزدا ابدی یارا بوراخانلار اولدو. عؤمرونو قارا گونلرله کئچیریب، آخ-وای ائد‌ن، سون‌سوز آرزولارینی، سایسیز دیلکلرینی باخیشلارین‌دا سؤندوروب، کیچیک تابوتونا سیغدیران شهرینین -یاری شهریار آرخاسین‌دا، اونو سئوه‌ن، اونو حس ائد‌ن، چیینلرده شهریار یوکونو داشییان بیر جهان قویوب گئتدی. او جهان کی، گوندوزون یادیگارینی گئجه‌یه قاتاراق، هر گئجه اولدوز ساییب آیی گؤزلییر، فقط سینه‌سین‌دن سون نفسینی چیخاریب آتان آی، مزارینی شعیرلری ایله عؤمورلوک اورییمیزده قازیبمیش. او، آرتیق بو دونیایا ایشیق سالا بیلمز. اونون کئچدیی کاروان، آیریلیغین آجی شربتینی ایچیب، بو دونیادان گئدر گلمز یوللارلا، ظلمت قارانلیغا گئدیب. او، گئدن‌دن اورکلریمیزده دایانان زامان چوخ‌دان کئچیب، کئچه‌نلریمیزده شهریاریمیز-خیال میدانیمیز قالیب. لاکین، جیس‌می بو دونیادان کؤچ ائتسه ده، شهریارین عشقی روحوموزدا هله ده یاشاییر، هئچ قوجالمیر، گونو-گون‌دن درینلشیر کؤک سالیر، دامارلاریمیزدا قان اولوب، آخیر… شهریار یانان اورکلره ‘’آراز اولوب’’هی آخیر، آخیر!!!

سن‌دن کئچه‌ن دونیا بیزه نه قدر یاد، نه قدر اؤزگه‌دیر، آرتیق..سنه ناغیل دانیشاق:’’قورد کئچینین شنگولوسون یئنه یئسین’’، کولک قالخسین، قاپی-باجانی دؤیسون، سن ده یئنی‌دن اوشاق اول، اوزاق دوشدویون ائلینه قاییت، گؤزوموزدن یاشلار آخدیقجا سنه چیراق اولاق یول آچاق! دیریلدیب آشیق روستمین سازینی دیللندیرک، سنین او یاتمیش بختینی، او پریشان قلبینی، بلکه بئله‌جه اویادا بیلک..حیدربابادان هارای سالیب، آرازین گؤز یاشلارینی قوروداق، سنه عؤمور سالاق! ایچین‌ده یاشایان بیر اؤلونو سورییانی دیریلدیب چاغیراق تور تجللایه، سن ده موسی اولوب او اوزون سفردن قاییت بیزه..تهرانا غیرت، تبریزه وفا اولاق، صمدلردن، روستملردن، بابیللرین نفسین‌دن نفس گتیریب، اؤلو بیر جانا نفس اولاق،…یازیلمایان، ’’یار-قاصدی ‘’اوخونمایان ‘’بهجت آباد خاطره‌سی’’ اولاق، بلکه اللرین قلم اؤزون ایلهام اولاراق قاییداسان..بو دونیانین سن‌سیز قالان، سس‌سیز قالان ظلمتینه…سس‌سیز قالمیش بو دونیانین ظلمتینه سس‌لنیریک؟! هانی گونبگون قددینی اییب یاشاداراق اؤلدوردویون، ایندی ایسه اؤلدوروب یاشاتدیغین شهریار؟! سوسور هر کس، هر شهر…سوسور، سانکی، آجیدان یوغرولتوغون، نیشاپور، آه-ناله‌نله نفس آلان تهران؟! تکجه، تبریز دانیشیر ایندی هر پارچاسی، هر داشی، چونکی هیجرانا بورونوب، چونکی های کویون‌ده سیزیلتی‌سینین لایلاسینی اوخویاراق، ابدی یاتیرتدیغی شهریاری حفظ ائدیر، شهریارا قوجاق اولوب. آرتیق او، اؤلومون هر شئیین‌ده، یاشامین هئچ‌لیگی اولوب. یاواش-یاواش ساکیتلشیر، دانیشان هر شئی، تکجه یاشادیغین محله‌نین کیم‌سه‌سیز کوچه‌لری دانیشیر، گزرکه‌ن هر تینین‌ده جان وئردیین، سنه سیرداش اولوب یومشالان دیوارلارین، ویدا آستاناسین‌دا گؤزلریندن میل چکدیین داشلارین دیله گلیر ایندی، میصراع-میصراع سن قیشقیریر، بند-بند ائوینین سنسیزلیینی قورویور. سس-سسه وئره‌ن اشیالارین چیلیکلنیب سؤز تؤکور، اوتاغینین سن قوخان هر کونجو ال-اله وئریب، سنی گؤزلییر، ایز بوراخدیغین هر اشیان اوزرین‌ده توزلانمیش بؤیوک بیر خاطره‌دن آسیلیر، هر گون بیر آز دا کیمسسیزلشیب، توخونولماز، سینماز اولور… ایندی قیریق قلبلرین تسل‌لییه، ناکام سئوگیلرین چاره‌یه، یاریم قالمیش جانلارین تاماملانماغا، وطن هسرتی ایله یانیب توتوشانلارین وطنه احتیاجی اولان‌دا، شهریار، دئیه-دئیه، کئچدیین کوچه‌لرین آهینین‌دان نفسلرینه قاتاراق سنه گلیر، سرگردان اولموش آداملار کیمی یالین آیاقلارلا قاچیب سنین کئچدیین یوللارا سیغینیر، آددیم-آددیم آیاق ایزلرین‌دن سنی حس ائدیب، او معاویه بورونموش قاپینا شهری-یار دئییب ده گلیر.

