آنا صحیفه یازارلار |
"قولاغیم داری دؤشورور."
بهجتآباد خاطیرهسی شهریارین گؤزل شئعرلریندن بیریدیر. او شئعرین ایکینجی بئیتینده ایشلهنن دؤشورمک فئعلی دیققته لاییق بیر سؤزجوکدور.
گؤزلر آسیلی، یوخ نه قارالتی، نه ده بیر سس
باتمیش قولاغیم، گؤر نه دؤشورمکدهدی داری
بیلدیگیم قدر مییانا اطرافیندا ایشلهنن دؤشورمک فئعلی؛ یئره داغیلمیش مرجیمک، نوخود، لپه و باشقا حبوباتی بیر- بیر آییرد ائدیب گؤتورمک معناسیندادیر و چوخ یئرده ایشلهنن دن- دوش ترکیبی دنلهمک و دؤشورمک فئعللرینده اورتایا چیخمیشدیر. ددهقورقود کیتابیندا، ساواشا حاضیرلانان خاقاننین، هر ائلدن بیر ساواشچی سئچیب گؤتورمهسینه چری درمک و چری دؤشورمک فئعللری ایشلنمیشدیر. آما دؤشورمک درمکدن بیرآز فرقلیدیر، دؤشورمک؛ گئنیش بیر یئرده مینلر بیتگی آراسیندان، خاص بیربیتگینی سئچیب درمک آنلامیندادیر نئجهکی بوغاچ یارالاناندا، اونون آناسییلا گلن قیرخ اینجهقیز «یاییلدیلار داغچیچگی دؤشوردولر» اوغلانین یاراسینا مرهم قویدولار.
شهریارین شئعرینده دؤشورمهیین آردیجا گلن داری (فارسجا ارزن) سؤزو، چوخ کیچیک حبوبات آدیدیر و داغیلمیش دارینی یئردن دؤشورمک چتین و دیققتلی ایش ساییلدیغینا گؤره؛ قولاغیم داری دؤشورور ایفادهسی محض سوکوت ایچینده یاییلان سسلری دنلهییب دینلهمک آنلامیندادیر. شفاهی دیلیمزده هرنهیی ائشیدهبیلن آداملارین حاققیندا «فلانکسین قولاغی لاپ داری دریر» ایفادهسی ایشلنمیشدیر.
تاریخ
2020.07.06 / 21:22
|
مولف
Axar.az
|