اؤتن گون‌لرده «گؤزو یاشلی کوچه‌لر» شاعیرینی کورونا آپاردی.

علی احمدی آده (ع. اورمولو) مین‌اوچ‌یوز‌ایگیرمی‌دؤردونجو ایلده اورمیه‌ده آنادان اولموشدو. عؤمرونون چوخونو تهران‌دا غوربت‌ده یاشادی.

بیلدیر تهران‌ین لاپ جنوبوندا اولان ایگیرمی مئتیرلیک ائوینه چاغیردی. بیر سیرا فیلمنامه، نمایشنامه، تورکجه سریال، شعرلری و اورمو فولکولورو اثرلری‌نین چاپیندان دانیشدیق. نفسی گوجله چیخا- چیخا، او‌ کیتاب‌لاردان نمونه‌لر اوخودو. هر سطیر باشی اؤسگوروب بیر قورتوم چای ایچیردی و سورا چوخ گؤزل و نفیس پیپیندن آغیز دولوسو پوک ووروردو. کئچمیش‌ده شاهزادا کیمی یاشایان سئوگیلی شاعیر، ایندی او بوجاقدان بیر چای سوزوب، گتیرینجه ایکی شعر اوخودو. او قدر کیتاب وار ایدی اوتاق‌دا گوجله یئر تاپیب اوتورموشدوق.

سسینی آریتلاییب، گؤزل سسلی شاعیر دوستوم دئدی: اوغول بولاری چاپ ائلرسن؟ سسی‌نین تئمی او قدر گؤزل ایدی ائله بیلدیم هله شعرین قالانین اوخوماقدادی. دئدی نییه مات قالدین؟ چاپ ائلرسن؟ منده بیر قیران قالماییب، هامیسین خاتین خانیم ییغدی آپاردی...

دئدیم آچیق جواب وئریم اوستاد؟ دئدی ایل‌لر بویو دوستلوغوموز کیمی و شعریمیز کیمی آیدین، آچیق، صادق و کانکرت...

چاپ ائلرم دئدیم اوستاد! ولی آلیب اوخویان یوخدور. او بیری کیتاب‌لاریمیز کیمی ییغیلیب قالار آنباردا، باشقا بیر یوک اولار منه! دای یئر تاپمیرام ییغماغا....

باشین سالدی آشاغا، بیر آه چکدی و‌ باشلادی پیپینی یئنی‌دن دولدورماغا...

دئدی من ده اؤلرم آپاررام گوروما بولاری، قوی هئچ اوخوماسینلار... لعنت الیمه قلم وئرن کیشییه، لعنت بو ادبیاتا، لعنت شاعیرلیگیمه...
دئدیم نیگران قالما اوستاد هر نه دوزه‌له‌جک، هر نه قایداسیندا اولاجاق...

یاواشجا دئدی چایی سویوتما، سویوسا دای تزه‌له‌یه بیلمرم...

مظلوجاسینا دئدی هئچ اولماسا بو قاباق چاپ ائتدیک‌لریمدن پخش ائدین.

دئدیم آپاررام یاییلار کیتابچ‌یلارا آلمازلار، قالار اوردا من سیزدن شرمنده اولارام، بو‌ خالق اَن اوجا شعار وئرن‌لرین دالییجا گئدیر، دیل- مدنیت گوپچو سیاستچی‌لرین و شعار وئرن‌لرین چوروموش ساققیزی اولوب.

سؤیکندییم بسته- بسته باغلانمیش کیتابلارا یاپیشیب، قالخدیم. قرارلاشدیق کی هر آی بیر دؤنه اوتوراق و نهایی‌لشدیرک، آز نسخه‌ده و پولوموز چاتان حدده نشر ائدک.

نوروز بایرامیندان قاباق کورونا شاعیره آمان وئرمه‌دی و بیزیم ادبیات و‌ مدنیت نئچه گنجینه‌نی ایتیردی...

اوچ آیدان سونرا (سایین شاعیر اسماعیل اولکرین) پئیجیندن بیلدیم کی اوستاد اورمولو (اسفندین اون‌ایکیسینده) دونیاسینی دَییشیب.
آلتمیشینجی ایل‌لرده «گؤزو یاشلی کوچه‌لر» کیمی مدرن شعر مجموعه‌سی نشر اولونان شاعیرین مجازی دونیادا بیله بیرجه شکلی ده پایلاشیلمادی. اصلا یئنی نسل اونو تانیمیرلار دا...

اوز-اؤزومه دوشونورم‌کی، یالقوزآباددا بیر داش آتان و دارقوزآباددا دیوارلارا شعار یازانین دیرناغینا داش دَیسه‌یدی مجازی دونیا یالان خبرلرله دولموشدو.

«گؤزو یاشلی کوچه‌لر»، «چیله‌ییر آی ایشیغی»، «نار گیله» و «زامان بیر بهانه‌دیر»، قوجامان شاعیرین نشر اولان اثرلری بونلاردان عیبارت‌دیر.
دقیق یادیمدادیر آلتمیشبنجی ایل‌لرین سون‌لاریندا «گؤزو یاشلی کوچه‌لر» نشر اولموشدو. غزل و قوشما اوخوماغا عادتیمیز اولان بیزیم کیمی گنج شاعیرلر، ها گوجه‌نیردیک اثری اوخویوب لذت آلاق...! دئمه بیزدن اون- ایگیرمی ایل قاباقدایدی یارادیجی شاعیر...
بو‌ گون گوزو یاشلی کوچه‌لر کیتابینی واراقلاییرام، بلکه بیرجه املایی سهوی ده یوخدو او قالین‌لیقدا کیتابین...! ایندی گل مجازی اساتیدین تلگرام و اینستاگرام صفحه‌لرینه باخ، هر سطیر باشینا ۵ یانلیش‌لاری وار. سورا دا ادعالارینا گامیش هئچ، دَوه ده «اوتورا!» بیلمیر...

گؤزو یاشلی کوچه‌لر (شعر توپلوسو)
ع. اورمولو (علی احمدی آده)

آینالاردا قیریق قیریق گیلئی سسی
آینالارین اوزونده گؤز
دیلینده کؤز
آینالاردان آینالارا قول آچیلیر،
آینالاردا درین-درین جنایت‌لر...