ایران‌دا اعتراضلارین ایکی آیدان اوزون مدتدیر باشلاماسینا باخمایاراق، نه حکومت مثبت آددیم آتیب، نه ده اعتراضچیلار گئری چکیلیب.

مهسا امینی آدلی گناهسیز گنج قیزین حجاب قایدالارینا رعایت ائتمه‌مه‌سینه گؤره پولیس طرفین‌دن زور تطبیق ائدیله‌رک ساخلانیلماسی و اؤلدورولمه‌سینی تصادفی حادثه حساب ائتسک بئله، بو حادثه‌دن آلوولانان اعتراضلاردا ایران تهلوکه‌سیزلیک قوه‌لرینین عمللرینی تصادف حساب ائتمک ممکن دئییل.
کرج شهرین‌ده ۶ گوله یاراسی ایله اؤلدوروله‌ن ۲۲ یاش‌لی گنج قیز حدیث نجفی، ایزه شهرین‌ده ۹ یاش‌لی کیان نیکپورون گوله‌له‌نمه‌سی، تبریز طب اونیورسیتتینین طلبه‌سی آیالار حقی‌نین اؤلدورولمه‌سی، رپچی توماج صالحینین ایشکه‌نجه‌لر آلتین‌دا اعترافا مجبور ائدیلمه‌سی، انزلی شهرین‌ده ساده‌جه فوتبال یاریشینا گؤره شنله‌نن ۲۷ یاشلی مهران سماکین ماشینینا اودلو سلاح‌دان آتش آچیلماسی نتیجه‌سین‌ده اؤلدورولمه‌سی، همچینین سماکین دفن مراسیمین‌ده باشقا بیر گنجین باش وئره‌نلری تلفن‌لا چکره‌ن وورولوب اؤلدورولمه‌سی – عقله یاتمایان گئرچکلیکلردن، سرت جزا تدبیرلریندن ساده‌جه بعضیلریدیر. اینسانلارین حاقلارینی طلب ائلمه‌سینه ایران محکمه‌لرین‌ده اوزون‌مدتلی حبس، اعدام کیمی حکملرله جواب وئریلیر. اما اونو دا اونوتماق اولماز کی، نه بو حکملرین اجراسی، نه ده اعتراضلاردا اؤلدوروله‌نلرین سایینین ۴۷۰ نفری کئچمه‌سی اهالینین گئری چکیلمه‌سینه سبب اولمادی، عکسینه بو دالغانی داها دا گئنیشلندیردی.

گؤرونه‌ن اودور کی، اعتراضلاردا ایران تهلوکه‌سیزلیک قوه‌لرینین قددار داورانیشی، ائلجه ده، محکمه‌لرین چیخاردیغی اعدام و دیگر آغیر جزا حکملری اهالینین گئری چکیلمه‌سین‌ده هئچ بیر رول اوینامیر.

ایرانین دولت رسمیلرینین اؤلدورولن اعتراضچیلارلا باغلی کیمینین اینتیحار ائتمه‌سی، کیمینین دامدان ییخیلماسی کیمی آبسورد آچیقلامالاری ایسه اؤلکه‌ده یارانان حیدتی داها دا آرتیریب. بو وضعیت ایران‌دا آزاد فکر و سیاسی محیطین اولماماسی سببین‌دن ایللردیر ییغیلان غضبین اعتراضلار فونوندا داوامینا تکان وئردی.

حاضردا رژیمین آکسییالاری یاتیرماق اوچون آتدیغی ایسته‌نیله‌ن آددیم اعتراضلاری داها دا آلوولاندیریر. ایران حکومتینین اهالینین ایستک و ماراقلارینی نظره آلمادان یوروتدویو یانلیش سیاستی نتیجه‌سین‌ده باشلایان اعتراضلارین مقصدی موجود رژیمی دییشمکدیر. حاضردا حاکمیتین ده گئری چکیلمک کیمی نیتینی گؤرموروک. بو، اعتراضلارین هله داوام ائدجیینی دئمه‌یه اساس وئریر. موجود رژمین ایسه گئج تئز داوام ائد‌ن آکسییالار قارشی‌سین‌دا بویون ایمه‌یه مجبور اولاجاق.