بدنلرینه دار گلن روحلارینا، روحون‌دان روح قاتاسان، دئیه گلیر، اوستاد… سن حس ائدیرسه‌ن، سنه سیغینانلاری…بلکه ده سن چاغیریرسان، دئیه هر کس سوال اولاراق گلیب، جواب اولاراق دؤنور.

سوساراق گلنلره، هئچ کیم ائشیتمه‌سین دئیه، سنه اؤزلرینی پیچیل‌دایانلارا، جواب وئریرسن، بلکه ده، سوساراق !!!

سسسیزلیین‌ده دینجه‌له‌نلر…ساکینلیین‌دن اؤدونج آلیب قاییدیر گئری، یئنی‌دن و یئنی‌دن سنه گلیب سوسوب دانیشماق اوچون!!! ایندی ائوینی اومیدسیزجه ایسلادان گؤز یاشلاری؛ یانار داغا دؤنه‌ن، آغریلار؛ اورک آیناسین‌دا چاتا دؤنه‌نلر یاد ائدیر، هر دیواردان آسیلمیش شکلینه سوراقلاشیر سنی….

‘’نئچه سیقارئت یاندیریب، کول ائتمیشدین سورییانین اودون‌دا؟!

نه قدر گؤز یاشلارییلا سایمیشدین؟! سورییانین گئتدیی گونو…گؤز یاشلارین بیتمدیی کیمی گونلر ده بیتمه‌یه‌جک‌دی..

فریادین‌دا چارسلیین لاللاشرکه‌ن، سئوگین ساچلارینین بیازین‌دان آسیلمیش‌دی، اللرین قیریشارکه‌ن نه قدر جیغیر آچمیش‌دی سئوگین، عؤمور یولونا؟! سون دفعه گؤرمک اومی‌دی ایله گئجه بویو گؤزلیرکه‌ن، گؤزلرین آلیش‌دی سئوگینین یوخوسوزلوغونا، او زامان‌دان بری می ماسماوی گؤزلرین بیتمه‌یه‌ن گئجه‌نین قارانلیغین‌دا سارالیب سول‌دو؟! آخی سن اویاق ایدین؟ شهریاریم؟! آخی سن یوخوسوز ایدین؟! گؤزلرینه نیه دولمادی او سئوگی یوخون؟! هر گئجه لایلای دئییب، یوخونو اوغورلایان پرین اوچون گؤز قیرپسان‌می می اؤلوردون؟! گؤز یوماراق می اؤلوردون، گونبگون؟! یوخ‌سا اویوسان او اویاناردی می؟ یاتمادیغین هر گئجه‌نین ان قورخونج گیزلنقاچ اویونون‌دان، دولانباج کوچه‌لرین‌ده ایترکه‌ن، سن ان گؤزل اونون قلبین‌ده گیزلندین، ایللر بویو..زامان کئچدیکجه مسکه‌ن سالدین اورا…آختاریلدین، آراندین محمد حسین اولاراق، بیر گون اودوزوب شهریار اولاراق، چیخدین میدانا…گئجه‌دن ظلمت سحره اویانان‌دا اویون بیتمیش‌دی، دانیشدیغین حکایه‌نین یولو بیتمدیی اوچون‌مو، سبانین سئتارین‌دا سیمه دؤنوب، یالنیزلیغین‌دا رقص ائتمیش؟! نیمانین شئیرلرین‌ده سیررلشیب، سادیق هیدایتین ‘’پس قولئ’’شلاله‌سین‌دن سو اولوب آخاراق، اینتهار ائدیب دفعه‌لرله اؤلموشدون؟! ایندی نئجه ده سوکوتا قرق اولوب،…قارانلیغین‌دا کور…سسسیزلیین‌ده لال اولوب‌سان، عمورلوک یاریم قالیب، سرحدلری گؤز یاشی ایله، نیسگی‌لی ایله قیرا بیلمه‌یه‌ن، چیینلرده وطن حسرتی ایله، ناکام سئوگی‌سی ایله مزارا داشینان، وطن‌دن آرالی داردا قالیب، شعیرلرین‌دن آزادلیق تاپیب سادته آددیملایان، آذربایجان‌سیز هئچ اولوب، وطنین عشق مکتبین‌ده جان وئرمیش شاعرسن آرتیق. روحداشلاری ایله، شعیرلرده،کیتابلاردا گؤروشه‌ن، یازدیغی هر میصراع ایله وطنه قوجاق دولوسو سئوگی، حسرت یاغ‌دیران، نغمه‌کار بولبولو باغین‌دان، گوللرین‌دن آرالی سالیب قلبینه تیکان اوخو ووران ائله همین آیری‌لیق‌سان کی آیری‌لیق‌سان! گئرییه بوراخدیغی هر شئیری، هر گون شهریار اولان، حیدربابا کیمی داشلاشیب، دیللرده گزه‌ن ائله همین شهریارسان، آرتیق!!! اؤز شفقلرینی، ابدیت اوفوقلرینه ساچیب، اؤز ایشیغین‌دا یانان، باتان اولدوز، اؤلن شام، تنهالیغین‌دا کیمسه‌نین اویاق قالمادیغی، هامینین گئتدیی هئچ کیمین قالدیغی یاریم آدام، یاریمچیق آدام‌سان ایندی!!! اولدوز باتدی، اؤلدو شام، کیم‌سه اویاق قالمادی، شهریار!!!