بیلمیرم عزیزه خانیم حاقدا یازیرام یوخسا فضولی حاقدا یوخسا تبریز شهرداری‌سی طرفیندن اوغورلانمیش هئیکل حاقدا، آما یازیرام.
عزیزه خسته ایدی. سانکی عؤمرونون سون گونلری اولدوغونو بیلمیشدی. گؤزو آیدین گؤرموردو، الی قلم توتابیلمیردی. آما او آغریلی- آجیلی، خسته، هئی‌دن دوشموش حالدا، آغیر بیر وظیفه‌نی یئرینه یئتیرمک ایسته‌ییردی. گئجه‌نی گوندوزه قاتیب، گونلری بیربیرینه دویونله‌ییب ملامحمد فضولی‌نین عؤمور یولونا حصر اولموش «عشق سولطانی» رومانی‌نی یازیردی. بو رومان کئچن آیلاردا تبریزده آیین نشری طرفیندن چاپ اولموشدور.

عزیزه هردن هئی‌دن دوشوب ایختیارسیز یوخویا گئدیردی. آناسی یوخوسونا گلیب اونو دانلایاراق «بالا عزیزه، دای سن اؤلدون آخی، بیرآز دینجل سونرا یازارسان» دئییردی و عزیزه گولومسه‌ییرک « فضولی دؤورو حاقدا تزه ماتریاللار تاپمیشام، تزه مقاملار کشف ائتمیشم. بونلار خالقین خزینه‌سیدیر، اؤزومله آپارا بیلمه‌رم کی، قوی بیرآز دا یازیم سونرا چوخ یاتاجاغام آنا» جاوابلاییردی. ایشین باشقا چتین یؤنو ده واریدی. فضولی عشق شاعیری ایدی و عزیزه آغ بیرچک واختیندا، آغریلی- دردلی بدنله عشقدن- محبتدن یازا بیلمزدی، آما بونلارین هامی‌سینا رغمن یازدی. چونکو «اؤزونو گؤرمک اوچون، باشقاسینی اؤزوندن اوجا توتسان عاشیقسن» دئمیشدی ویلیام بلئیک و عزیزه عاشیق ایدی.

عزیزه جعفرزاده فضولی‌نی بئله دوشونوردو: فضولی‌نی هره اؤزو بیلدیگی کیمی دوشونور. هره‌نین قلبینده بیر فضولی یاشاییر، هره‌نین قلبینده بیر فضولی هئیکلی وار. گؤیلردن یئنیب یئرده‌کیلری گؤیلره قالدیرماق قدرتینه مالیکدیر منیم فضولی‌م.

سجده‌دیر هر یاندا بیر بوت گؤرسم، آیینیم منیم
خواه مؤمن، خواه کافر توت، بودور دینیم منیم.