"ائشیت نوروزعلی" ایفاده‌سی هانسی آنلام و معنادا ایشلنمیشدیر؟

"ائشیت نوروزعلی" حکایه‌سی ایکی امکداشین بیر-بیرلریندن بیر ایشی گیزلی توتماقلارینا اشارت اولونار.
گونلرین بیرینده ایکی اوغرو اوغورلوق ائدرلر. بو اوغرولارین بیری‌نین آدی "نوروزعلی"ایمیش.

نوروزعلی یولداشی ایله بیرلیکده اوغورلادیقلاری اشیالاری ائولرینه آپاریب گیزله‌ییر کی، سس- کوی یاتاندان سونرا گتیریب بؤلوشسونلر.
گون او گون اولور کی، ائوگیلی‌یه چیخیرلار، یولداشی دئییر نوروزعلی گتیر اشیالاری بؤلوشک.

بؤلوشرکن نوروزعلی‌نین یولداشی گؤرور اشیالار یاری کسیب!...

سن دئمه، نوروزعلی اوغرو یوداشیندان دا بیر پارا شئیلری اوغورلامیشدیر...

آرتیق آرالارینا سؤز دوشور و قاریشیرلار... ایش چکیر کی، محکمه‌یه گئتسینلر!...

آما بونو محکمه‌یه چیخارا بیلمه‌دیکلری اوچون، نوروزعلی‌نین یولداشی مسئله‌نی مال صاحابین یانینا چکمه‌یی تکلیف ائدیر تا بیر تهر اونو دانیشدیریب اوغورلادیقلاری اشیالارین سایینی و نه اولدوغونو بیلسینلر...

آنجاق نوروزعلی ده بو سؤزون آلتیندا قالماق مجبورییتنده اولور و قاتلانیر.
بئله‌لیکله ایکی اوغرو بیرلیکده ائوی یاریلمیشین یانینا گئدرلر...

بیر گون فرصتله‌ییب نوروزعلی‌ و اوغرو یولداشی سانکی جانی یانیر مال صاحابینا اؤزونو یاخینلادیر، آ کیشی نئجه‌سن؟

جانین ساغ اولسون، باشین صاداغاسی، آلله اوغرونون ائوینی ییخسین... و سوروشار:

قارداش ائشیتدیم مالینی آپارمیشلار؟

تعریفله گؤرک، باشیزا نه گلدی، نلرینی آپاریبلار کؤپح اوشاغی! ؟

کیشی باشلاییر های- های آغلاماغا، ایچینی چالا- چالا باشلاییر آنلاتماغا و ساییر کی، ایکی قالی‌می آپاریبلار...
ایکیجه ساماوار...

نوروزعلی‌نین یولداشی: ائشیت نوروزعلی، ساماوار ایکی دانا!

مال صاحاب: - دؤرت یاتاق یورقان دؤشک!

اوغرو: ائشیت نوروزعلی دؤرت یاتاق یورقان دؤشک!.. کؤپح اوغلو بیر شئی قویمویوب قالسین‌کی، یازیغین ائوینه سوپورگه چکیب دا!...

مال صاحاب: بیر قند قابی! بیر چای نیک! ایکی کیلیم!

اوغرو: ائشیت نوروزعلی، ایکی کیلیم دئییر...

مال صاحاب: بیر خورجون، ایکی خالچا، اوچ تای یون...

اوغرو: ائشیت نوروزعلی، خورجون، یون حله هئچ، ایکی خالچا سؤحبتی وار بورادا...

مال صاحاب: اون‌مین تومن قارا پول...

اوغرو: ائشیت نوروزعلی، اووون مین تومن قارا پول!... بیردن نوروزعلی‌نین یولداشی چاشیب، بارماغینی نوروزعلی‌نین گؤزونه توشلارییب دئدی: کیشی سن کی، منیم ائویمی ییخمیسان!... دور گئدک، دور- دور....

بئله‌لیکله بوتون اشیالاری ایکی اوغرو بیر داها ائو صاحابی‌نین دیلیندن چکیب دورورلار...

آرتیق داها "نوروزعلی" یه یالان دانیشماغا قاچاق یولو قالماییب، اوغورلادیقلاری ماللاری تام اورتایا گتیریب قویاراق یولداشی ایله بؤلمک زوروندا قالیر و بولوشورلر...