شناسایی‌دن تزه قاییتمیشام. بَتر یورغونام. شام سیز چادیرین دیبینده پتویا بوکولموشم. کیرپیک لریماؤز - اؤزونه بیر - بیری نین اوستونه قاپانیر. یوخو گؤزلریمی آلیب.

صوبحدن دی دیده بان اوشاق¬لارلایام. "پسوه" داغ لارین باشیداییق. چادیرین آغزیندان هر دن بیر سرین یئل اَسیر. اورَ ییم آخینیر. ننه مین یاغلی چؤرک-لری یادیما دوشور. نه اولاردی باشیم ایندی اَته یینده اولایدی ننه؟! دیل آلتی دئییرم: ـ «ساچ لاری آغلی قره، سنه قوربانام ننه ...»

اوشاق لار هالا هیرنا سسی ایله بیردن گیریرلر چادیرا. گؤزلریم او قدَر قیزیشیب، کیرپیک لریمی آچیب باخماق ایسته میرم. ائله بیل بیر - بیرلرینی قیدیقلاییرلار. یامان اورَ کدن گولورلر. سس لریندن اونلاری تانیییرام. "صمد" دئییر: ـ «بو کیمدی ایندیدن نعش اولوب؟»

او بیریسی دئییر: ـ «گلین اونو باسدیراق!»

دئیه سن شوخلوق لاری توتوب. پتونو اوستومدن گؤتورورلر. گؤزو یومولو دئییرم: ـ «سیزی آللاه من نن ایشیز اولماسین...»

هاشیم دئییر: ـ «گؤزوو آچ، گؤر "شیککیلی"نی نئینه میشیک؟»

گؤیلوم ایستر – ایستمَز، گؤزومون بیرینی آچیرام. اون نفردن چوخ چادیرا گیریب لر. آرالاریندا گؤزوم ساتاشیر شیککیلی یا. باشینی تیغ له دیبدن قیرخیب لار. کیشی اوغلونون تپه سی لامپین ایشیغیندا پار - پار پاریلداییر. گولمک ایسته ییرم، آنجاق یوخومون قاچماغیندان قورخورام. پتونو یئنه چکیرم باشیما. اونون آلتیندان دئییرم: ـ «گؤردوم! ایندی قویون یاتیم.»

بیری دئییر: ـ «بللی دئییل کیم اؤله، کیم قالا... آدام اؤلنده ده، گوله – گوله اؤلسون!»

"هاشیم" دئییر: ـ «دئسَن شیککیلی کیمه بنزه ییب، قویارام یاتاسان؟»

پتونون آراسیندان اونا باخیرام. ساققالی اوزون، تپه سی کئچل، قارنی یئکه، قاش لاری چاتما، بسته بوی. دئییرم: ـ «اَشی اولوب مشتی عیباد دای!»

هاممیلیغان گولولر. صمد لَک دببه نی گؤتوروب، باشلاییر چالماغا. او بیری لری ال چالیرلار. دارامب - دورومب سسی چادیری آلیر باشینا. شیککیلی ده (آللاهیندان ایمیش ائله¬بیل،) دوشور اورتایا، اویناماغا.

صمد اوخویور: ـ «... سن گلدین بیزی شاد ائله دین...!»

اؤز اؤزومه دئییرم: دوز دئییر، هله بو شادلیغین سسینی صدام دا ائشیتسه، حتمن قانی قاپ قارالار.

شیککیلی دایانیر قاباغیمدا. بیزلردن بیر ایکی ایل بؤیوک دور. ائله پتونون آلتیندان دئییرم: ـ «عاغیللیز کیمدی؟»

صمد اوخویور: ـ «زنجیرلیییمیز سنسن دای!»

هاشیم اوجادان گوله – گوله، ال چالیر. آغزیمی بوزوب دئییرم: ـ «بس سیز صاباح تئزدن دورمایاجاقسیز؟!»

شیککیلی قیرجانیب ایشیلدایان کلله سینی توولاییر. بو هایدا – کویده، "داوود" چادیرا کئچیب دئییر: ـ «فرمانده گلیر بو یانا ساری...»
صمد دببه سینی یئره آتیب تئز منیم یانیمدا اوزانیر. هاشیم اونا بونا پتو توللایا – توللایا، ـ «سیس! سیس!» سسی چیخاردیر. بیر نئچه لحظه ایچینده، هامی اوزاناقلی، گؤزلرینی یومورلار. فرمانده چادیرین قیراغینی وورور یوخاری، ایچَری یه بیر باخیر. پتونو اوستومدن گئری آتیب، میخ دورورام آیاغا.

چاس قووزاییب، باخیرام فرمانده¬نین اوزونه. دئییر: ـ «بوردا ائله¬بیل بیر خبر - مبَر وار ایدی؟!»

قیچیمی قیچیما ووروب دئییرم: ـ «خئیر جناب فرمانده! رزمنده لرین بیری داریخمیشدی، بیر آز اونون هاواسینی دَییشیردیک...»

اوشاق لار بئله خورولداییرلار، هئچ ائله¬بیل نئچه دقیقه بوندان قاباق چادیری باش لارینا گؤتورمه میشدیلر. فرمانده گؤزلریمه باخیر. یاناق لاریمین قیزاردیغینی حیس ائدیرم. اودقونا – اودقونا دئییرم:

ـ «هامی دا بئله یورغون ایدی، تئز ییخیلیب یاتدیلار!»

فرمانده بیر سؤز دئمه¬دن، چادیرین قیراغینی بوراخیب گئدیر. آغ ملَفه¬لرین اوستونده اوزانیرام. فرمانده¬نین ماشینین سسی اوزاقلاشاندان سونرا، دئییرم: ـ «وضعیت آغدی. گلین قوربان اولون منه... جانیزین ساتینی آلدیم!»

دیل¬آلتی بیلمیرم بیر بیرلرینه نه دئییرلر. هاشیم ساییر: ـ «بیر! ایکی! اوچ!»

هامیسی بیردن پتولارین، ملفه¬لرین آلتیندان دوروب، گوله - گوله منه ساری یورویورلر. ملَفه¬لری بویون - بوغازیما باغلاییرلار. بوغولا – بوغولا دئییرم:

ـ «یاخشیلیغا یامانلیق! ...»

هاشیم بئله گولور، گؤزونون بولاغیندان یاش سوزور. صمد دئییر:

ـ «بوندان بئله تئز یاتانی آپاریب عراقلی¬لارین سنگرینده باسدیراجاییق!»

بو گئجه بونلار یاتان دئییل¬لر. دئییرم: ـ «یاخشی! آمما بیر شرط نن.»

هامیسی سس سسه وئریب دئییر: ـ «دئنَن گؤره¬ک؟!»

سیزیلدیرام: ـ «اوشاق¬لار! من بَتر اوشویورم... بو گئجه هم یورغونام، هم یوخوسوز. آمانین گونودور، منی چؤله – زادا آپارمایین. سویوق دَیسه، ائویم ییخیلار...»

شیککیلی دئییر: ـ «اردبیل اوشاغی نَدی، سویوق دَیمه نَدی؟»

ایپی خیرتده¬ییمدن بوشالدیب، دئییرم: ـ «بابا! نعشیمی ائله چادیرین ایچینده دولاندیریب، گتیرین باسدیرین پتومون آلتیندا دای!»
ملفه نین اوجونو باشیمین اوستونده دویونله ییرلر. هر یئری آغ گؤرورم. هیرنایا – هیرنایا منی چییین لرینه گؤتوروب، چادیردا دولاندیریرلار. قیشقیر – باغیر سالیرام: ـ «من اؤلوم دای بسدی... یوخوم قاچدی ها!»

سرین له دیییمدن چادیردان چؤله چیخدیغیمیزی باشا دوشورم. دئییرم: ـ «گرَک هامیزی فرمانده نین قاباغیندا گودازا وئریردیم...»

اوشاق¬لار بیردن منی یئره آتیب، سس لری کَسیلیر. بئل – بوخونوم اَزیلیر. ملفه¬نی باشیمدان آچیب، بوینومو اؤوکه له یه – اؤوکه له یه گؤزوم ساتاشیر فرماندهین قیزارمیش گؤزلرینه...

بورا پسوه داغ لاری دیر. بوم بوز دَمیر بؤرکومو باشیما تاخمیشام، توفنگیمی چیینیمدن آسلامیشام. بارماق-لاریم سویوقدان کئیییب. یوخو گؤزلریمه دولوب، کیرپیک لریم اؤزو اؤزونه بیر بیری نین اوستونه قاپانیر. چادیرداکی لارین هامیسی (بو سئری دوغرودان) خورولداییرلار. بو چؤللوکده بیر تک آللاه اویاقدیر، بیر ده من. ننه مین تندیرده پیشیردییی یاغلی چؤرک لری یادیما دوشور. سویوق توفنگیمی باسیرام باغریما، یاواش – یاواش سیزیلداییرام: ـ «ساچ لاری آغلی قره، سنه قوربانام ننه...»